Hatutan.com (14 Dezembru 2021) Díli—Governu Timor-Leste (TL) ho Ajénsia Kooperasaun Internasionál Koreia (KOICA), asina ona akordu kontribuisaun finanseira ho montante $7.860.000, hodi implementa projetu “Hateten La’e ba 5S ka Hamlaha, Elmintíaze ne’ebé transmite hosi rai, Moras-Kulit, Fuma no Bebidas Midar, Alkólika iha Eskola sira”.

Serimónia asinatura ba Subvensaun entre Ministru Finansa, Rui Gomes ho Reprezentante Governu Koreanu iha Timor-Leste. Sesta (14/01/2022). Foto/MF.

Projetu ne’e sei implementa hosi Nasaun Unidas nia Programa Alimentár Mundiál (WFP) no Organizasaun Saúde Mundiál (WHO), ne’ebé sei fornese Pakote Saúde Primária no Edukasaun Saúde ba labarik ho idade eskolár, hodi redús risku moras oioin iha eskola.

Notisia iha Relasaun:TL Empresta Millaun $35 Hosi ADB atu Hadi’a Eletrisidade

Projetu ne’e sei envolve partisipasaun hosi Departamentu Governamentál sira ne’ebé responsável iha área Edukasaun no Saúde ho nia alvu prinsipál maka eskola primária no pre-sekundária hamutuk 400, estudantes idade eskolár rihun 300-resin iha Munisípiu Baucau, Bobonaro no Manufahi, ne’ebé mak implementa hela programa merenda eskolár ho arróz fortifikadu.

“Governu TL komprometidu ba labarik Timor-oan sira-nia sobrevivénsia, dezenvolvimentu no protesaun,” Hatutan.com sita deklarasaun Ministru Finansa, Rui Gomes iha komunikadu.

Iha OJE 2022, Governu introdús ona Markadór Infantíl, Programa Bolsa da Mãe Jerasaun Foun no Programa Merenda Eskolár ne’ebé aliña ho Planu Estratéjiku Dezenvolvimentu Nasionál no Objetivu Dezenvolvimentu Sustentável.

Oitavu Governu fiar, katak investimentu iha redusaun malnutrisaun, la’ós de’it Investimentu ne’ebé Loos, maibé Investimentu ne’ebé Estratéjiku ba Timoroan sira.

Bainhira labarik ida saudável no edukadu, maka nia preparadu no iha prontidaun di’akliu atu lidera Rai ne’e bá oin.

Ministru ne’e mós hato’o apresiasaun sinseru ba Governu Koreia du Súl no Povu Koreanu ba sira-nia apoiu jeneroza, hodi rezolve problema estruturál ida iha Timor-Leste, nomós Organizasaun Nasaun Unidas liuhosi WHO no WFP, ne’ebé sei fornese asisténsia téknika no administrativa.

Ministru Rui Gomes mós bolu atensaun ba Departamentu Governamentál sira ne’ebé responsável iha área Saúde no Edukasaun, atu mellora sira-nia prestasaun servisu iha nível baze, hodi garantia katak asisténsia hirak ne’e bele lori impaktu signifikativu no mudansa pozitivu ba iha Labarik Timoroan sira-nia moris.

Embaixadór Koreia du Súl iha Timor-Leste, Jeong Ho, KIM odnradu tebes tanba bele reprezenta Governu Koreia nu’udár país doadór, hodi apoiu labarik Timoroan sira-nia saúde no moris-di’ak, liuhosi Projetu Say No to 5S iha Eskola-sira.

Ba tinan lima oin mai, Ministériu Edukasaun no Ministériu Saúde ho asisténsia hosi WFP no WHO, sei fornese pakote saúde, arroz fortificado no edukasaun ba labarik sira.

“Ho melloramentu nutrisaun no saúde, labarik sira bele mellór kombate doenças infeciosas no dezenvolve sira-nia abilidade aprendizazen, baze ida atu realiza sira-nia poténsia,” nia subliña.

Reprezentante Rezidente UNDP no ONU iha Timor-Leste, Tuya Altangerel konsidera katak, liuhosi Projetu ida-ne’e, sei serbisu hamutuk hodi mitiga risku moras sira, malnutrisaun labarik, liuhosi fornese Pakote Saúde Primária no Edukasaun Saúde iha eskola-sira.

“Ita mós sei serbisu hamutuk hodi mellora eskola sira ho ambiente ne’ebé saudável no seguru ba labarik sira atu aprende, inklui fornese merenda eskolár nutritivu no seguru ba labarik feto no labarik mane sira,” nia hateten.

Serimónia asinatura akordu ne’e, Ministru Rui Gomes akompaña hosi Ministru Edukasaun, Joventude no Desportu, Armindo Maia no Vise-Ministru Negósiu Estranjeiru no Kooperasaun, Julião da Silva.

Iha Sorumutuk loron 15 fulan-Dezembru 2021, Konsellu Ministru aprova akordu projetu entre Repúblika Demokrátika Timor-Leste no Ajénsia Kooperasaun Internasionál Koreia (KOICA), relasiona ho projetu “Hateten Lae ba 5S” no autoriza Ministru Rui Gomes hodi reprezenta Estadu Timor-Leste atu asina akordu subvensaun $7.860.000 hosi KOICA.

Jornalista: Cipriano Colo