Hatutan.com (06 Dezembru 2021), Dili—Academica FC ho nia adversáriu Emanuel FC sei hasoru malu iha finál segunda divizaun époka ne’e, hafoin sai kampiaun ba grupu A no B iha jogu segunda divizaun ne’ebé hala’o durante ne’e iha estádiu Dili no kampu demokrasia Bairro dos Grilhos.

Treinadór Academica FC Luisino dos Santos ho kapitaun. Foto/Hatutan.com.

Ekipa rua durante enfrenta jogu Liga Futeból Timor Leste (LFTL) segunda divizaun, hatudu jogu ida diferente.

Notísia iha Relasaun:Makikit Laulara no As Ponta Leste Fahe Pontu iha Jornada Da-haat LFTL

Academica FC dala barak liu hala’o jogu hosi kotuk ho tensi badak no defensive, enkuantu adversáriu Emanuel FC, hatudu jogu ida ofensivu no iha kombinasaun di’ak entre liña hahú hosi defeza to’o avansadu no kuandu lakon bola, médiu sira buka halo kedan balansu ba adversáriu hodi hamate bola.

Treinadór Academica FC Luisino dos Santos hateten, ékipa ne’e fiar an sei hala’o jogu aban Tersa (07/12/2021) ho di’ak tanba iha preparasaun ida di’ak.

“Ami fiar an sei manan jogu ne’e maske ekipa adversáriu iha ofensidade makás atu halo atake. Ami iha estratejia rasik atu manán jogu ne’e no ami garante sei manan duni,” Teinadór Academica FC, Luisino dos Santos iha sede LFTL Bairro dos Grilhos Dili, Segunda (06/12/21).

Treinadór ne’e salienta liután katak, sei esforsu makás no halo jogu ida defensivu ho estratejia ne’ebé iha hodi bele manán jogu atu bele hetan títulu kampiaun.

Treinadór Emanuel FC, Emiliano Ribeiro ho Kapitaun. Foto/Hatutan.com.

Iha fatin hanesan, treinadór Emanuel FC, Emiliano Ribeiro hateten, Emanuel FC preparadu atu enfrenta jogu finál hasoru adversáriu hodi hadau-malu títulu kampiaun.

“Academica FC ekipa boot, tanba ne’e ami iha preparasaun máximu iha parte hotu hanesan táktika, fíziku no mós estratejia oinsa bele asegura pontus no hetan kampiaun,” nia hateten.

Eis treinadór Academica FC ne’e sempre fó motivasaun extra ba nia jogadór sira atu hakás an no halo esforsu tomak hodi marka istória ba an rasik no mós klubu.

Treinadór foinsa’e ne’e dehan, ekipa hotu iha ambisaun atu manán iha kada jogu, maibé minutu 90 mak determina se mak di’ak liu no merese ba vitória.

Ekipa rua hakat ba finál hafoin rekolla pontu barak liu iha kada grupu. Academica FC rekolla pontu 10 hosi jogu haat, manan tolu no impata ida.

Emanuel FC rekolla pontu 12 hosi jogu lima, manan haat no lakon ida. Ho rezultadu ne’ebé ekipa rua ikus mai hasoru-malu iha finál hodi hadau malu titulu kampiaun segunda divizaun époka 2021.

Jornalista: Vito Salvadór