Hatutan.com, (15 Novembru 2021), Díli–Tribunál Distritál Díli (TDD) liuhusi leitura akórdaun, Segunda (15/11/2021), aplika pena prizaun tinan ida fulan neen no suspende tinan rua ba arguidu Alexandrino do Santos tanba komete krime koasaun sexual hasoru lezada AC nu’udar asistente doméstika iha arguidu nia uma.

Ilustrasaun kazu krime koasaun sexual. Foto/Espesiál

Tribunál esplika, arguidu la ba prizaun maibé durante pena suspensaun tinan rua nia laran, arguidu labele komete krime ruma, enkuantu arguidu komete mak nia sei ba tama prizaun tinan ida fulan neen.

Razaun Tribunál aplika pena ne’e tanba konsidera faktu provadu, maske arguidu nega, maibé Tribunál konsidera lezada nia konviksaun katak arguidu utiliza nia forsa hodi tenta no konsege komete krime ne’e hodi obriga rei lezada AC.

Provadu mós katak, lezada servisu iha arguidu nia uma hanesan asistente doméstika  hodi tau matan ba arguidu nia oan.

Antes ne’e, tuir akuzasaun husi MP katak iha loron 25 fulan-Outubru tinan 2019 lezada AC hanesan asistente doméstika ne’ebé tau matan ba arguidu nia oan, maibé purvolta  tuku 11:00 loron, arguidu nia oan tanis, nune’e arguidu haruka lezada tama ba kuartu hodi foti labarik, Maibé arguidu tuir lezada hodi hakuak no rei lezada dala ida. nune’e lezada hakilar hodi halai sai ba li’ur hein arguidu nia fen hodi konta arguidu nia hahalok ne’e.

Ho hahalok arguidu nian, MP akuza arguidu ba krime koasaun sexual ne’ebé previstu iha artigu 171 husi kódigu penál Timor-Leste.

Audiénsia julgamentu prezide husi juiz koletivu Ana Paula, Ivan, Maria Solana, MP reprezenta husi prokuradór Hipolito Santa no arguidu hetan asisténsia legal husi Defensor Públiku Jonas Henrique.

Jornalista : Carmelita Isaac