Hatutan.com, (11 Novembru 2021), Dili— Prosesu reabilitasaun ba Aeroportu iha Munisípiu Baucau hosi forsa Estadu Unidu Amérika (EUA) nian, sira fó de’it apoiu, maibé na’in mak povu Timor-Leste (TL).

Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Lere Anan Timur, fó-sai asuntu ne’e hodi hatán ba op

Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lera Anan Timur. Foto/Hatutan.com

iniaun ne’ebé durante mosu iha públiku entre pró ho kontra, katak bainhira Estadu TL loke duni dalan ba Governu EUA hodi rehabilita Aéroportu Baucau, maka iha posibilidade boot, forsa Amerikanu sira sei hari’i sira nia baze militár iha TL.

Durante halo sorumutuk ho Asistente Adjunta Ministra Defeza EUA ba Ázia Súl no Sudeste Aziátiku, Lindsey W. Ford, Lere Anan Timur, espresa katak, inisiativa halo rehabilitasaun ba Aeroportu ne’e, nu’udár kooperasaun téknika militár entre forsa hosi nasaun nian. 

Tanba ne’e, Governu EUA fasilita de’it apoiu hodi halo rehabilitasaun, maibé na’in maka povu TL, no sei deside rasik destinu utilizasaun ba Aeroportu ne’e.

“Ha’u dehan katak, Aeroportu ne’e bazeia ba ita nia kooperasaun tékniku militár. Ita-boot mai ajuda, la’os imi sai na’in ba Aeroportu. Na’in ne’e ami, ami Timor, ami maka na’in,” Lere Anan Timur hateten ba jornalista sira, hafoin sorumutuk ho Lindsey W. Ford, iha Kuartál Jenerál, Fatuhada, Kinta (11/11/21).

Tuir Lere, bainhira prosesu rehabilitasaun Aeroportu ne’e remata ona, sei entrega ba TL, hodi fó nia destinu ba aeroportu saida, sivíl ka, militár, ekonómiku ka komersiál, depende ba Estadu ho Governu TL maka sei deside.

“Tanba demokrasia, ita ida-idak koalia ninian, hanoin ninian, mas primeiru ita tenke konfia ema, no konfia ita nia aan. Ita tenke hatene katak, ha’u maka rai na’in, uma-na’in, kuandu hakarak fó mak, fó. La fó, la fó. To’o mate de’it, hanesan uluk ita ukun-aan mós funu mós hanesan ne’e. Ita nia konseitu ne’ebé mak mate ka moris ukun-rasik aan,” nia hatutan.

Nia fó ezemplu katak, Indonézia uluk bele halo buat hotu-hotu, maibé mate ka moris ukun-rasik aan.

Hanesan mós oras ne’e, Timor, nasaun soberana, rai ki’ik, foin mak hari’i, maibé soberania ne’e la sukat.

Asistente Adjunta Ministra Defeza EUA bá Ázia Súl no Sudeste Aziátiku, Lindsey W. Ford, esplika, vizita ne’e bazeia ba parseria seguransa ne’ebé aumenta ba bebeik entre EUA no TL, liu-liu komitmentu Governu EUA nian ho milliaun $10, atu rehabilita hamutuk ho Governu TL nia Aeroportu iha Baucau.

Iha vizita ne’e, Lindsey W. Ford, fornese mós ekipamentu protesaun pesoál adisionál hosi Forsa Aerea Pasífika EUA nian ba TL, hodi ajuda hakotu pandemia global COVID-19, mitigasaun ba ema no sosiedade sira, no hametin kooperasaun.

Governu EUA servisu hamutuk ho TL dezde inísiu pandemia, hodi fornese vasina Pfizer doze 100,620, besik milliaun $5.9 iha asisténsia krítika hodi kombate COVID-19.

Orsamentu ida ne’e, inklui fundu milliaun $2.3 hosi Komandu Indo-Pasífiku Estadus Unidus no Ajénsia Estadus Unidus ba Dezenvolvimentu Internasionál (USAID), atu hari’i fasilidade izolamentu iha Baucau, unidade kuidadu móvel iha Dili, no hadi’ak fornesimentu bee no saneamentu iha sentru kuarentena iha Batugade.

Apoiu Governu EUA nian ne’e, parte ida hosi milliaun $250 ne’ebé USAID kontribui ona apoia dezenvolvimentu inkluzivu no pasífiku iha TL dezde 2002.

EUA mós halo ona ezersísiu militár anuál dala-tolu ho F-FDTL no haruka mós membru F-FDTL barak ba estuda iha EUA hodi hari’i no rehabilita ona klinika no eskola liu 100 iha TL. Projetu sira ne’e ho milliaun $50 durante tinan 10.

Jornalista: Rogério Pereira Cárceres