Hatutan.com (07 Dezembru 2021), Dili— Emanuel FC susesu konkista vitória finál hasoru nia adversáriu  Academica FC iha jogu finál segunda divizaun Liga Futeból Timor Leste (LFTL) époka 2021.

Emanuel FC susesu konkista vitória finál hasoru nia adversáriu Academica FC iha jogu finál segunda divizaun Liga Futeból Timor Leste (LFTL) époka 2021. Foto/Hatutan.com.

Vitória ne’e halo Emanuel FC hakat ba primeira divizaun epoka oin ho titulu nu’udár kampiaun ba tasa segunda divizaun no marka istória nu’udár ekipa dahuluk ne’ebé promovidu hosi terseira divizaun mai segunda divizaun no sai kedan kampiaun ba tasa segunda divizaun nu’udár bukae ba enfrenta jogu sira iha primeira divizaun LFTL 2022.

Notísia iha Relasaun:Academica FC Fiar an Sai Kampiaun Daruak Divizaun Époka 2021

Emanuel FC domina kedan jogu liu hosi kontrolu iha pasajen hodi halo kedan presaun ba nia adversáriu  Academica FC no lansa ameasa liu hosi bola oportunidade ne’ebé iha.

Emanuel FC kuaze domina bola no halo auto kontrolu ho di’ak nune’e obriga Academica FC tenke halo esforsu atu halo balansu hodi sai hosi presaun.

Academica FC sei mantein nia tatika jogu maske sofre iha liña klaran tanba médiu sira kuaze lakon bola no la halo pasajen ida di’ak hodi supply bola ba avansadu.

Ekipa Emanuel FC konsege aproveita failansu ne’e hodi halo atake no ameasa ba ekipa Academica FC liu hosi avansadun  esquerda Mario Quintã no Alexandre Moreira iha estremu inklui mós ho avansadu direita Filomino Savio.

Tama ba minutu 11 Emanuel FC lidera uluk liu hosi golu Alexandre Moreira ne’ebé simu asisténsia hosi nia belun Filomino Savio hosi parte liman loos nian.

Golu ne’e muda skore ba 1:0 no obriga Academica FC tenke halo esforsu atu bele duni atrazu ne’ebe iha.

Emanuel FC kontinua domina bola liu hosi taktika jogu ne’ebé iha. Kapitaun Academica FC Joel Gaio simu kartauk kinur hafoin halo falta hasoru  jogadór defeza adversáriu  Juvito moniz iha minutu 17. Emanuel FC kontinua ho sira nia ritmu jogu hodi nafatin halo atake no fo presaun ba adversáriu.

Ekipa Emanuel FC selebra hela vitória iha Kampu laran. Foto/LFTL.

Academica FC ne’ebé lakon jogu iha liña klaran hola inisiativa hodi halo atake liu hosi bola as maibé defeza adversáriu  mantein disipliña hodi asegura atake hosi adversáriu.

Iha minutu 36 Jogadór Emanuel FC Fretelino dos Santos no jogadór Academica FC Juvinal Boavida simu kartaun kinur hafoin halo asaun ba malu iha kampu laran.

Ekipa rua nafatin halo kontra atake ba malu, Academica FC nafatin halo esforsu liu hosi jogadór avansadu Pascoal Fernandes maibé sei nafatin falla iha ezekusaun.

Atu Tama ba tempu adisional iha minutu 45 nia rohan ekipa Emsnuel FC aumenta tan golu ida hodi muda skore ba 2:0 liu hosi jogadór avansado estremu Alexandre Moreira.

Tama ba segunda parte, Emanuel FC halo kedan substituisaun ba nia jogadór hodi hasai defeza Juvito Moniz no hatama Zinedine Lopes hodi haforsa liutan liña médiu.

Emanuel FC kontinua domina jogu hodi halo atake ba ekipa adversáriu. Academica FC nafatin halo esforsu atu sai hosinpresaun hodi halo balansu ba jogu Emanuel FC nian maibé sei falla nune’e Emanuel FC kobtinua domina bola.

Academica FC halo substituisaun ba nia jogadór iha liña avansadu hodi hasai Deonisio da Costa no hatama Helder Lopes iha minutu 53.

Emanuel FC susesu konkista vitória finál hasoru nia adversáriu Academica FC iha jogu finál segunda divizaun Liga Futeból Timor Leste (LFTL) époka 2021. Foto/LFTL.

Ho substituisaun ne’e Academica FC hahu halo tranzisaun ba nia taktika nune’e komesa halo ameasa ba Emanuel FC maske sei falla iha finalizasaun.

Emanuel FC la hakmate no kontinua mantein sira nia ritmu hodi halo atake ba adversáriu. Defeza Academica FC Romolu Escurial simu kartaun kinur hafoin halo falta hasiru avansadu Alexandre Moreira iha minutu 59.

Avansadu Academica FC Pascoal Fernandes lansa sutu vantazen ida maibé bsliza Emanuel FC Carvarinho Fernandes sei bele salva.

Academica FC kontinua halo substituisaun ba nia jogadór hodi hasai kapitaun Joel Gaio no hatama Ezequiel  Moniz iha minutu 67.

Enkuantu adversáriu  Emanuel FC hola inisiativa hodi asegura vitória ne’ebé iha nune’e deside hasai avansado Alexandre Moreira no hatama   Luis Gusmão iha minutu 70.

Ekipa rua la halo mudansa ba iha tabela skore nune’e Academica FC kontinua halo substituisaun hodi hasai Felipe Ling no hatama Rivaldo Fernandes iha minutu 73.

Ekipa Emanuel FC halo substituisaun hodi hasai Jonatas Pereira no hatama Carlos soares iha minutu 82.

Tama ba minutu 87 Emanuel FC kontinua halo substituisaun hodi hasai Bernadino de Sena no Mario Quintão hodi hatama Vidal Correia no Juvencio Menezes.

Too tempu termina laiha tan golu ruma nune’e Emanuel FC susesu rekola vitória ho skore 2:0 no sai kampiaun ba tasa LFTL segunda divizaun epoka 2021.

Treinadór Emanuel FC, Emiliano Ribeiro agradese ba Maromak ba susesu  ne’ebé atinze ba jogadór sira nia esforsu hodi marka tan istória ida ba emanuel.

Enkuantu jogadór Alexandre Moreira hosi ekipa Emanuel FC ne’ebé marka golu rua hodi lori vitória ba nia ekipa sente orgullu no sei halo esforsu hotu atu kontinua mantein nia perfomarse ba futuru hanesan futebolista foinsae ida.

“Hau sei mantein ho ha’u nia performance iha jogu sira tuir mai,” Alexandre Moreira, hateten.

Nune’e mós treinadór Academica FC Luisinio dos Santos sente triste ho derrota ne’e tanba jogadór sira la joga tuir instrusaun ne’ebé durante treinu aplika.

“Ami sofre iha primeira parte tanba ami nia defeza esquerda falla antesipa adversáriu  nia jogu nune’e rezulta golu rua iha primeira parte maibé segunda parte ami hadia maibé falla halo impata nune’e obrigadu tenke derota,” Luisinio dos Santos, espresa.

Ekipa kampiaun segunda divizaun LFTL epoka 2021 Emanuel FC susesu lori fila medalla no osan prémiu hamutuk $5.000 inklui tasa kampiaun ida.

Jornalista: Vito Salvadór