Hatutan.com, (09 Fevereiru 2024), Díli-Prezidente Repúblika (PR), José Ramos-Horta husu bá Ministra Edukasaun (ME), Dulce de Jesus, atu aselera prosesu integrasaun dokumentu Fraternidade Umanu bá kurríkulu edukasaun nasionál.

Lee Mós: TL Sei Adopta Dokumentu Fraternidade Umana iha Kurríkulu Nasionál

Ministra Edukasaun, Dulce de Jesus. Foto/Elio dos Santos da Costa

Hafoin hasoru malu ho Prezidente Repúblika, José Ramos-Horta iha Palásiu Prezidensiál, Sesta (09/02/2024), Ministra Dulce de Jesus, informa nia mai simu orientasaun hosi Xefe Estadu atu Ministériu Edukasaun buka hahú prosesu desiminisaun bá Dokumentu Fraternidade Umanu ne’ebé hetan ona rezolusaun hosi Parlamentu Nasionál.

Ministériu Edukasaun  simu no sei asume responsabilidade tomak atu garante katak Dokumentu Fraternidade Umana ne’ebé asina hosi Grand Imam Al-Azhar Cairo, Prof. Dr . Ammad Tayyeb no Papa Francisco, ne’e bele hatama iha kurríkulu edukasaun nasionál.

“Ministériu Edukasaun  oras ne’e, iha faze halo revizaun bá kurríkulu terseiru siklu, ho ida ne’e, ita hanoin mós atu hatama matéria Fraternidade Umana iha formasaun bá profesór sira no mós ba estudante sira,” Ministra Dulce de Jesus hateten.

Dokumentu Fraternidade Umana ne’e hanesan dokumentu ofisiál ida, nune’e Ministériu Edukasaun  hamutuk ho Gabinete Prezidénsia Repúblika sei halo esforsu hotu atu simplifika dokumentu ne’e ho imajen ruma tan atu bele ajuda profesór no estudante sira bele utiliza.

Jornalista: Vito Salvadór