Hatutan.com, (16 Agostu 2022), Díli- Ministru Prezidénsia Konsellu Ministru (MPCM), Fidelis Leite Magalhães hamutuk ho Ministru Koordenadór Asuntu Ekonomiku (MKAE), Joaquim Amaral ho Ministru Finansas (MF), Rui Gomes, Tersa (16/08/2022), bá hasoru Prezidente Repúblika (PR), José Ramos-Horta, hodi rona opiniaun balun husi Xefe Estadu ne’e kona-bá vizaun boot Timor nia futuru ho dezenvolvimentu setor sira importante bá rai ida ne’e.  

Ministru Prezidénsia Konsellu Ministru (MPCM), Fidelis Leite Magalhães. Foto/Hatutan.com

Ministru PCM, Fidelis Leite Magalhães, hateten  sira mai  rona vizaun sira Xefe Estadu nian no atu oinsá bele operasionaliza parte ezekutivu nian, vizaun boot kona-bá Timor nia futuru, dezenvolvimentu setór sira ne’ebé importante bá rai ida ne’e.

Xefe Estadu husu atu haree liu parte legál jurídiku konstitusionál nian, parte ekonomia nian, no parte finansas nian, atu bele iha sinerjia di’ak liu entre Governu, liuhosi Primeiru Ministru Taur Matan Ruak nian, ho parte Xefe Estadu no nia ekipa tékniku sira.

“Ita halo artikula ida ne’e, atu lori duni rezultadu, no sinál ida katak iha relasaun institusionál ne’ebé metin liu entre órgaun soberania nian, entaun ami atu rona vizaun hirak ne’e, no lori hanesan bukae no parte téknika Governu nian mós sei anota hotu, halo iha tempu badak ita halo transforma sai realidade vizaun hirak ne’e hanesan Estadu ida,” Fidelis Leite Magalhães hateten.

Área barak ne’ebé sira diskute ho Xefe Estadu, maibé área hirak ne’e relasiona ho koordenasaun polítika jerál Governu nian, no polítika lejizlativa Governu nian, no parte ekonomia nian mak Ministru Koordenadór Asuntu Ekonomiku, no relasaun ho parte finansas nian mak Ministru Finansas.

Dezenvolvimentu entremu fíziku, Governu atinje iha área barak no lansamentu buat barak ona, iha fulan-Novembru sei lansa tan Portu Tibar, Fiber Optika la’o ona, uma kbiit laek la’o, apoiu sosiál sira la’o, investimentu estrada sira la’o hela, bee-moos la’o, kooperasaun internasionál la’o.

“Hatudu katak nasaun ne’e la’o ritmu ne’ebé di’ak, konsidera katak foin sai husi pandémia globál ida-ne’e no agora daudaun funu iha Ukránia ne’ebé afeta mundu tomak,” Fidelis hateten.

Prezidente Repúblika José Ramos Horta hakarak Timor tenke bá oin tuir vizaun sira ne’ebé Xefe Estadu iha bainhira ko’alia ho nasaun sira seluk, no mós vizaun rasik Xefe Estadu nian.

Jornalista: Vito Salvadór