Hatutan.com, (30 Maiu 2022), Díli—Sua Eminénsia Kardeál Dom Virgílio do Carmo da Silva, SDB Arsebispu Arkedioseze Metropolitana Díli, konsidera títulu Cardeal ne’ebé nia simu nu’udár prezente hosi Maromak ba povu no sarani tomak Kredak Timor nian.

Sua Eminénsia Kardeal Dom Vírgilio do Carmo da Silva, SDB, Arsebispu Arkedioseze Metropolitana Díli. Foto/Hatutan.com

Arsebispu rasik la hatene atu dehan saida iha momentu ne’e no nia parte derrepente de’it simu telefone hosi nunsiatura ho novidade ida ne’e.

Lee Mós: Papa Francisco Nomea Dom Virgílio Kardeál Dahuluk Uma Kreda Timor-Leste

Iha situasaun ida ne’e nia laran, maski todan tanba ida-ne’e knaar ida Uma-Kreda nian no Amu Papa mak fó,  sei hakas an atu simu.

Advertisement

“Ida-ne’e la’ós fó ba ha’u maibé ne’e nu’udár prezente ida Amu Papa fó ba povu Timor-Leste no prezenteida ne’ebéMaromak fó ba Uma-Kreda Timor,” Hatutan.com sita deklarasaun Dom Virgilio do Carmo da Silva, iha entrevista ho SMNews, Segunda (30/05/2022).

Arsebispu ne’e hateten, nia la soi atu simu knaar ida-ne’e maibé Uma-Kreda, povu no sarani Timor mak soi atu simu grasa ida-ne’e.

Ho knaar ida ne’e, Uma-Kreda nia misaun la halo buat foun, maibé kontinua hala’o knar Bispu nian ne’ebé halo iha Díli no iha 27 Agostu tinan ne’e mak ba halo konsistóriu hodi halo elevasaun no formalmente simu misaun mais detallu.

“Agradese ba povu no husu sarani sira ita reza ba malu hanesan ha’u dehan Cardeál la’ós ba ha’u maibé ba sarani no povu Timor,” nia dehan.

Virgílio do Carmo da Silva, S.D.B., moris iha 27 Novembru 1967, nu’udár Na’i Lulik Igreja Katólika nian ne’ebé  simu ordenasaun nu’udár Bispu Dioseze Díli iha 30 Janeiru 2016. Bainhira Dioseze Díli Kanonizadu sai Arkedioseze Metropolitana, nia mós hetan nomeasaun nu’udár Arsebispu Metropolitá iha 11 Setembru 2019.

Advertisement

Hafoin remata eskola Primária no Ensinu Báziku Terseiru Síklu Salesiano iha Fatumaca, nia hili hodi sai hanesan misionáriu iha Kongregasaun Salesiana de Don Bosco iha 31 Maiu 1990. Nia hahú estuda Filozofia no Teolojiaiha Manila, Filipina. Iha 19 Marsu 1997, nia simu votus perpétua no simu ordenasaun iha 18 Dezembru 1998.

Iha 1999 to’o 2004 no iha 2007 to’o 2014, nia hahú Novisiadu ba Salesiana. Iha 2005, nia Estuda iha Roma hodi hetan lisensiatura iha área Espiritualidade iha Universidade Pontifisia Salesiana. Hahú  2009 to’o 2014, nia hanesan diretór Eskola Téknika Nossa Senhora de Fátima iha Fatumaca. Iha 2015, nia sai hanesan Superior Provinsial Salesina iha Timor-Leste no Indonézia.

Iha 30 Janeiru 2016, nia hetan nomeasaun hosi Papa Francisco hodi sai Bispu Dili hodi troka Bispu Alberto Ricardo da Silva ne’ebé mate iha 02 Abríl 2015. Ninia Paternu José do Carmo da Silva ho Isabel da Silva.

Hahú iha loron 27 Agostu tinan ne’e, Timor-Leste, Paraguai, Singapura no Mongólia iha ona reprezentante iha kolégiu Kardinalísiu.

PM Taur Hato’o Parabens

Advertisement

Primeiru Ministru (PM), Taur Matan Ruak hato’o ona felisitasaun ba Sua Eminénsia Kardeál Dom Virgílio do Carmo da Silva, SDB, Arsebispu Arkedioseze Metropolitana Díli.

Orgullu boot ba sarani Timoroan no Uma-Kreda Timor-Leste ba nomeasaun Arsebispu Dom Virgílio do Carmo da Silva, SDB hosi Papa Francisco nu’udár Kardeál Timoroan dahuluk iha istória Uma Kreda Timor-Leste. Parabens ba pozisaun nobre ida-ne’e,” Hatutan.com sita deklarasaun PM Taur iha komunikadu.

Jornalista: Vito Salvadór

Advertisement