Hatutan.com, (16 Dezembru 2021), Díli—Polísia Nasionál Timor-Leste (PNTL) liu hosi Servisu Sekreta Komandu Unidade Patrullamentu Fronteira (UPF) kompañia Bravo Suai, detein joven na’in-rua iha ponte tafara, Aldeia Tabolo, Suku Kasabauk, Postu Administrativu Tilomar.

UPF halo apreensaun no detein joven na’in-rua ne’ebé hatama atributu arte marsiál ho dala illegal iha área Mota-Masin, Suai, Kuarta (15/12/2021). Foto/PNTL.

Joven na’in-rua ne’e  hatama sasan ilegál hanesan mina-rai no atributu Grupu Arte Marsiál (GAM) hosi Ikatan Keluarga Silat Putera Timor-Leste (IKS-PTL) liu hosi fronteira Mota-Masin.

Notísia iha Relasaun:Tranzasaun Ilegál Kontinua Akontese iha Fronteira Terrestre

Komandante UPF, Superintendente Polísia Euclides Belo, hateten sidadaun na’in-rua ne’e membru PNTL detein tanba halo transaksaun ilegál iha liña fronteira.

“Ami-nia membru UPF halo operasaun ne’ebé lidera hosi Segundu Komandante kompañia hamutuk ho Servisu Sekreta UPF nian, prende karreta tipu mikrolete ida ho númeru matríkula 37.161 no detein joven mane na’in-rua,” Euclides Belo hateten liu hosi komunikadu, Kinta (16/12/2021).

Joven na’in-rua ne’e ho inisiál TdC tinan 37 hosi Salele-Wetaba, Suku Beiseuk, Postu Tilomar ne’ebé hatama mina-rai  litru 350 hamutuk masa sanulu.

Enkuantu, joven ida seluk nu’udár treinadór GAM iha ranting Goroto-Same ho naran inisiál AS tinan 32, hosi Aldeia Puscam (kampung 3), Suku Gorotu, Postu-Administrativu Same Vila, ne’ebe na’in ba atributu arte marsiais IKS nian.

Euclides Belo relata, atributu organizasaun IKS nian ne’ebé hatama ilegál iha fronteira no UPF konsege prende iha loron 15 Dezembru mak hanesan farda treina IKS pares 82, kamizola IKS 21, Poster IKS 74, envelope logo IKS 74, kalung Q 42, Masimidar Pengesahan ho logo IKS 78, sertifikadu IKS 1, sabuk 1, poster guru besar 1, ID card IKS 1, Livru IKS 1 no Poster Keluarga Besar IKS 1.

Hafoin halo identifikasaun ba AS nu’udár na’in ba atributu organizasaun IKS deklara katak, atributu sira ne’e tama hosi Timor-Osidentál liu hosi fronteira tasi iha loron 14 Dezembru tuku ida kalan iha área Mota Masin nian ne’ebé fasilita hosi timor-oan ida naran EsA tinan 30, hela iha Salele Bot, Suku Lalawa, Postu-Administrativu Tilomar.

Oras-ne’e daudaun, joven na’in-rua hamutuk ho evidénsia sira ne’e entrega ona ba Komandu PNTL Munisípiu Covalima, hodi kontinua ba prosesu investigasaun no sei prosesa tuir lei ne’ebé vigora iha Timor-Leste.

Jornalista: Rogério Cárceres