Hatutan.com, (12 Janeiru 2022), Baucau- Enjeñeiru sira husi Forsa Aérea Estadus Unidus Amérika  (EUA) nian, Kuarta (12/01/2022), hahú ona servisu hamutuk ho Forsa Defeza Timor-Leste (FALINTIL-FDTL) hodi apoia projetu konstrusaun no reabilitasaun hanesan parte ida husi reabilitasaun konjunta bá Aeroportu Komandante Vicente Reis “Sahe”, Baucau.

Forsa konjunta EUA ho F-FDTL hahú halo reabilitasaun konjunta ba Aeroportu Baucau. Foto/Media Embaixada EUA iha TL

Servisu hamutuk entre enjeñeiru sira Amérika no Timor-Leste nian sei rezulta iha konstrusaun armazén foun ida no hadi’a lutu atu apoia F-FDTL no operasaun komersiál iha futuru.

“Servisu ne’ebé hahú ohin reprezenta pasu importante ida iha ami-nia kompromisu atu fó rezultadu bá reabilitasaun konjunta Aeroportu Baucau nian,” hatete Enkarregadu Negósiu Embaixada EUA, Tom Daley liuhusi komunikadu imprensa ne’ebé Hatutan.com asesu.

“Estadus Unidus orgullu tebes halo parseria ho F-FDTL hodi reabilita aeroportu ne’e atu nune’e bele hametin kapasidade Timor-Leste nian iha área seguransa marítima, dezenvolvimentu ekonómiku, asisténsia umanitária, no resposta bá dezastre.”

Durante projetu ne’e, membru na’in-15 husi 554th Red Horse Squadron sei servisu hamutuk ho enjeñeiru F-FDTL sira atu harii armazén foun ho luan 477 metru kuadradu, ne’ebé sei utiliza atu haloot ekipamentu apoiu aero, inklui ekipamentu apoiu ba bombeiru, kamioneta kombustivel, forklifts no karreta sira seluk.

Ekipa konstrusaun konjunta ne’ e sei hadi’a mós lutu hale’u área aeroportu nian hodi hametin seguransa ne’ebé seguru.

Hahú halo reabilitasaun ba Aeroportu Baucau. Foto/Media Embaixada EUA iha TL

Projetu rua ne ‘e sei remata iha fulan-Abríl 2022, no aspetu sira husi serbisu ne’e sei hala’o liuhusi koordenasaun ho Forsa Navál Estadus Unidus nian Seabees.

Projetu ida-ne’e hala’o hanesan preparasaun bá simu aviaun Cessna 206 ne’ebé oferese husi Estadus Unidus no sei to’o iha Timor-Leste iha tinan ne’ e nia laran.

Ekipa 554th Red Horse Squadron mak enjeñaria sivíl ne’ebé movel tebes ba Forsa Aéreu Estadus Unidus nian ho ninia baze iha baze forsa Aero EUA Andersen iha Guam.   

Iha fulan-Juñu 2021, Estadus Unidus Amérika kompromete ona atu hamutuk reabilita aeroportu Baucau ho Governu Timor-Leste. Liuhusi kriasaun komponente Aéro ida, projetu ne’e sei fó asisténsia ba F-FDTL no sei tulun Governu Timor-Leste atu hadi’a ninia koñesimentu iha área marítima, hodi hatán ba dezastre naturál sira no promove dezenvolvimentu ekonómiku.

Jornalista: Rogerio Cárceres