Hatutan.com, (23 Novembru 2021), Díli-Ministru Transporte no Komunikasaun (MTK), José Agostinho, garante katak, kazu internet ilegál ne’ebé ninia prosesu investigasaun la’o hela iha Ministériu Públiku (MP) sei la prejudika lisensa ne’ebé Governu atribui ba operadór telekomunikasaun sira-ne’e.  

PNSIK halo detensaun ba prezidente ANC, João Olivio Freitas, iha loron 26 fulan-Novembru 2020. Foto/Dok.Espesiál

Iha entrada fulan-Novembru 2020 nian, Polísia Nasionál Investigasaun Kriminál  (PNSIK) lansa operasaun ida iha Díli no munisípiu hodi detein jestór prinsipál sira operadór telekomunikasaun sira nian, hanesan Guardamor,  Jestór prinsipál iha Telemor,  Metrolink, Elite Computer, kompañia R2M IT Solution no seluk tan, tanba deskonfia halo ligasaun internet ilegál iha Timor-Leste.  

Jestór ba empreza telekomunikasaun hirak-ne’e  balun detein iha sela Polísia durante oras 24 nia laran hodi submete ba investigasaun tempu ne’ebá, no balun hetan Termu Identidade Rezidénsia (TIR) iha primeiru interrogatóriu iha Tribunál Distritál Díli (TDD).

Maske prosesu investigasaun iha Ministériu Publiku  la’o hela, Governu liuhosi Autoridade Nasionál Komunikasaun (ANC-sigla Portugés) ne’ebé tutela ba Ministériu Transporte no Komunikasaun (MTK) atribui ona sertifikadu lisensa operasaun ba empreza hirak-ne’e.

Ministru MTK, José Agostinho, argumenta katak Governu nafatin fó apoiu ba prosesu legal ne’ebé lao hela, maibé funsionamentu Estadu labele para.

“Asaun prosesu investigasaun nafatin la’o, maibé funsionamentu Estadu la depende ba problema ne’e rezolve lai mak foin bele funsiona, karik iha ema ruma komete irregularidade ne’e ema mak ba hatán mas funsionamentu Estadu tenke la’o nafatin,” Ministru José Agostinho hatan ba Hatutan.com hafoin enkontru ho Primeiru-Ministru (PM), Taur Matan Ruak, iha Palaçio do Governo, Tersa (23/11/2021).

Nia tenik, bainhira hetan ona atribuisaun sertifikadu husi ANC iha devér halo operasaun hodi atende kliente hodi kumpre devér ba kofre Estadu, maibé la taka-dalan ba asaun krime ne’ebé komete, tanba prosesu justisa tenke la’o nafatin. 

Ministru MTK, José Agostinho. Foto/Mídia MTK

Molok ne’e, iha loron 17 Janeiru 2021, jerente  prinsipál na’in-rua hosi empreza nasionál Guardamor ho inisiál EBS no  Metrolink  ho inisiál JJDRC, partisipa iha julgamentu primeira interrogatóriu iha Tribunál Distritál Díli (TDD) hodi kumpre ba mandadu detensaun hosi TDD ho númeru NUC.0166/20/PNSIK.

Jerente  prinsipál Guardamor no Metrolink ne’e submete ba primeiru interrogatóriu iha TDD hafoin detein iha sela polísia durante oras 72 nia laran, hanesan detidu ba kazu ne’ebé deskonfia involve iha fornesimentu internet ilegál. 

Liuhusi desizaun primeira interrogatóriu iha Tribunál Díli ne’e, aplika Termu Identidade Rezidénsia (TIR) jerál ba  jerente prinsipál na’in-rua hosi kompañia Guardamor ho inisiál EBS no Metrolink ho inisiál JJDRC.

Liuhosi primeiru interrogatóriu, iha loron 28 fulan-Novembru 2020, iha TDD aplika mós medida koasaun  prizaun preventiva ba jestór prinsipál  operadór telekomunikasaun Telemor ho inisiál TVB no jestór prinsipál Elite Computer ho inisiál DP.

Husi kazu ne’e mós, iha loron 26 fulan-Novembru 2020, PNSIK mós ezekuta mandadu detesaun husi Tribunál Distritál Díli,   ba Prezidente ANC, João Olivio Freitas, no halo apreensaun mós ba evidénsia karreta privadu ida hosi Prezidente ANC nian ne’e rasik.   

Jornalista: Carmelita Isaac