Hatutan.com, (12 Janeiru 2022), Díli—Maski selebra ona aniversáriu ezisténsia ba dala 20, maibé instituisaun FALINTIL Forsa Defeza Timor-Leste (F-FDTL), Komponente Navál, kontinua enfrenta problema barak, liuliu rekursu umanu, infraestrutura no finanseira.

Ofisiál sira Komponente Navál nian. Foto/Hatutan.com

“Durante tinan 20, ita iha dezafiu barak, maibé, prinsipalmente ne’e, tolu. Rekursus umanu, infra-estrutura, finanseiru,” Komandante Komponente Navál, Capitão de Fragata, João da Silva hateten ba jornalista sira,  hafoin serimónia aniversáriu Komponente Navál ba dala-20, iha baze navál Hera, Kuarta (12/01/2022).

Ba buat tolu ne’e, kabe ba vontade no responsábilidade Governu, liu-liu Kuartél Jenerál, Ministru Defeza.

Maski nune’e, ho membru ne’ebé númeru limitadu, durante tinan 20 membru no ofisiál sira iha komponente ne’e ho 50% mak partisipa ona formasaun militár nian, liu-liu kona-bá tasi iha nasaun liur.

Advertisement

Kada fulan Deteta Peska Ilegál Kuaze 60

Ró operasionál Komponente Navál Hera. Foto/Hatutan.com.

Durante tinan 2021, liuhosi sistema Deteksaun Automátika (Automatic Detection), sempre deteta atividade peska ilegál barak iha kada fulan, hahú hosi 50 to’o 60.  

Komponente Navál iha dadus, tanba reforsa tán hosi sistema skylight, ne’ebé sira instala, kada loron sempre deteta atividade ilegál iha kosta súl.

“Fulan ida-ne’e ita la hatene, ró kala 50 to’o 60 mak hala’o atividade ilegál iha ita nia tasi,” Capitão de Fragata, João da Silva, hateten.

Liuhosi sistema ne’e, bele hatene ró ne’e mai hosi nasaun ne’ebé ho nia medida hira. Ró sira ne’ebé hala’o atividade peska ilegál iha tasi TL, iha balun hela permanente hosi fulan-tolu to’o haat iha Kosta Súl no,deskonfia ró sira ne’e balun hosi nasaun viziñu, hosi Tailándia, no balun hosi Vietname.

Ho rezultadu sira ba deteksaun ida-ne’e, parte komponente navál, tenke informa ba iha ierarkia aas liu iha Komandu F-FDTL.

Advertisement

“Ida ne’e sistema mak fó sai, ne’ebé ita labele bosok malu, tanba ne’e, sistema fó sai katak, ró ida naran hanesan ne’e, nia mai hosi fatin ida ne’e, nia permanese iha ne’ebá, no nia navega, la’o ka, nia permanente. Ita nia sistema ne’e deteta no ita kontinua informa ba iha nivel leten,” Komandante João da Silva, afirma.

Totál membru efetivu oras ne’e iha Komponente Navál, hamutuk na’in-atus-lima-resin (500-resin).

Liuhosi diskursu, Xefe Estadu Maiór Jenerál Falintil F-FDTL, Tenente Jenerál Lere Anan Timur, haktuir, fofoun hari’i komponente navál, ho de’it mariñeiru hamutuk na’in-45.

Maski nune’e, TL bele konsege, tanba ohin hari’i forsa defeza ida hodi sai lutu no liman-kro’at ba povu ho nasaun.

Istória atu hari’i instituisaun F-FDTL iha TL, la fásil, tanba antes ne’e iha ema internasionál sira dehan katak laiha nesesidade ba TL atu hari’i nia forsa armada rasik.

Advertisement

Maibe, ho matenek sira, maun-boot Xanana, Taur Matan Ruak, ho komandante sira seluk ninia esforsu, TL konsege konvense ajente internasionál sira, liu-liu Organizasaun Nasaun Unidas (ONU), ohin loron TL estabelese duni nia forsa armada rasik.

“Ita hari’i forsa armada infantária lizeira ida iha ita nia nasaun, iha ita nia rai ne’ebé mak soberanu hanesan rai sira seluk,” Tenente Jenerál Lere Anan Timur, hateten.

Tanba ne’e, Lere Anan Timur, agradese ba Ofisial feto-mane sira hotu iha forsa armada TL nian, no espesiál ba mariñeiru no mariñeira sira.

Atu konstrui komponente navál, presija ho ema ne’ebé matenek, ho espíritu patriotizmu no nasionalizmu atu bele hari’i komponente ida ne’ebé mak metin no forte.

Lere Anan Timur, reprezenta instituisaun F-FDTL, ho Estadu no Governu tomak nia naran, agradese ba konvidadu internasionál sira hosi nasaun oioin ne’ebé prezente, tanba hatudu ona sira nia solidariedade, domin no responsábilidade hodi fó ona sira nia apoiu tomak ba dezenvolvimentu Komponente Navál nian. 

Advertisement

Lú Olo Enkoraza Komponente Navál

Prezidente Repúblika, Francisco Guterres Lú Olo. Foto/Média PR.

Prezidente Repúblika (PR), Francisco Guterres Lú Olo, enkoraza membru sira tomak iha Komponente Navál nian atu serbisu ho responsabilidade hodi serbí povu no Soberania TL nian.

“Ho votu esperansa iha futuru mak ha’u fó korajen ba imi atu serbí nafatin ita nia rain hanesan baibain. Ha’u fiar katak, imi sei kontribui ba tane aas Komponente Navál, Forsa Defeza no Timor-Leste nia naran iha mundu,” Xefe Casa Militár, Coronel, António Soares da Silva “Maukalo”, halo leitura ba mensajen Francisco Guterres “Lú Olo”.

PR Lú Olo konsidera 12 Janeiru 2022 nu’udár  loron importante ba membru no ofisiál sira iha Komponente Navál, hodi serbí Timor-Leste no defende interese nasaun nian iha tasi, nune’e TL no timoroan sira bele uza tasi iha moris loro-loron, la’ós ba atividade militár, maibe mós ba atividade sira ho natureza sívil, inklui apoiu ba Autoridade Marítima Nasionál.

Komponente Navál estabelese iha 12 janeiru 2022, no ohin selebra ninia ezisténsia ba dala-20 (12 janeiru 2002 to’o 2022).

Jornalista: Rogério Pereira Cárceres

Advertisement