Hatutan.com, (07 Janeiru 2022), Díli– Avo mane ida ho inisiál JS iha área Bebonuk, Comoro, Díli, hetan detensaun hosi Polísia Nasionál Timor-Leste (PNTL)  tanba halo violasaun seksuál hasoru nia bei-oan feto (insestu) ne’ebé foin ho idade tinan hitu (7).

Avo-mane ne’ebé halo fali violasaun seksuál hasoru nia bei-oan feto. Foto/Hatutan.com

Iha loron 03 fulan-Janeiru 2022, Servisu Investigasaun Kriminál Nasional (SIKN) ezekuta mandadu detensaun husi Tribunál Distritál Dili (TDD) hodi ba halo detensaun oras 72  ba  arguidu JS iha Bebonuk hafoin submete ba primeiru interrogatóriu tanba deskonfia halo violasaun seksuál hasoru nia bei-oan feto rasik ho inisiál A.

Liuhusi primeira interrogatóriu iha TDD, Sesta  (07/01/2022), Juiza singular Albertina Neves, deside aplika medida koasaun prizaun preventive ba arguidu.

Razaun Tribunál aplika medida koasaun ne’e, tanba konsidera iha indísiu forte hodi lori arguidu ba prizaun preventive bazeia ba arguidu nia deklarasaun durante prosesu primeiru interrogatóriu tanba arguidu konfesa katak nia halo duni violasaun seksuál hasoru nia bei-oan tanba tentasaun.

Defeza Agostinha de Oliveira ne’ebé fó asisténsia legal ba arguidu  aseita ho medida koasaun ne’e tanba hodi asegura arguidu nia prezensa durante prosesu investigasaun.

Iha primeiru interrogatóriu ne’e, Ministériu Públiku n reprezenta husi Prokuradór Claudino do Rozáriu promove arguidu ba krime violasaun seksuál agravadu ne’ebé previstu iha artigu 182 husi kódigu penal Timor-Leste.

Jornalista: Carmelita Isaac