Hatutan.com, (21 Setembru 2021), Díli—Conselho de Imprensa de Timor Leste (CI) hamutuk ho Centro Nasional Chega (CNC), tersa (21/09/2021), hatuur hikas plaka Liberdade Imprensa iha Rotunda Proklamadór Francisco Xavier do Amaral, Díli.

Plaka ne’e asina diretamente hosi  reprezentante Sekretáriu Jerál Nasoins Unidas nian iha Timor Leste iha tinan 2002,  Sergio Viera de Melo  (matebian ona) hodi konsagra avenida Liberdade Imprensa hosi rotunda eis Merkadu Antiga, Caicoli to’o terminal Becora, Díli.  

Laureadu Nobel ba Pás 1996, José Ramos-Horta foto hamutuk ho Vise-Ministru Administrasaun Estatál, Lino de Jesus Torezão ho dirijente CI no CNC. Foto/Hatutan.com

Estadu Timor Leste rekoñese partisipasaun jornalista sira nian iha prosesu luta ba ukun rasik aan no rekoñesimentu Avenida Liberdade Imprensa ida-ne’e fó onra ba  jornalista na’in 10 ne’ebé mate tanba defende liberdade imprensa no liberdade espresaun iha Timor-Leste.

“Ita atinzi mehi boot ida ne’e tamba kontribuisaun ema hotu nian. iha nasaun ne’ebé de’it, uainhira post konflitu sempre iha justisa tranzitóriu ne’ebé iha mós komponente reparasaun ne’ebé sei halo ho memorizasaun hodi kompensa vítima sira nu’udar rekoñesimentu,” diretór ezekutivu CNC, Hugo Maria Fernandes hatetne lia nia palestra.

“Ita selebra asaun memorializasaun ida-ne’e, atu hatudu katak ita dignifika, valoriza no fó rekoñesimentu ba sira-nia kontribuisaun ba ita-nia nasaun. Ida seluk mak liu husi asaun ida ne’e nu’udar sentidu solidariedade ba sira nia família ne’ebé sira husik hela tanba luta ba lia-loos.” Membru CI periodu 2016-2020 ne’e hateten.

Iha fatin hanesan prezidente Conselho de Imprensa, Virgílio Guterres, hateten,  avenida liberdade imprensa mai husi inisiativa jornalista sira nian. Asosiasaun Jornalista Timor-Leste (AJTL) hahú inisia atu hanaran avenida ne’e ho naran liberdade imprensa dezde tinan 2002.

Nia hatutan, ohin halo hikas re-estensaun ba avenida ida-ne’e atu hatudu Konselho de Impresa, Asosiasaun Jornalista no parseiru sira iha hela esforsu atu halo kampaña no advokasia hodi hanaruk hikas avenida Liberdade Imprensa ne’ebé governu anteriór habadak husi terminal Becora mai iha ponte Kuluhun.

Presidente CI reforsa liután, iha razaun fundamental atu avenida ida-ne’e ba to’o iha suku Camea, Aldeia Lases, Becora, tanba iha jornalista na’in rua ne’ebé hakotu sira nia vida uainhira hala’o knar hanesan jornalista iha dalan diresaun Kuluhun no Becora.

“Ita sei esforsu atu hanaruk hikas avenida ne’e tuir plaka sira ne’ebé ita tau. Tamba iha dalan sira ne’e mak jornalista nain rua mate. Bernadino A. Guterres mate iha Kuluhun no ita-nia maluk Jornalista estranjeiru Sanders Robert Thones mate iha igreja Becora nia oin,” Virgílio hateten.

Esforsu re-estensaun ba Avenida Liberdade Imprensa hatudu komunidade jornalista Timor Leste lakohi lakon memorizasaun husi maluk jornalista sira ne’ebé mate tanba hakarak promove Liberdade Imprensa no garante demokrasia iha nasaun ida-ne’e.

Iha fatin hanesan, Vise-Ministru Administrasaun Estatál,  Lino de Jesus Torezão hateten Avenida Liberdade Imprensa no Avenida sira seluk iha sidade urbana Díli regula ho rezolusaun Governu númeru 42, 2015 ne’ebé legálmente iha dekretu lei númeru 29/2016, ko’alia kona-ba naran armamentu ka Estrada ho naran ba uma. Alem de ida ne’e, iha Artigu 3 dekretu lei 29, 2019 ko’alia kona-ba tipu arrolamentu hat mak hanesan Avenida, Rua, Travessa no Beco.

Mudansa ba naran sira ne’ebé eziste iha sidade urbana bazeia ba dekretu lei no regulamentu sira ne’ebé iha. Avenida Liberdade Imprensa bele iha fali mudansa bazeia akordu ruma husi parte hotu.

“Aban bainrua sei iha mudansa ruma ho fatin sira ne’e, Ministériu Administrasaun Estatál sei haree didi’ak no ko’alia ho instituisaun relevante ne’ebé mak iha kompeténsia atu hola desizaun,” Vise-Ministru, Lino de Jesus Torezão hateten.

Horta husu Governu haktuir saida maka estabelese ona

Iha biban hanesan, Premiadu Nobel ba Pás 1996, José Ramos-Horta , husu Governu atu tau hikas Avenida Liberdade Imprensa tuir saida mak antes ne’e estabelese ona.

Tuir Ramos-Horta, liberdade imprensa iha rai ida-ne’e refleta ho Timor-oan nia istória luta ba ukun rasik an. Jornalista barak mate tamba defende Liberdade ema Timor-oan nian.

“Ita nia sosiedade labele haluhan jornalista sira ne’ebé kontribui ba ita nia liberdade. Kontribui maka’as ba mobiliza opiniaun públiku mundiál. Tamba ne’e, Avenida ida-ne’e lori mensajen permanente kona-ba Liberdade Imprensa no Liberdade Espresaun,” Ramos-Horta afirma.

Hafoin lansamentu ba plaka avenida liberdade imprensa kontinua ho marxa liberdade imprensa husi Rotunda Francisco Xavier do Amaral ba to’o iha terminal Becora, Suku Camea, Aldeia Anin-fuik. (bit)