Hatutan.com, (16 Outubru 2021), Balibo-Jornalista Timoroan na’in tolu; Constâncio dos Santos Viera, Jonio da Costa ho Mariano Mendonça Benevides, sai manan na’in ba prémiu 2020 ho kategoria tolu ne’ebé atribui hosi Conselho de Imprensa (CI) Timor Leste.

Notísia iha Relasaun : “Luta foun” CI-Centro Chega! ho Autoridade Bobonaro atu Transforma Balibo Sidade Liberdade

Constâncio dos Santos Viera, jornalista hosi Rádiu Televizaun Timor Leste, Empreza Públiku   (RTTL, E.P) manan prémiu ho kategoria Greg Shackleton, Jonio da Costa, jornalista no fotógrafu Jornál Diáriu INDEPENDENTE manan prémiu Bernardino Guterres ho Mariano Mendonça Benevides hosi INDEPENDENTE manan prémiu Francisco Borja da Costa.

Jornalista na’in tolu ne’ebé manan premiu tuur hodi hasia foto hamutuk ho entidade sira hosi Governu, CI, CNC, autoridade sivil no militár ho eis Pr José Manuel Ramos-Horta. Foto/Hatutan.com

Prémiu ne’ebé Conselho de Imprensa de Timor Leste 2020 ne’e atribui iha ámbitu komemorasaun  trajédia Balibo Five ba dala-46 (16 Outubru 1975-16 Outubru 2021) iha Balibo, Munisípiu Bobonaro,  Sábadu kalan (16/10/2021).

Jornalista na’in tolu ne’e iha direitu ba prémiu ne’e hafoin submete sira-nia produtu jornalistiku hodi kompete iha prémiu  ho kategoria tolu ne’ebé oferese  kada tinan hosi Concelho Imprensa ba tinan 2020 nian.

Prémiu ho kategoria Greg  Shackleton,  kategoria Reportajen Jornalístiku ba Asuntu Interese Umanu di’ak-liu ba mídia eletróniku rádiu no televizaun, atribui ba Constâncio Vieira, jornalista RTTL, E.P

Prémiu Francisco Borja da Costa,  kategoria Reportajen Jornalístiku ba Asuntu Interese Umanu di’ak-liu ba mídia imprime no online. Atribui ba Mariano M. Benevides, jornalista Diáriu INDEPENDENTE.

Prémiu  Bernardino Guterres, kategoria Foto Jornalístiku diak-liu. Atribui ba Jonio da Costa, Jornalista Diáriu INDEPENDENTE.

CI la atribui prémiu Conselho de Imprensa, kauza pandemia COIVD-19 no Prémiu Adelino Gomes mós la atribui, tanba laiha aplikante.

Kompete ba prémiu Francisco Borja da Costa   hamutuk jornalista nain haat (4), maka hanesan jornalista Cristina Virginia Ximenes (INDEPENDENTE), Mariano Mendonça Benevides (INDEPENDENTE), Santina Lucia da Costa (Neon Metin), Francisco de Almeida (Neon Metin).

Kompete ba prémiu Greg  Shackleton hamutuk jornalista na’in tolu (3); Amito Araújo (RTTL,E.P), Aniceto Soares dos Reis (RTTL,E.P), ho Constancio dos Santos Viera hosi RTTL,E.P.

Prémiu Bernardino Guterres, kompete hosi jornalista no fotógrafu na’in rua (2); Jonio da Costa (INDEPENDENTE) ho Santina Lucia da Costa (Neon Metin).

Jornalista na’in tolu ne’ebé hetan prémiu atribui hosi Conselho de Imprensa ne’e liuhosi selesaun ida rigór tuir padraun no rekizitu Concelho de Imprensa nian ne’ebé ezekuta hosi ekipa juri kompostu hosi Expedito “Loro” Diaz Ximenes, hanesan prezidente nu’udar membru Conselho de Imprensa,  Otilio Ote (membru), Francisco Belo Simões da Costa (membru), no akademista na’in rua;  Xisto Viana (membru) peritu iha área Linguístika  ho mós  Dulce Martins da Silva, peritu iha área Komunikasaun Sosiál.

Manan nain prémiu  tolu ne’e iha direitu ba hetan osan ho valor $1.500 ba kada kategoria ho mós trofie Conselho de Imprensa no sertifikadu apresiasaun. 

Prémiu trofie, osan ho sertifikadu ba Jornalista Constâncio Viera entrega direita hosi Premiadu Nobel ba Pás nian, José Manuel Ramos-Horta.

Prémiu trofie, osan ho sertifikadu ba Jornalista  Mariano Mendonça Benevides, entrega direta hosi Ministru Prezidénsia Konsellu Ministru, Fidelis Manuel Leite Magalhães no prémiu trofie, osan ho sertifikadu ba Jornalista Jonio da Costa entrega hosi Sekretáriu Estadu Komunikasaun Sosiál, Mericio Juvinal dos Reis “Akara”.  

Ba manan na’in prémiu ba jornalista sira tinan 2020 nian ne’e, eis Prezidente Repúblika José Ramos-Horta, Ministru Fidelis Magalhães ho Sekretáriu Estadu Mericio Akara, hato’o kongratulasaun no votus susesu ba sira iha karreira no knar todan jornalizmu nian.

Jornalista : Vito Salvador