Hatutan.com, (26 Jullu 2022), Díli—Komandu Polísia Nasionál Timor-Leste (PNTL), realiza serimónia despedida ho ofisiál superiór na’in-tolu ne’ebé iha semana ne’e sei ba tuir formasaun ka kursu kona-bá defeza no seguransa iha Austrália durante fulan 17.

Serimónia despedida ho ofisiál superiór na’in-tolu ne’ebé iha semana ne’e sei ba tuir formasaun kona-bá defeza no seguransa iha Austrália durante fulan 17, Kuartél Jerál PNTL, Caicoli, Tersa (26/07/2022). Foto/PNTL.

Ofisiál superiór sira ne’e mak hanesan, Komandante Administrasaun PNTL, Superintendente Xefe Polísia, José Soares, Xefe Departamentu Justisa PNTL, Agostinho Gomes no Komandante Sentru Operasaun Nasionál, Superintendente Asistente, Agosto Tilman.

Lee Mós:Polísia Austrália Apoia PNTL To’o 2027

Komandante Jerál PNTL, Komisáriu Polísia, Faustino da Costa esplika, kursu kona-bá Pacific Defence Estrategy ne’e, normalmente oferese ba FALINTIL Forsa Defeza Timor-Leste (F-FDTL), maibé iha 2021 to’o mai ohin loron, Governu Austrália liuhosi adidu defeza Austrália nian iha TL, fó mós oportunidade ba PNTL hodi bele partisipa liuhosi prosesu sira selesaun nian inklui teste ne’ebé estabelesidu.

“Serimónia ida ne’e ita halo, atu despede  ofisiál superiór PNTL na’in-tolu ne’ebé sei dezloka ba Austrália iha semana ida ne’e, atu bele partisipa iha kursu ida ho durasaun tinan ida. Maibé, molok atu tuir kursu ne’e tinan ida, preparasaun ba kestaun lingua, kursu lian ingléz ne’e fulan lima,” Komisáriu Polísia, Faustino da Costa hateten iha Kuartél Jerál PNTL Caicoli, Tersa (26/07/2022).

Esperansa Komandu ba futuru, iha buat rua mak importante, primeiru sei identifika nesesidade saida mak PNTL presiza atu dezenvolve internalmente. Segundu, kursu ida-ne’e, sai hanesan oportunidade ida ba membru sira hodi bele iha ligasaun, tanba iha kursu ne’e rasik ema hosi nasaun oioin mak partisipa.

“Maibé mós saida mak ita sei haree, bainhira lori fila mai TL. Ita haree mós hanesan kona-bá dezastre sira, jestaun risku ba dezastre. Ida-ne’e parte ida ne’ebé mak ita sei haree, sira sei frekuenta kursu ida-ne’e. Saida mak ita nia esperansa mak ne’e, sira ne’e hanesan inisiu hosi prosesu hotu, katak sei iha tempu mós ba komandante sira seluk,” nia hateten.

Kursu ne’e hala’o ba dala-rua ona, iha faze dahuluk komandu PNTL haruka ona Superintendente Xefe Polísia, Natércia Martins. Enkuantu iha faze daruak ne’e, komandu PNTL delega tán superior na’in-tolu.

Iha planu estratéjiku PNTL nian hatuur ona katak, formasaun ba membru no ofisiál superiór sira tenke kontinua ho objetivu ida katak, bainhira mak bele hatene loloos katak, PNTL ne’e profesionál.

Jornalista: Rogério Pereira Cárceres