Hatutan.com, (15 Outubru 2021), Dili—Polísia Sientífika Investigasaun Kriminál (PSIK), konklui ona prosesu investigasaun ba suspeitu ho vítima kona-bá kazu asidente tráfegu ne’ebé akontese iha área Kuluhun no entrega ona ba Ministériu Públiku (MP).

Portavós PSIK, Octavio da Costa Araújo. Foto/Hatutan.com.

Asidente ne’e akontese iha Kuarta 23 juñu 2021, bainhira matebian Renato Vieira de Araújo, sai hosi uma iha dadeersan madrugada ba hala’o ezersísiu iha Estrada-ibun, área Kuluhun.

Infelismente, iha tuku 05:00 matebian hetan xoke hosi suspeitu ida ho nia karreta privada to’o mate fatin, no ikus-mai halai lakon hosi fatin asidente.

“Iha prosesu inísiu MP delega fila-fali kompeténsia mai iha PSIK nune’e prosesu ita termina ona iha fulan Agostu no remete hikas mai MP,” Portavós PSIK, Octavio da Costa Araújo, hateten liuhosi Konferénsia Imprensa iha Sala reuniaun PSIK, Kaikoli, Sesta (15/10/21).

Dadus no informasaun hosi ema interveniente-sira ba prosesu ne’e, parte PSIK rona hotu ona hosi parte suspeitu no família vítima inklui sasin-sira.

PSIK klarifika katak, suspeitu iha hela Timor no la halai ba hodi subar iha fatin ruma tanba iha Agostu liubá, investigadór-sira halo notifikasaun hodi presta ona deklarasaun, tanba ida ne’e liga ho ema nia vida.

Família Matebian Ejize Justisa

Família matebian Renato Vieira de Araújo, hala’o konferénsia imprensa iha Kuluhun, 24 Setembru 2021. Foto/Hatutan.com.

Iha 24 Setembru 2021, família matebian ejize ba parte justisa atu aselera prosesu hodi fó pena ba suspeitu tuir lei ne’ebé vigora iha nasaun ne’e.

Matebian Renato Vieira de Araújo husik-hela kaben no oan na’in hitu.

Antes ne’e mós Diretór ezekutivu Fundasaun Mahein (FM), Joăo Almdeia, husu ba PSIK atu fó-sai rezultadu investigasaun hosi kazu hirak ne’ebé prosesa ho nia progresu sira, liuliu kazu asidente iha Kuluhun.

Dadus Investigasaun Kriminál

Totál prosesu ne’ebé PSIK halo hela investigasaun durante fulan Setembru hamutuk 71. Kazu sira-ne’e kompostu hosi delegasaun kompeténsia hosi Ministériu Públiku (MP), hamutuk 15, relatóriu interkalár iha 11, relatóriu finál haruka ba MP hamutuk 16, no prosesu ne’ebé tranzita ba iha Outubru 2021, ho totál 44.

Durante servisu iha pikete no prevensaun ka autu denunsia orál no auto notísia hahú hosi fulan Janeiru to’o Setembru 2021, PSIK simu kazu hamutuk 345.

Iha operasaun polisiál, PSIK rejísta kazu rua, kompostu hosi Flagrante Delito ba krime explorasaun ba jogu ilísitu no falsifikasaun dokumentu ho furtu agravadu.

PSIK mós ezekuta ona notifikasaun rua ba hala’o julgamentu iha Tribunál Distritál Suai (TDS) no Tribunál Distritál Dili (TDD).

Kona-bá ezame laboratoriál ba kazu sira, oras-ne’e, PSIK hala’o hela faze prosesu ezame ba (DNA) hamutuk lima, kazu balístiku rua mak oras-ne’e iha hela prosesu ezame laran, eskrita manuál rua entrega ona ba MP, ezame toxikolójia hamutuk haat iha hela prosesu, kazu haat kona-bá jogu ilísitu no furtu agravadu mak PSIK halo hela ezame iha lokál krime.

Jornalista: Rogério Cárceres