Hatutan.com, (29 Outubru 2021), Dili—Fiskalizadór hosi intituisaun Estadu nu’udár ekipa integradu ida ne’ebé kompostu hosi Komisaun Anti Korrupasaun (KAK), Polísia Nasionál Timor-Leste (PNTL) Tránzitu, Inspesaun Jerál Estadu (IJE), Diresaun Nasionál Transporte Terrestre (DNTT),  Patrimóniu Estadu, Provedoria Direitu Humanu no Justisa (PDHJ) no Komisaun Funsaun Públika (KFP) sei halo operasaun, inspesaun no monitorizasaun ba viatura Estadu ne’ebé funsionáriu Estadu uza ba foho iha loron feriadu (finadu).

Formatura dadeer iha Komandu Jerál PNTL, Kuartél PNTL, 13 Outubru 2021. Foto/PNTL.

Ekipa konjunta fó-sai ona deklarasaun hodi apela ba públiku ho atu  devér morál atu halo kontrolu ba movimentu viatura Estadu durante finadu.

“Públiku iha devér atu halo kontrolu ba movimentu viatura Estadu liu hosi hasai foto no halo video, nune’e bele hato’o ba parte kompetente ka bele publika iha média sosiál, nune’e autoridade sira bele halo prosesu,” deklarasaun konjunta hosi ekipa fiskalizadór.

Deklarasaun ne’e mós fó ona ultimatum katak, hahú hosi Sesta 29 Outubru 2021, tuku 17:00 otl, viatura Estadu nian hanesan karreta ho motór sei lori hotu ba destaka iha ministériu ka sukursál ida-idak no la autoriza atu pesoál funsionáriu públiku lori ba munisípiu no ministériu relevante ne’ebé iha nesesidade servisu, atu halo dezlokasaun ba munisípiu tenke hetan autorizasaun hosi superiór.

Alende ne’e, responsável lojístika iha kada ministériu atu halo kontrolu ba viatura ne’ebé iha no fo xamada atu utilizadór sira kumpre.

Utilizadór sira ne’ebé la kumpre xamada ne’e, responsável lojístika iha kada ministériu ka Sekretáriu Estadu tenke informa ba ekipa fiskalizasaun konjunta.

Sei autoriza de’it utilizasaun ba viatura Estadu ba autoridade seguransa, defeza, saúde, bombeiru, ambulánsia no ekipa hirak ne’ebé responde ba nesesidade urjente hanesan dezastre naturál no asisténsia umanitária.

Atu garante servisu fiskalizasaun ne’e la’o ho susesu, ekipa konjunta sei servisu hamutuk ho polísia tránzitu iha kada munisípiu hodi halo kontrolu ba viatura Estadu.

Ekipa fiskalizasaun konjunta mós sei halo vizita supreza ba iha ministériu no sekretáriu Estadu sira hodi konfirma implementasaun xamada ida-ne’e.

Ba utilizadór sira ne’ebé mak la kumpre xamada ida-ne’e, sei hetan prosesu administrativu, disiplinár no kriminál.

Diretór Jerál Patrimóniu Estadu hosi Ministériu Finansa, Januário da Gama, hateten ekipa konjunta ida-ne’e estabelese desde tinan kotuk, no oras-ne’e atu selebra loron boot finadu, nune’e hahú iha Sesta (29/10) to’o Kuarta (03/11) ekipa konjunta sei halo kontrolu ba movimentu viatura Estadu iha territóriu nasionál liu hosi koordenasaun servisu ho PNTL unidade Tranzitu iha munisipiu sanulu resin rua inklui Rejiaun Administrativu Espesiál Oe-cusse Amebeno (RAEOA).

“Kontrolu ne’e ita halo iha nasionál, kapitál munisípiu sei ba to’o iha postu administrative-sira,” Januário da Gama, hateten.

Nune’e mós Komandante Tránzitu munisípiu Díli, Inspetór Xefe Polísia, Domingos Sarmento Gama, via telefónika, Sesta (29/10/21),  hateten pasa revista iha Dili laran sei kontinua la’o durante selebrasaun loron matebian atu bele asegura movimentu veíklu sira, liuliu halo kontrolu ba sirkulasaun veíkulu Estadu.

Jornalista: Vito Salvadór