Hatutan.com, (29 Novembru 2021), Díli-Polísia Nasionál Timor-Leste (PNTL) liuhusi Komandu Munisípiu Díli detein  estudante na’in-lima ne’ebé deskonfia nu’udar autór ba kazu asalta-malu iha arredores Eskola Sekundáriu Jerál 4 Setembru, UNAMET, Díli no konfrontu iha ESJ Nobel da Paz, Becora, Díli.

Komandante PNTL Munisípiu Dili, Superintendente Xefe Henrique da Costa. Foto/ Hatutan.com

Komandante PNTL Munisipiu Dili, Superintendente Xefe Polísia, Henrique da Costa, informa, autór na’in-lima ne’e, ida PNTL kaptura iha área Becora, no na’in-haat seluk, kaptura iha área Vera Cruz.

Prosesu kapturasaun ne’e, akontese liuhosi atividade patrullamentu ne’ebé hala’o hosi Polísia Eskuadra Cristo Rei no Vera Cruz, hodi buka tuir autór sira.

Iha loron hirak liubá mosu mós kazu insidente ne’ebé mak involve hosi 04 Setembru, UNAMET, Dili, iha Matadouro, no mós iha eskola Novel da Paz, inklui iha Becora nian.

“Ida iha Becora ninian, ita nia patrulla kaptura autór na’in-ida, lori ba iha edifísiu hodi halo prosesu, ne’ebé maka involve mós ita nian profesór ida hetan kanek. Depois iha área Vera Cruz ninian, ne’ebé maka akontese iha Sesta (26/11/2021), ita-nia patrulla Vera Cruz no mós forsa rezerva atende no kaptura autór na’in-haat ne’ebé mak lori mai iha eskuadra Vera Cruz ninian, hodi hala’o prosesu,” Komandante PNTL Munisípiu Díli, Superintendente Xefe Polísia, Henrique da Costa, informa ba jornalista sira iha kna’ar fatin Caicoli, Díli, Segunda (29/11/2021).

Iha loron hirak liubá mosu mós insidente ne’ebé hanesan, mosu iha área Dom Aleixo nian, maibé polísia responde kedas ho rápida. Medida ne’ebé mak Komandu Díli halo maka, komunika kedas ho parte estrutura eskola sira, atu nune’e, sira mós bele fó solusaun ruma ba insidente ne’ebé mosu iha eskola.

Komandu Díli, fó ona orientasaun ba iha membru sira ne’ebé destakadu iha kada eskola hanesan Ofisiál Polísia Eskola (OPE), maske eskola balu seidauk iha, maibé sira nia patrulla sempre kobre.

Komandante Henrique, husu ba estudante sira atu aproveita oportunidade ho didi’ak hodi eskola, labele lori problema uma nian ba kahur iha aredór eskola nian.

Jornalista: Rogério Cárceres