Hatutan.com, (29 Dezembru 2021), Díli—Molok husik hela Timor-Leste ho aviaun komersiál AirAsia hodi halo viajen ba Portugal liuhusi Aeroportu Internasionál Prezidente Nicolau Lobato, Díli, Kuarta (29/12/2021), eis Primeiru-Ministru, Mari Alkatiri, deklara katak nia iha kondisaun saúde ida estavel tebes no la moras todan.

Eis Primeiru-Ministru Mari Alkatiri hala’o viajen ba Portugal, 29 Dezembru 2021. Foto/Hatutan.com

Ho oin hamnasa no kontente tebes, Mari Alkatiri responde espekulasaun ne’ebé espalla iha públiku katak  nia halo viajen urjente ne’e tanba moras todan.

“Sira hotu-hotu hein hela ha’u atu mate. Mas, ha’u sei moris naruk, ne’e la iha dúvida,” Sekretáriu Jerál Partidu FRETILIN ne’e hateten ba jornalista sira  ho hamnasa.

“Ha’u agora ba Portugal tanba família barak iha ne’ebá ho ha’u nia oan-mane ida de’it mak ne’e, ho ha’u nia mane-foun, ba para hamutuk iha festa pasajen tinan foun nian no ha’u mós iha amigu barak iha ne’ebá konvite mai iha ne’e, konvite ba, konvite mai, no ha’u la hatene loos atu halo programa halo nusa, tanba ne’e, ha’u sei fó tempu tomak ba família”.

Mari Alkatiri espera katak la liu semana-rua nia sei fila-fali mai iha ne’e tanba hakarak partisipa iha kampaíña prezidensiál 2022.

“Ha’u hakarak partisipa, biar ha’u la’ós kandidatu, ha’u hakarak partisipa iha kampaña ba prezidensiál, ne’e klaru. Ha’u sei partisipa ho forsa tomak ho saúde tomak, hatudu ba ema sira be sempre konta oras loron, ha’u atu mate ne’e,” Mari Alkatiri afirma tan.

Aproveita oportunidade ne’e, Mari Alkatiri lia-tun ba kuadru sira, militante  FRETILIN no povu tomak, buibere-maubere, katak falta loron hirak de’it atu hakotu tinan tuan 2021 no buka hakotu mós enerjia negativa no buka hamoris enerjia pozitiva.

Eis Primeiru-Ministru, Mari Alkatiri. Foto/Hatutan.com

“Husi ne’e ba oin, tinan-lima (5) tan, tinan 10 tan,  ami sira jerasaun  1974 no 1975 sei la iha tan kapasidade atu kria situasaun ida para tranzisaun ne’e bele lori dezenvolvimentu ho sustentabilidade, kulpa ami nian,” eis Prezidente Autoridade RAEOA no ZEESM ne’e hatutan.

Alkatiri deklara katak nia luta ba oin tenta konvense lider  1974 no 1975 nian atu tur hamutuk para atu hateke ba oin.

“Brani mai ita tur-hamutuk, uluk ita halo balansu ba rezisténsia armada, rezisténsia klandestina no rezisténsia diplomátika, ita halo balansu iha 1999 no povu vota ba independénsia, agora tempu para ita halo balansu ba ita nia prosesu dezenvolvimentu ekonómiku, sosiál para haree ita hotu-hotu tenke hatene saida mak ita ida-idak halo, saida mak ita halo loos, saida mak ita halo sala. Se brani, ita tur-hamutuk, ita halo balansu ida-ne’e,” Alkatiri afirma tan.

Mari Alkatiri mós hato’o boas festa no boas entradas no promete sei fila mai hosi Portugal atu hakuak ema hotu.

Hafoin ko’alia tiha lia-hirak ne’e, Mari Alkatiri akompaña husi nia família, amigu balun no kamarada sira balun, la’o normal, hatudu fíziku forsa tebes, hanesan ema la moras, no konversa saudavel tebes ho ema hirak la’o hale’u nia no hamutuk ho nia  to’o hakat ba sa’e aviaun AirAsia.

Jornalista:  Vito Salvadór