Connect with us
Pakote Ahi

Ekonomia

KM aprova proposta OJE 2022 billaun $1,675

Published

on

Hatutan.com, (06 Outubru 2021), Díli—Sorumutuk Konsellu Ministrus iha Palásiu Governu, Díli, Kuarta (06/10/2021), aprova ona Projetu ba Proposta Lei Orsamentu Jerál Estadu (OJE) 2022, montante billaun $1,675 no kompostu husi Orsamentu Administrasaun Sentrál, Orsamentu Rejiaun Administrativa Espesiál Oé-Cusse Ambeno no Orsamentu Seguransa Sosiál nian.

Liuhosi komunikadu imprensa ne’ebé Hatutan.com asesu relata katak Governu Konstitusionál VIII define ona prioridade nasionál neen (6) ba OJE 2022, maka hanesan;   

1) dezenvolvimentu kapitál umanu (edukasaun, formasaun profisionál no saúde);

Advertisement

2) abitasaun no inkluzaun sosiál;

3) setór produtivu sira (agrikultura no turizmu), ambiente no konetividade;

4) dezenvolvimentu setór privadu;

5) dezenvolvimentu rurál; no

6) governasaun di’ak.

Advertisement

Konsellu Ministrus aprova mós projetu Deliberasaun ba autorizasaun hodi selebra kontratu finansiamentu rua ho Banku Dezenvolvimentu Aziátiku, iha ámbitu Projetu Espansaun ba Aeroportu Internasionál Prezidente Nicolau Lobato. Projetu deliberasaun ne’e hetan ona deliberasaun iha Sorumutuk Konsellu Ministrus iha loron 15 fulan-Setembru 2021, maibé tanba iha introdusaun ba alterasaun balun iha faze redasaun finál nian, presiza submete fali ba deliberasaun foun.

Reuniaun Konsellu Ministrus. Foto/Gpm.gov.TL

Hetan mós aprovasaun ba projetu Rezolusaun Governu nian kona-ba Planu Asaun Nasionál ba Ema ho Defisiénsia tinan 2021 to’o 2030, ne’ebé aprezenta husi Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos.

Planu Asaun Nasionál ba ema ho Defisiénsia tinan 2021 to’o 2030 ho objetivu prinsipál atu garante promosaun ba direitu ema ho Defisiénsia iha períodu tinan 2021 – 2030, tuir orientasaun sira ne’ebé define ona husi Polítika Nasionál ba Inkluzaun no Promosaun Direitu Ema ho Defisiénsia, ne’ebé aprova liuhusi Rezolusaun Governu nú. 14/2012, loron 9 fulan-maiu, liuhusi asaun lubun ida atu dezenvolve ho forma artikuladu husi entidade públika sira.

Konsellu Ministrus delibera atu autoriza loke prosedimentu aprovizionamentu sira ba adjudikasaun kontratu públiku rua ba obra kona-ba projetu konstrusaun ba irrigasaun Laivai, iha Munisípiu Lautem no Galata iha Munisípiu Baucau, bazeia ba projetu deliberasaun ne’ebé aprezenta husi Ministru Agrikultura no Peskas, Pedro dos Reis. Projetu irrigasaun Galata sei kobre área ektare 600 no sei benefisia uma-kain 750. Projetu irrigasaun Laivai sei kobre área ektare 300, inklui natar ektare 176 no sei benefisia uma-kain 435.

Konsellu Ministrus delibera aprova prosedimentu aprovizionamentu ba adjudikasaun kontratu públiku ba akizisaun mákina raiu X tolu (3) ba inspesaun veíkulu, bagajen liman nian no ema nian ne’ebé Autoridade Aduaneira atu utiliza iha Postu Integradu Batugadé no Salele, tuir projetu ne’ebé Ministru Finansas, Rui Augusto Gomes aprezenta.

Konsellu Ministrus asiste aprezentasaun Relatóriu Datoluk husi Grupu Traballu kona-ba Revizaun Periódika Universál ba aplikasaun direitus umanus iha territóriu nasionál, ne’ebé aprezenta husi Vise-Ministru Justisa, José Edmundo Caetano. Revizaun Periódika Universál ne’e hanesan mekanizmu ida Konsellu Direitus Umanus, ne’ebé estabelese iha tinan 2006 no abranje Estadu-membru sira Nasoins Unidas 193. Timor-Leste submete mekanizmu avaliasaun ida-ne’e ba datoluk, no Revizaun Periódika Universál Timor-Leste nian ikus hala’o iha fulan-novembru tinan 2016. Iha siklu ida-idak sei analiza progresu iha situasaun Direitus Umanus nian iha kada país hahú husi revizaun dahuluk no kada Estadu iha posibilidade atu subliña asaun no medida konkreta sira ne’ebé foti hodi aplika rekomendasaun sira ne’ebé simu iha siklu revizaun anterior nian. Prevee katak Timor- iha fulan-janeiru tinan 2022, Timor-Leste submete relatóriu kona-ba progresu no dezafiu sira kona-ba situasaun Direitus Umanus nian iha país, iha períodu 2017 to’o 2021.

