Hatutan.com, (22 Fevereiru 2023), Díli- As Marka FC iha ambisaun forte hakarak rekolla pontu tolu dahuluk iha jogu abertura liga Timorense segunda divizaun époka 2022-2023 kontra Santa Cruz FC.

Lee Mós : Assalam FC Rekolla Pontu Tolu Dahuluk Iha Liga Timorense époka 2022-2023

Treinadór As Marka FC Octávio da Silva, kaer liman ho treinadór Santa Cruz FC Moisés da Silva,
iha konferénsia imprensa ne’ebé hala’o iha sede LFTL, estádiu Munisipál Díli, Kuarta (22/02/2023). Foto/Vito Salvadór

Treinadór As Marka FC,  Octávio da Costa Alves Soares hateten klubu As Marka FC preparadu no prontu para Kompete iha Liga Timorense segunda divizaun époka 2022-2023. Iha jogu abetura kontra Santa Cruz FC iha segunda divizaun époka 2022-2023 As Marka FC iha ambisaun atu rekolla pontu tolu.

Nia afirma Ekipa As Marka FC preparadu no protu atu rekolla pontu tolu iha jogu abertura, maibé iha jogu 90 minutus mak sei determina se mak merese atu hetan vitória, maske nune’e As Marka FC preparadu hasoru adversáriu Santa Cruz FC.

“Kualker jogu ne’ebé As Marka FC hasoru ne’e hanesan final ba ami, ida ne’e atu motiva ami nia Jogadór sira para iha ânimu diak atu kompete ho klubu se de’it,” Octávio da Costa Alves Soares hateten bá jornalista sira liuhosi konferénsia imprensa ne’ebé halao iha sede LFTL, estádiu Munisipál Díli, Kuarta (22/02/2023).

Treinadór ne’e hatutan atu realiza ambisaun ne’ebé Klubu As Marka FC iha ba liga Timorense époka 2022-2023, As Marka FC halo mos Kontratu ho Jogadór estranjeiru hamutuk nain tolu husi Indonézia, provinsia Nusa Tenggara Timur (NTT), atu reforsa As Marka FC iha Guarda Rede, Defeza no mos Avansadu.

Nia argumenta Jogadór estranjeiru ne’ebé iha sei tun hanesan starting line up no garante sei hatudu jogu diak atu bele fo kontribuisaun máximu ba As Marka FC durante joga hasoru adversáriu sira.

“Sira nain tolu ne’e iha starting line up hotu kedas tamba klubu presija tebes sira para atu reforsa liutan ho alun Jogadór nasional sira ne’ebé As Marka FC iha,” Nia subliña.

Treinadór Santa Cruz FC, Moisés da Silva hateten kona-bá preparasaun bá jogu kontra As Marka FC iha abertura segunda divizaun Liga Timorense époka 2022-2023, Santa Cruz FC halo ona maske ho tempu badak nia laran.

“Há’u iha konfiasa katak há’u nia Jogadór hotu-hotu peontu para atu joga aban hasoru As Marka FC.” Hateten Moisés da Silva.

Eis treinadór Sporting Klubu de Timor ne’e hatutan Jogadór Santa Cruz FC hotu iha kondisaun fit kuaze 90 % atu joga iha abertura segunda divizaun.

Nia argumenta iha jogu treinadór no Jogadór hotu-hotu iha hakarak atu manan tamba ne’e husik ba iha jogu 90 minutos mak determina.

Santa Cruz FC mos sei reforsa husi jogadór estranjeiru ida husi Costa deMarfim ka Pantai Gading.

Tuir oráriu ekipa As Marka FC no Santa Cruz FC sei joga, Kinta (23/02/2023), iha Estádiu Munisipál Díli, hale’u tuku 16:00 OTL.

Jornalista: Vito Salvadór