Hatutan.com, (07 Novembru 2021), Díli–Tribunál Distritál Díli (TDD),  liuhusi primeiru interrogatóriu, Domingu (07/11/2021), aplika medida koasaun Proibisaun ba Auzénsia  ka bandu labele sai ba rai-li’ur ba eis Prezidente Komisaun Funsaun Publika (KFP), Liborio Pereira. 

Ministériu Públiku akuza Arguidu Liborio Pereira komete ba krime partisipasaun ekonomika no negósiu ne’ebé deskonfia atu halai ses husi prosesu investigasaun ne’ebé lao hela.

Tribunál mós valida auto apreensaun husi Polísia hanesan pasaporte no dokumentu sira seluk Liborio Pereira nian. Razaun Tribunál aplika medida koasaun ne’e hodi asegura arguidu nia prezensa durante prosesu investigasaun.

Tuir Defensor Públiku husi arguidu la aseita ho medida koasaun ne’ebé Tribunál aplika ba nia kliente, tanba la hare ba finalidade no objetividade.

“Iha tempu badak ha’u sei halo rekursu hodi kontra medida koasaun ne’e, tanba desizaun ne’e la haree ba finalidade no objetividade husi medida koasaun. Hakarak limita de’it ema nia movimentasaun,” Defensor Públiku Sergio Quintas ba Hatutan.com iha TDD.

Arguidu rasik husi parte Polísia Servisu Investigasaun Kriminal (SIK)  kaptura no detein iha loron 6 fulan-novembru ne’e, iha Aeroporto Internasionál Prezidente Nicolau Lobato bainhira atu hala’o viajen ba rai-li’ur.

Audiénsia julgamentu ba primeiru interrogatóriu ne’e, prezide husi Juiza singular Ana Paula Fonseca, MP reprezenta husi Prokuradóra Lidia Soares no arguidu hetan asisténsia legal husi Defensor Públiku Sergio Quintas.

Lamenta ho Atuasaun  SIK 

Defensor Públiku, Sergio Quintas ne’ebé fó asisténsia legál ba Liborio Pereira lamenta no triste ho atuasaun SIK nian ba nia kliente  iha Aeroportu ba nia kliente Liborio, tanba konsidera SIK halo manobra ba kapturasaun fragante de leitu.

“Polísia halo manobra hodi hatudu ba públiku katak arguidu ne’e fragante de leitu, maibé la’ós fragante de leitu, tanba Liborio kumpre desizaun Tribunál liuhusi Servisu Migrasaun katak nia labele sai husi Timor tanba ne’e Liborio mós atu sai husi Aeroportu hodi fila ba uma, maibé Polísia ne’ebé orientada ona hodi fó fali informasaun falsu katak bele hein iha ne’e tanba problema sei ko’alia iha nivel as, maibé ne’e hanesan razaun hodi kaer-metin Liborio iha Aeroportu durante horas tolu nia laran no iha horas aviaun semo SIK tun diretamente kaer nia hodi dehan fragante de leitu, tanba bainhira hakarak kaer la presiza hein horas tolu nia-laran,” Sergio Quintas.

Jornalista: Carmelita Isaac