Hatutan.com, (16 Outubru 2021), Balibo –Conselho de Imprensa (CI) de Timor Leste, Centro Nacionál Chega, Institutu Públiku  (CNC,I.P) hamutuk ho autoridade lokál Munisípiu Bobonaro kompromete ona iha “luta foun” (advokasia) atu transforma Knua Naran Laek Balibo ba Sidade Liberdade.  

Notísia iha Relasaun : Trajédia Balibo Five iha Memoria

Konferensia Imprensa hodi deklara promove Balibo Sidade Liberdade. Foto/Hatutan.com

Liuhosi konferénsia imprensa konjunta hodi komemora trajédia Balibo Five ba dala-46 (16 Outubru 1975-2021) iha Balibo,  Prezidente CI, Virgílio da Silva Guterres, Diretor Ezekutivu CNC,I.P, Hugo Fernandes, ho estrutura tomak instituisaun rua ne’e nian proklama katak parte rua parseria ho autoridade Munisípiu Bobonaro no Postu Administrativu Balibo halo advokasia ba sekuénsia istóriku Balibo nian ba luta libertasaun nasionál, refleta ba dezenvolvimentu ne’ebé integradu ba Balibo iha futuru no refleta mós ba reportajen Greg Shackleton nian antes nia mate, hateten, “from unnamed village which will be remember in Portuguese Timor”.

Conselho de Imprensa, Centro Nacional Chega ho Autoridade Munisípiu no Autoridade lokál husi Balibo, husu atu bele konsidera Balibo ba sidade liberdade no rekomenda atu dekreta loron 16 fulan-Outubru nu’udar loron nasionál Liberdade Imprensa.

Atu alkansa objetivu rua iha leten, Conselho de Imprensa, Centro Nacional Chega hamutuk ho Autoridade Munisípiu no autoridade lokál Balibo nian sei hala’o asaun sira hanesan;

• Kontinua halo asaun konkreta ba oin hodi halo peskiza narrativa kona-bá sekuénsia konseitu Balibo Sidade Liberdade
• Halo advokasia no intensiva kampaña mídia
• Diálogu ho líder nasionál sira, partidu polítiku, autoridade munisípiu no autoridade lokál sira iha Balibo, lider komunitária no matek oan sira iha Balibo
• Halo sensibilizasaun ba populasaun Postu Balibo no Munisípiu Bobonaro, kona-ba konseitu ‘’Balibo Sidade Liberdade’’
• Halo rekomendasau ba Governu atu determina liuhusi dekretu ka rezolusaun governu nian
• Kontinua promove kultura diskusaun entre autoridade Munisípiu Baobonaro kona-ba konseitu dezenvolvimentu Bobonaro ne’ebé estratéjiku no sustentavel.

Trajédia Balibo Five ne’e rezulta jornalista Australianu na’in lima mate bainhira hala’o misaun lulik jornalizmu nian hodi tranzmite lia-loos kona-ba planu invazaun militar Indonézia nian mai iha Territóriu Nasionál Timor-Leste nian.  Jornalista hirak ne’e mak; Greg Shackleton, Gary Cunningham, Tony Stewart husi Channel 7 no. Reporter Malcolm Rennie no Brian Petersen husi Channel 9.

Atividade komemorasaun ne’e nu’udar parte ida husi programa anuál CI nian atu hanoin-hikas trajédia umana ne’ebé involve militár Indonézia iha tempu ne’ebá hodi konsensializa istória nakukun ne’e ba jerasaun foun Timor oan sira hanesan parte ida husi edukasaun sidadania kona-ba memória pasadu Timor-Leste nian ba libertasaun nasionál.

Prinsipalmente, atividade konjuntu esensiál ida husi CI no Centro Chega! ne’ebé realiza diálogu komunitária atu promove Balibo nu’udar “sidade liberdade” iha Timor-Leste no promove loron 16 Outubru nu’udar loron nasionál liberdade imprensa no liberdade espresaun nian nu’udar rekuñesimentu ida ba jornalista Australianu na’in lima no jornalista sira seluk ninia kontribuisaun ba Timor-Leste ninia independénsia liuhusi misaun jornalizmu.

Ho nune’e, CI no Centro Chega! iha 14 Outubru 2021 realiza ona dialogu komunitária hamutuk ho autoridade lokál Munisípiu Bobonaro, espesialmente ho autoridade lokál Postu Administrattivu Balibo. Dialogu ne’e partisipa husi reprezentante sira entidade hanesan veteranu, organizasaun estudantil rezisténsia, xefe suku sira no seluk-seluk tan.

Iha diálogu refere diskute sekuénsia istóriku sira ne’ebé atu transforma Balibo ba sidade liberdade. Sekuénsia istóriku hirak ne’ebé refleta Balibo nia historia pasadu ba luta libertasaun nasionál. Hahú husi forte Balibo, trajedia Balibo five, Deklarasaun Bolibo, invazaun 7 Dezembru no êxodos Setembru 1999.

Diálogu mos diskute elementu sira importante balu atu lori Balibo ba futuru hanesan sidade liberdade iha Timor – Leste. Elementu importante sira ne’ebé sei garante Balibo ba sidade futuru liberdade mak; Promove Balibo atu sai Sentru Turizmu istóriku, Promove Interkámbiu Sósiu Kulturál no polítika, Promove Interkámbiu Ekonomia no Promove estabilidade seguransa iha fronteira.

Jornalista : Vito Salvador