Advertisement

Vise-Primeira-Ministra no Ministra Solidariedade Sosiál no Inkluzaun no Komisária Nasionál ba Direitu Labarik, Dinorah Granadeiro, aprezenta ba Konsellu Ministrus, Relatóriu Períodu Dahaat kona-ba Konvensaun Direitu Labarik nian no protokolu fakultativu sira relasiona ho faan labarik, prostituisaun no pornografia infantíl no envolvimentu labarik iha konflitu armadu sira. Relatóriu ne’e abranje períodu tinan 2015 to’o tinan 2019 ba Konvensaun no husi tinan 2008 to’o 2019 ba protokolu fakultativu sira. Atu rekolla dadus no informasaun husi relatóriu ne’e kona-ba implementasaun husi rekomendasaun sira Konvensaun nian, hala’o konsulta públika ne’ebé luan ho ministériu no instituisaun Estadu sira ne’ebé relevante. Hafoin finaliza tiha ezbosu dahuluk husi dokumentu ne’e, Komisaun Nasionál ba Direitu Labarik nian, rona mós opiniaun no komentáriu sira husi organizasaun sosiedade sivíl nasionál, estranjeira no Ajénsia Nasoins Unidas.

Ministru Petróleu no Minerais, Victor da Conceição Soares no responsavel sira ANPM, Timor Gap no IPG halo aprezentasaun ida kona-ba Planu Estratéjiku Ministériu Petróleu no Minerais nian ba períodu 2021 to’o 2030 no redefinisaun ba setór petrolíferu. Planu ne’e aprezenta intensaun balu ba reforsu indústria petrolífera nasionál, maka hanesan esforsu otimizasaun kampu Bayu-Undan ho perfurasaun foun no aselerasaun ba atividade prospesaun no esplorasaun mina-rai no gás iha país.

Ikusliu, Primeiru-Ministru, Taur Matan Ruak no Porta-voz komisaun interministeriál ba planu vasinasaun kontra COVID-19, Danina Coelho, halo aprezentasaun ida kona-ba vasina kontra COVID-19. Durante aprezentasaun halo atualizasaun ida kona-ba informasaun ikus ne’ebé iha kona-ba vasina kontra COVID-19, iha nivel distribuisaun, implementasaun, efetividade, efeitu sekundáriu no nesesidade administrasaun ba doze reforsu nian. Aprezenta mós dadus ikus kona-ba vasinasaun iha país. Ema 463.644 iha país nia laran maka simu ona pelu menus vasina doze ida, ne’ebé ekivale 61,4% husi populasaun ho idade 18 ba leten. 38,3% husi populasaun adulta iha país maka kompleta ona vasinasaun. Aprezenta mós rekomendasaun ba reforsu prevensaun kazu grave COVID-19 no atu hasa’e persentajen ba vasinasaun nasionál. (*/car)

 

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Ekonomia

Folin Foos Kontinua Sa’e, Bankada FRETILIN Kestiona Kapasidade Governu

Published

on

Hatutan.com, (21 Maiu 2024), Díli-Folin foos iha territóriu nasionál seidauk hatudu sinal atu tuun, maske Governu ne’ebé lidera hosi Kay Rala Xanana Gusmão kontrata ona empreza nasionál  lima (5) atu bele ajuda Governu halo intervensaun bá folin foos iha merkadu.

(more…)

Kontinua Le'e

Ekonomia

Indonesia Salurkan Rp 4,4 Miliar Dukung Program Reformasi Manajemen Keuangan Timor-Leste

Published

on

Hatutan.com, (16 Mei 2024), Dili– Pemerintah Republik Indonesia melalui Lembaga Dana Kerja Sama Pembangunan Internasional (LDKPI) atau Indonesian AID menyalurkan bantuan dengan nilai Rp 4,4 miliar untuk pelaksanaan program reformasi manajemen keuangan Timor-Leste (Financial Management Reform Program): Development of Public and Private Accounting Standards dan Executive Development Program: Indonesian Government Financial Management System Training for Timor-Leste.

(more…)

Kontinua Le'e

Ekonomia

18 Maiu 2024, Aero Dili Lansa Vou Dahuluk Díli-Oecusse

Published

on

Hatutan.com, (14 Maiu 2024), Díli—Aviaun komersiál Timoroan nian, Aero Dili, Sábadu 18 fulan-Maiu 2024, halo inaugural flight ka lansa vou dahuluk bá Rejiaun Administrativu Espesiál Oe-Cusse Ambeno (RAEOA).

(more…)

Kontinua Le'e
Advertisement

Trending