Sekretáriu Estadu Komunikasaun Sosiál, Merício Juvinál dos Reis ‘Akara’. Foto Hatutan.com

Hatutan.com, (01 Outubru 2021), Dili—Governu liuhosi Sekretáriu Estadu Komunikasaun Sosiál (SEKOMS), hatuur ona mehi ida iha planu mestre ‘master plan’ ho misaun no vizaun atu estabelese média munisipál, atu hakotu dependénsia ba média nasionál.

Objetivu prinsipál hosi kriasaun média munisipál ne’e atu promove diversifikasaun sosiál, ne’ebé kontribui hodi asegura direitu ema-nian ba asesu informasaun.

Liu-tán ida-ne’e, prezensa média munisipál ne’e sei lori informasaun besik ba populasaun iha área rurál no garante katak, informasaun ne’e kredível hanesan mós ho populasaun área urbana asesa.

Planu mestre ne’e, maski sei iha hela mehi nia laran, maibé SEKOMS trasa atu responde saida mak hakerek nanis ona iha Konstituisaun Repúblika Demokrátika Timor Leste (K-RDTL), kona-bá liberdade imprensa no liberdade expresaun, iha artigu 40 no 41.

Benefísiu seluk hosi estabelesimentu média munisipál ne’e, SEKOMS garante katak, sei hamenus informasaun falsa no promove pás ho aarmonia sosiál iha komunidade nia-leet.

“Objetivu prinsipál hakarak korre-an hosi dependénsia ba média nasionál no hakarak komunidade asesa diretamente informasaun ho plataforma dijitál ne’ebé lais no kredível,” Sekretáriu Estadu Komunikasaun Sosiál, Merício Juvinál dos Reis ‘Akara’ hateten ba jornalista-sira iha Otél Timor, Sesta (01/10/21).

Mehi SEKOMS ne’e katak, iha 2023 populasaun 70% iha territóriu nasionál tenke asesu ona ba informasaun liuhosi meiu komunikasaun sosiál ne’ebé sei estabelese iha munisípiu hotu.

SEKOMS rasik hahú ona programa pilotu iha munisípiu Lautém, Manufahi, Aileu no Bobonaru, bazeia ba peskiza no estudu viabilidade no tenke iha ona portál ofisiál-rasik atu bele divulga informasaun ba públiku relasiona ho atividade no akontensimentu-sira iha munisípiu.

SEKOMS mós iha ona planu atu harii infraestrutura integradu ne’ebé akumulativu, hodi halibur jornalista destakadu iha munisípiu, nune’e autoridade munisipál hamutuk ho populasaun fasilmente asesu ba kanalizasaun média ne’ebé iha, tantu média Estatal no privada.

Kona-bá kustu infraestrutura ba média ne’e, SEKOMS sei halo koordenasaun ho Autoridade munisipál-sira, atu bele haree hamutuk planu prioridade-sira iha tinan 2022 ho Orsamentu Jerál Estadu (OJE).

Administradór Munisípiu Lautém, Domingos Sávio, orgullu tanba SEKOMS fihir Lautém hanesan munisípiu pilotu ba implementasaun média munisipál.

Autoridade Lautém ne’e komprometidu sei koopera ho parte hotu-hotu hodi oferese fatin ba sentru informasaun no kriasaun ba infraestrutura integradu, ne’ebé bele akumula korrespondente hosi média nasionál-sira.

“Ami prontu atu koopera ho Governu hodi bele harii fatin ba média iha Lautém,” Domingos Sávio, hateten ba Hatutan.com, iha Otél Timor.

Parte autoridade Lautém mós sei esforsu atu diskute orsamentu ho SEKOMS kona-bá estabelesimentu média munisipál.

Ante ne’e, SEKOMS lansa ona sentru informasaun iha suku Soilesu, Munisípiu Bobonaro, suku Batumanu Ermera, Seloi-Kraik, Munisípiu Aileu, suku Haekoni munisípiu Baucau, suku Fuat no Muapitine Munisípiu Lautém no seluk tan. (bit)