Hatutan.com, (10 Novembru 2021), Díli—Membru Komité Ezekutivu (Exco) hamutuk ho prezidente asosiasaun futeból 14 iha Federasaun Futeból Timor-Leste organiza malu ona, atu iha tempu badak ne’e, realiza  enkontru urjente ida hodi foti desizaun ba kazu prezidente FFTL, Francisco da Costa Jeronimo nian.

Notísia iha Relasaun : PNSIK Arrola Ona Kazu Prezidente FFTL Maibé Seidauk Bele Pronunsia ba Públiku

Karreta Nisan numeru matrikula 22.765 ne’ebé família prezidente FFTL nian hosi Liquiça baku-rahun iha resintu FFTL nian iha Domingu (07/11/2021), tuku 06:00 dadeer. Foto/Espesiál

Iha Domingu (07/11/2021), purvolta tuku  06:00 Otl, mosu insidente ida iha resintu FFTL nian, bainhira prezidente FFTL, Francisco Jeronimo nia família hosi Liquiça, halo asalta hasoru Francisco Jeronimo ho funsionária FFTL ida ne’ebé rezulta karreta ho marka Nisan koor metan no xapa matrikula 22.765 Tls, rahun. Karreta ne’e nain maka funsionária ezekutiva FFTL ne’e nian.   

Insidente ne’e mosu tanba família sira deskonfia prezidente FFTL, Francisco Jeronimo “subar” amante iha FFTL. Maske nune’e, liu tiha loron balun, Francisco Jeronimo halo kedas aproximasaun ho família, liuliu fen ho oan-sira no funsionária ezekutiva FFTL nian ne’e  atu rezolve kazu ne’e tuir dalan família nian.  

Hatutan.com, Kuarta (10/11/2021), halo esforsu atu halo entrevista hosi membru Exco FFTL, Teresinha Viegas, maibé nia dezmente atu fó komentáriu kona-ba situasaun ida-ne’e.

Liuhosi telefónika no ba hasoru direita mós ho Sekretáriu Jerál FFTL, Nelio Isaac Sarmento, atu halo entrevista kona-ba pozisaun FFTL nian ba kazu ne’e, maibé Nelio Isaac rasik lia-tun dehan, nia labele fó komentáriu tanba kompeténsia tomak iha Exco sira ne’ebé lidera hosi Prezidente FFTL, Francisco Jeronimo.

Informasaun seluk ne’ebé Hatutan.com halibur hosi fontes oioin iha FFTL hateten, membru Exco sira hamutuk ho prezidente asosiasaun futeból  14 hosi munisípiu hotu, maka bele foti desizaun ba situasaun prezidente FFTL nian liuhosi enkontru ka reuniaun Exco nian.

Tuir estatutu FFTL nian iha Artigu 38 hateten membru ezekutivu sira maioria (porsentu 50 husi total membru) bele halo pedidu reuniaun atu bele buka solusaun ba kualkér situasaun iha FFTL.

Bazeia ba rejimentu no estatutu FFTL nian, membru ezekutivu sira haruka ona karta pedidu antes ne’e ba prezidente atu halo enkontru urjente hodi hadi’a naksalak sira iha Federasaun nian laran. Karta ne’ebé Exco sira halo dahuluk laiha resposta no Presidente FFTL foin fó resposta ba pedidu daruak hodi halo enkontru iha Sábadu (6/11/2021).

Informasaun hosi fontes Hatutan.com iha FFTL informa katak oobjetivu husi sorumutuk ne’e membru ezekutivu ko’alia kona-ba asuntu espulsa (pemecatan) ba funsionária ezekutiva  ida ne’ebé ho intensaun halo insulta no falta respeita ba ierarkia FFTL tamba nia ho liafuan maka’as hatete aat nia xefe.

“Hafoin enkontru ne’e remata Presidente FFTL laiha desizaun ruma relasiona ho pedidu hosi membru Exco sira atu espulsa funsionária ne’e. Prezidente  FFTL la preokupa no dezliga ho desizaun membru Exco nian,” fontes ne’e hateten.

Informasaun seluk katak daudaun ne’e iha ona membru Exco sira hamutuk ho prezidente asosiasaun futeból 14, kompostu hosi 12 hosi munisípiu no rua (2) hosi Díli (Díli Leste ho Díli Oeste) atu organiza enkontru hodi foti desizaun ba kazu prezidente FFTL nian.

Hatutan.com mós esforsu atu halo entrevista ho Francisco Jeronimo nia espoza iha Liquiça via telefonika maibé liga ba numeru telefone privadu (7729****) dala-10 resin, maibé la foti no taka tiha deit. 

Hosi sorin seluk, tuir publikasaun iha mídia nasionál sira, katak hosi insidente ne’e prezidente FFTL, Francisco Jeronimo,  rezigna aan ona nu’udar membru Commite Central FRETILIN (CCF) atu konsentra ba rezolve nia kazu família ne’e.  

Notísia iha Relasaun : Deskonfia, Ezekutivu FFTL Balun Subar Amante

Jornalista : Vito Salvador