Hatutan.com, (08 Outubru 2021), Dili—Prezidente Repúblika (PR), Francisco Guterres Lú Olo, husu ba Embaixadór foun Timor-Leste (TL)-nian hamutuk na’in-lima ne’ebé foin simu pose, atu hala’o asaun diplomátika, tenke korresponde ho nesesidade país-nian.

Embaixadór TL ba Reinu Béljika, Jorge Trindade Neves de Camões, asina termu pose iha salaun Xina Palasiu PR, Sesta (07/10/21). Foto/Media PR.

Embaixadór foun Timor-Leste na’in-lima ne’e mak hanesan, Embaixadór ba Reinu Tailándia, Juvêncio de Jesus Martins, Reino Béljika, Jorge Trindade Neves de Camões, Repúblika Indonézia Filomeno Aleixo da Cruz, Repúblika Mozambike Francisco Miranda Branco no ba Malázia Joana Veneranda Amaral.

Notísia iha Relasaun:KM aprova proposta OJE 2022 billaun $1,675

“Asaun diplomátika, dezenvolve iha país ida-idak, tenke korresponde ba nesesidade interna ita-nia país,” Prezidente Repúblika, hateten iha diskursu.

Advertisement

Xefe Estadu husu ne’e tanba país investe iha diplomasia fatia ida razoável hosi Orsamentu Jerál Estadu (OJE) no sai óbviu, katak, ida-ne’e ejize autór sira- diplomata, fó énfaze ba Embaixadór-sira atu kumpre sira-nia misaun.

Nomeasaun ba Embaixadór sira hatudu konfiansa Prezidente Repúblika nian no Governu ne’ebé fó empossada. Prezidente Repúblika fiar katak ho orientasaun hosi Ministériu Negosiu Estranjeiru, embaixadór-sira sei esplora oportunidade iha país ida-idak ba benefísiu TL.

Embaixadór Juvêncio de Jesus Martins, diplomata karreira, uluk sai Embaixadór Timor-Leste nian ba Malázia, no mós akreditadu ba Vietnam no Myanmar. Ikusliu sai Embaixadór Timor-Leste nian ba Filipina. Embaixadór ezerse funsaun diplomátika iha Indonézia.

Embaixadór Jorge Trindade Neves de Camões, diplomata karreira. Sai joven diplomata na’in-tolu dahuluk nian iha Timor-Leste, destaka iha Jakarta, Indonézia, hafoin referendu iha 1999. Ezerse funsaun oioin iha MNEK no funsaun servisu perifériku esternu. Sai Sekretáriu Jerál MNEK ba dala-rua. Nomeadu ba Embaixadór Timor-Leste nian iha Vietnam, ba tinan-haat mo iha koñesimentu kle’an ba assuntu ASEAN-nian.

Embaixadór Filomeno Aleixo da Cruz, sai Embaixadór Timor-Leste nian ba Japaun hosi 2016-2019. Sai Vise-Ministru Administrasaun Estatál hosi I no II Governu Konstitusionál. Formadór ba kuadru, konsultór no fasilitadór ba asaun formasaun iha Institutu Repúblikanu Internasionál hosi Estadu Unidu.

Advertisement

Embaixadór Francisco Miranda Branco, hahú envolve iha atividade polítika ho otas nurak tebes hafoin revolução dos cravos akontese iha Portugál 1974. Kompleta nia estudu iha Liceu  Dr. Francisco Machado no hahú serbisu nu’udár funsionáriu públiku iha Serviços de Planeamento Económico e Estatística, Provinsia Ultramarina Timor. Desde 2001 nu’udár Deputadu asume responsabilidade oioin.

Embaixadora Joana Veneranda Amaral, envolve barak iha kampu edukasaun nian. Envolve iha projetu ne’ebé iha relasaun ho Timor-Leste no Japaun, iha ámbitu Centro Cultural Timor-Leste-Japão. Sai profesora iha eskola sekundária Fuiloro no Diretora Administrasaun no Jestora Rekursu Korporativas ba empreza Konsultadoria.

Ba Embaixadór na’in-lima ne’ebé simu posse ohin, Prezidente Repúblika dezeja susesu ba funsaun nu’udár reprezentante diplomátika Timor-Leste nian.

Iha 07 Outubru 2021, liuhusi Dekretu Prizedente Repúblika, Prezidente Repúblika nomeia Embaixadór sira Timor-Leste ba Tailándia, Béljika, Indonézia, Mosambike no Malázia. (bit)

Advertisement