Hatutan.com (13 Janeiru 2022) Díli –Enkarregadu Negósiu Embaixada Estadus Unidus Amerika (EUA), Tom Daley, Kinta (13/01/2022), lansa komemorasaun aniversáriu ba dala-20  relasaun diplomátika ho Timor-Leste ho EUA.

Notísia iha Relasaun: Militár EUA ho F-FDTL Hahú Halo Reabilitasaun Konjuntu Bá Aeroportu Baucau

Logotipu Komemorasaun aniversáriu ba dala-20 relasaun diplomátika ho Timor-Leste. Foto/Espesiál

Komemorasaun aniversáriu ba dala-20 relasaun diplomátika ho Timor-Leste ne’ebé sei hala’o durante tinan tomak ne’e ho tema “Belun, Parseiru, Oportunidade,” no komemorasaun ne’e fó sai iha vídeo ida iha pájina Facebook Embaixada EUA nian iha Díli.

“Hahú fulan ida ne’ e, Misaun EUA iha Timor-Leste sei hatudu relasaun forte entre EUA no Timor-Leste liu husi média tradisionál no sosiál kona-ba ami nia amizade istóriku, atividade públiku involve lider futuru Timor-oan sira nian hodi hametin futuru parseria entre EUA no Timor-Leste, no sei anunsia mós oportunidade foun sira atu haluan prosperidade,” sita komunikadu imprensa hosi Embaixada EUA iha Díli ne’ebé Hatutan.com asesu.

“Tinan ida ne ‘e, Timor-Leste selebra nia tinan 20 nu’udar nasaun ida ne’ebé independente, demokrátiku, ami selebra mós aniversáriu ba dala-20 kona-ba relasaun diplomátika entre Estadus Unidus no Timor-Leste,” Enkarregadu Negósiu Embaixada EUA nian Tom Daley hateten.

“Durante tinan 2022, ita sei reflete kona-bá susesu sira ne’ebé ita alkansa ona iha dékada rua ikus ne ‘e nia laran, no ita sei haree mós ba futuru ida ne’ebé nabilan liu, ne’ebé ita hakarak harii hamutuk.”

Iha video ne’ e, Enkarregadu Negósiu, Tom Daley anunsia rezultadu selesaun ba logo ofisiál Embaixada Estadus Unidus nian iha komemorasaun ne ‘e. Logo ne’ e dezeña husi Timoroan ida Agostinho Meluk, ne’ebé kompriende kle’an kona-bá espíritu komemorasaun ne’ e.

Sentidu husi logo ne’e mak, hako’ak hela malu, númeru rua ne’e reprezenta ita nia amizade istórika entre Estadus Unidus no Timor-Leste. Fitun hirak ne’e simboliza susesu barak ne’ebé Estadus Unidus no Timor-Leste halo ona durante tinan 20 ikus ne’ e; bandeira sira signifika oportunidade sira ba ita-nia nasaun rua bainhira ita serbisu hamutuk. Logo nee hili entre konkorrente nain 65 ne’ebé kriativu no inspira tebes durante kompetisaun dezeñu ba logo komemorativa Embaixada Estadus Unidus nian.

Jornalista: Vito Salvadór