Hatutan.com (07 Janeiru 2022) Díli—Konsultasaun partidu polítiku sira ho Prezidente Repúblika (PR) Francisco Guterres “Lú Olo” iha iha Sesta (07/01/2022), CNRT, KHUNTO, PUDD no UDT prontu atu kumpri de’it desizaun Xefe Estadu, kona-bá desizaun atu dekreta kalendáriu eleisaun Prezidensiál.

Iha sorumutu, III vise-Prezidente Partidu Congresso Nasional de Reconstrução Timorense (CNRT) Tomas do Rosário Cabral, hateten Partidu ne’e sei kumpri desizaun PR, hodi dekreta loron eleisaun Prezidensiál.

Notisia iha Relasaun:Parpol Sira Propoin Lú Olo Kumpre De’it Konstituisaun, FRETILIN Husu Tetu ho Saúde Públika

“Ami mai tanba hetan konvite hosi PR atu konsulta, nune’e pozisaun CNRT nian ne’ebé hato’o ba PR maka dekreta loron eleisaun. CNRT sei kumpri buat ne’ebé iha,” Tomas Cabral hateten ba jornalista sira iha Palásiu Prezidensiál Nicolau Lobato, Bairru-Pité.

Eis Ministru Administrasaun Estatál ne’e subliña, prezensa CNRT iha enkotru ne’e atu kontribui ba markasaun kalendáriu eleisaun Prezidensiál tanba CNRT maduru iha polítika, nune’e la iha adversáriu atu krítika-malu no CNRT nia pozisaun mak pás no estabilidade.

Nune’e mós Prezidente interinu Partidu Unidade Dezenvolvimentu Demokratiku (PUDD), Silvestre Sufa hateten,  PUDD la iha objesaun ho desizaun Prezidente Repúblika hodi dekreta loron eleisaun Prezidensiál tuir kompeténsia ne’ebé iha.

“PUDD hetan konvite hosi PR atu rona informasaun kona-bá preparasaun ba eleisaun Prezidensial, nune’e em prinsípiu PUDD la iha objesaun seluk no sei fo apoiu tomak ba saida mak PR nia hanoin,” Silvestre Sufa hateten.

PUDD prontu atu enfrenta eleisaun Prezidensiál ne’ebé sei mai no seidauk deside atu iha kandidatu rasik ou apoiu kandidatu seluk, tanba buat hotu-hotu sei liu hosi kongresu ka konferénsia partidu.

Alende ne’e, Prezidente Partidu Kmanek Haburas Unidade Timor Oan (KHUNTO), Armanda Berta dos Santos mós deklara sei apoiu desizaun tomak ne’ebé PR iha, relasiona ho kalendáriu eleisaun Prezidensiál, tanba ne’e  maka KHUNTO  kumpri konvite hosi PR.

“Desizaun saida deit mak PR foti, Partidu KHUNTO fó apoiu,” Armanda Berta dos Santos, hateten.

Iha ikus liu, Sekretáriu Jerál Partidu União Democratico Timorense (UDT), Francisco David Xavier Carlos hateten UDT liu hosi enkontru ho PR iha ona informasaun katak, loron 15 Janeiru tinan ne’e sei dekreta kalendáriu eleisaun Prezidensial tuir konstituisaun haruka.

“Tuir konstituisaun kada tinan lima TL tenke iha eleisaun atu hili Xefe Estadu tanba ne’e UDT hein katak desizaun ne’ebé PR iha sai mós hanesan UDT nian,” Francisco David Xavier Carlos, hateten.

UDT seidauk iha opsaun atu iha kandidatu ka apoiu kandidatu seluk iha eleisaun Prezidensiál tanba desizaun altu partidu nian iha kongresu ka konferénsia.

Partidu Polítiku ne’ebé Xefe Estadu rona uluk iha loron dahuluk nian maka Partidu Demokrátiku (PD), Partidu Libertasaun Populár (PLP), Frente-Mudança (FM) ho Partidu Frente Revolusionáriu Timor-Leste Independente (FRETILIN).

Hosi enkontru ne’e, Parpol ida-idak hato’o sira-nia  opiniaun ba Prezidente Repúblika, Francisco Guterres “Lú Olo” no  maioria kontinua ba PR Lú Olo atu kumpre de’it mandamentu Konstituisaun RDTL.

Jornalista: Vito Salvador