Hatutan.com, (26 Dezembru 2021), Díli—Ekipa Konjunta Comissão Anti Corrupção (CAC) ho Electricidade de Timor-Leste,Empreza Públika (EDTL,E.P), konsege salva osan Estadu nian hamutuk $77.023,60, hafoin konklui serbisu inspessaun ba projetu liña eletrisidade iha Munisipiu lima (5) hanesan Liquiça, Covalima, Ainaro, Aileu no Manatuto durante fulan Outubru to’o Dezembru tinan 2021.

Projetu eletrisidade iha Terrenu. Foto/CAC.

Ekipa Konjunta ne’e hahú serbisu inspesaun hafoin Unidade Inspesaun no Monitorizasaun (UIM) iha Diresaun Prevensaun no Sensibilizasaun CAC nian hala’o serbisu inspesaun inisiál iha terreñu no revela iha indisíus kompaña ezekutadór halo prátika violasaun ba dokumentu tékniku sira hanesan BoQ no dezeñu.

Notisia iha Relasaun:Ahi Mate-Lakan, Kauza Husi Liña Distribuisaun Eletrisidade Barak Tuan Ona

Ekipa UIM CAC nian rekomenda ba dirijente EDTL,E.P no Senior Management EDTL,E.P nian responde pozitivamente hodi serbisu hamutuk ekipa UIM CAC hala’o fila-fali inspesaun ho ninia rezultadu, hetan konkordánsia unanimously entre CAC, EDTL,E.P no Kompaña implementadór tenki kona penaltu no ko’a osan ba violasaun ne’e.

Advertisement

“Daudaun ne’e, ekipa inspetór sira hosi CAC kolabora besik ho ekipa tékniku EDTL,E.P kontinua hala’o inspesaun no monitorizasaun ba projetu liña eletrisidade sira seluk iha munisípiu Covalima, Ainaro, Aileu no Manatuto,” Komunikadu hosi CAC.

Ekipa inspesaun UIM CAC nian mós deskobre katak, daudaun ne’e iha projetu balun ne’ebé kategoria nu’udár projetu tuan tinan fiskál 2016, maibé to’o tinan fiskál 2021 remata ona kompaña implementadór seidauk konklui no entrega tuir kontratu determinante. Kompaña ezekutadór sira sei hetan penalty bainhira tarde ezekuta.

Nune’e mós, projetu balun ninia progresu pagamentu atinji ona 90%, maibé komunidade barak mak seidauk asesu ba liña eletrisidade.

Deskobre mós prátika sira ne’ebé bele fó posibilidade ba kompaña implementadór sira hala’o projetu ka obra Estadu nian komete fraúde durante konstrusaun.

Ho deskobrimentu ne’ebé CAC iha daudaun ne’e, CAC sei rekomenda pontus balun ba atu nafatin kontinua halo re-inspesaun iha futuru hodi asegura implementasaun projetu tuir kontratu estabelesidu ho efetivu, efikasia no tuir tempu determinadu.

Advertisement

Antes ne’e Prezidente EDTL,E.P, Paulo da Silva, hateten EDTL,E.P la tolera ligasaun illegal, nune’e tékniku, sempre hala’o operasaun ba komunidade hodi halo identifikasaun ne’ebé deskonfia dada ahi ho illegál.

Bainhira tékniku EDTL,E.P tún ba terrenu halo inspesaun maka deteta sidadaun balun dada liña eletrisidade ho illegál, sei prosesa tuir lei, tanba konsidera krime.

Jornalista: Cipriano Colo

Advertisement