Hatutan.com, (05 Novembru 2021), Dili—Komandu Polísia Nasionál Timor-Leste (PNTL), aloka ona verba orsamentu ida ho montante rihun $100-resin, iha Orsamentu Jerál Estadu (OJE) 2022 nian, atu bele halo manutensaun ba ró Unidade Polísia Marítima (UPM) ne’ebé kondisaun avaria hela no prejudika operasaun iha área tasi Timor.

Superintendente Xefe Polísia, José Soares. Foto/Hatutan.com.

“Ita koloka mós  verba iha ne’eba atu bele responde. Bainhira ita nia ró ne’e ita labele halo manutensaun, ita bele aluga. Dalaruma iha Marsu ka Abril orsamentu seidauk pasa. Entaun, ita seidauk bele halo manutensaun. Entaun, ita bele aluga speed boat, ho fasilidade ne’ebé mak ita iha, atu responde situasaun iha tinan oin,” Superintendente Xefe Polísia, José Soares, hateten hafoin audiénsia ho Komisaun B, iha Parlamentu Nasionál (PN) Sesta (05/11/21).

Notísia iha Relasaun: UPM La Hala’o Operasaun Durante Fulan Haat

Antes ne’e, Komandante UPM, Superintendente Polísia, Basílio de Jesus, preokupa tanba durante tinan ida resin, la hala’o operasaun rutina iha área tasi-nian hodi kontrola rikusoin TL, tanba ró boot sira maioria avaria ka kondisaun aat hotu no oras ne’e paradu.

Advertisement

Adisionál Millaun $5

Proposta OJE 2022 ne’ebé Governu aloka ba instituisaun seguransa PNTL, ho montante millaun $28-resin, maibé, montante ne’e la sufisiente ba komandu PNTL atu responde nesesidade sira iha atividade operasionál.

Nune’e, komandu PNTL liuhosi administrasaun jerál, propoin tán orsamentu adisionál hamutuk milliaun $5.

Superintendente Xefe Polísia, José Soares haktuir, orsamentu ne’ebé atribui hosi Komisaun Revizaun Orsamentu no Politika (KROP), ba PNTL, hamutuk millaun $28-resin.

Ho orsamentu ida-ne’e la kobre servisu operasionál iha terrenu, tanba iha 2022, sei hasoru eleisaun prezidénsial, presija apoia ekipamentu ne’ebé adekuadu ba PNTL atu bele responde ba situasaun ida ne’e.

Advertisement

Tanba ne’e, PNTL propoin tán orsamentu adisionál millaun $5 atu bele kobre despezas iha 2022 nian.

Prioridade hosi OJE 2022 ne’ebé aloka ba PNTL, sei hatán ba difikuldade sira ne’ebé durante ne’e hasoru iha terrenu mak hanesan, transporte, viatura operasionál, motorizada, ekipamentu komunikasaun, Information and Technologi (IT), kondisaun traballu, nomós nesesidade seluk tán.

PNTL rasik akomoda membru hamutuk 4.090, tanba ida-ne’e nesesidade operasionál ejize duni ekipamentu polisial, lojistika, infraestrutura di’ak, nune’e bele ho ekipamentu ne’ebé mak di’ak, hodi bele garante eleisaun prezidénsial no parlamentár iha tinan 2022-2023 bele la’o ho seguru.

“Ita espera katak, orsamentu ida-ne’e bele pasa, tanba atu bele responde ba situasaun operasionál iha terrenu,” Komandante José Soares hateten.

Kona-bá karreta operasionál ba PNTL, hahú kedas iha tinan 2012 to’o 2021, komandu rasik sempre tau orsamentu hodi sosa tán karreta ho fazeadamente.

Advertisement

Maibé, kareta sira ne’e seidauk to’o no seidauk bele kobre ba to’o iha eskuadra 65 iha territóriu nasionál TL.

Iha mós karreta operasionál balun mak kondisaun aat ona, tanba halo servisu loro-loron durante oras 24.

Tanba ne’e maka, OJE 2022 komandu planeia atu sosa tán karreta hamutuk unidade 22 atu responde ba servisu operasionál no bele distribui ba eskuadra sira iha terrenu.

Kona-bá progresu ezekusaun OJE 2021 nian, oras ne’e atinje ona 74%, ne’ebé prioritiza ba saláriu, bens no servisu, ho kapitál menór.

Jornalista: Rogério Cárceres

Advertisement