Hatutan.com, (24 Setembru 2021), Díli—Governu liuhosi sorumutuk  Konsellu Ministrus estraordináriu, Sesta (24/09/2021), iha Palaçio do Governo, Díli, aprova ona votu pezár no aprova Rezolusaun Governu ne’ebé dekreta lutu nasionál ba falesimentu husi Ma’Huno Bulerek Karathayano.

Notísia iha Relasaun : STOP PRESS: Timor-Leste lakon tan asua’in Ma’huno Bulerek Karathayano

Saudozu Ma’Huno Bulerek Karathayano,  nu’udar Komandante FALINTIL nian, ex-Sekretáriu Komisaun Diretiva FRETILIN nian no atualmente Primeiru-Vise-Prezidente Partidu CNRT, hakotu iis iha Ospitál Nasionál Guido Valadares (HNGV) hafoin halo tratamentu intensivu iha Izolamentu Lahane tanba infetadu moras nakda’et COVID-19. Maske nune’e, iha teste ikus, hatudu rezultadu Saudozu negativu ona hosi COVID-19 no transfere fali ba HNGV hodi halo tratamentu  tanba moras seluk, maibé esforsu sira médiku no pesoál saúde sira la konsege salva  Saudozu hosi mistériu mate.

Governu deside lutu nasionál ne’e iha territóriu nasionál tomak, ba períodu loron tolu, hahú husi tuku 8:00, loron 25 fulan-Setembru to’o tuku 07:59, loron 28 fulan-Setembru.

Durante períodu lutu nasionál bandeira nasionál sei hasa’e to’o ai-riin klaran de’it (meia haste), iha nasaun laran tomak iha fatin sira ne’ebé maka obrigatóriu tenke uza, inklui iha misaun diplomátika sira.

Ramos-Horta triste

 Prezidente Repúblika períodu 2007-2012, José Ramos-Horta sente triste no lakon eroi boot Ma’Huno Bulerek Karathayano.

Ramos-Horta espresa nia triste ne’e liuhosi nia riska ka hakerek iha nia pájina Facebook nune’e; ANTONIO JOÃO GOMES DA COSTA – MAHUNU

Ami hamutuk iha Misaun Katólika Soibada…Ami hamutuk iha SMA iha Dili. Iha 1974 ami nain rua hamutuk tama-sai bairru Iha Dili halo kampaña ASDT.

ANTONIO JOAO GOMES DA COSTA – MAHUNU – Eroi Nasionál. Triste loos, fuan kanek. Kondolénsias ba família tomak. Adeus Irmão, Amigo De Infância, Herói da Pátria. (bit)