Hatutan.com, (08 Fevereiru 2022), Díli—Governu Konstitusionál Daualu (VIII) kontinua determinadu ho esforsu hotu kona-bá vontade polítika, hodi sai membru Organizasaun Mundiál Komérsiu (OMK)  iha époka tuir-mai.

Ministru Koordenadór ba Assuntu Ekonómiku (MCAE) no atuál Xefe Negosiadór Timor-Leste ba OMK, Joaquim Amaral. Foto/MCAE.

Atu realiza metas hosi kompromissu polítika ne’e, Komisaun Interministeriál  lideradu hosi Ministru Koordenadór ba Assuntu Ekonómiku (MCAE), Joaquim Amaral atuál Xefe Negosiadór Timor-Leste ba OMK, kontinua realiza reuniaun faze daruak ho membru hosi Komisaun Interministeriál hodi atualiza serbisu hirak ne’ebé TL halo tiha ona iha ámbitu hodi sai membru OMK.

Notisia iha Relasaun:Ministru Joaquim ho Delegasaun Dezloka ba Jenébra Partisipa Konferénsia Altu Nível OMK  

Kriasaun Komisaun Interministeriál no Grupu Traballu bazeia ba despaixu dahuluk  Nú 009/PM/III/ iha tinan 2020, nune’e, iha loron 20 Juñu 2021.

Advertisement

Despaixu ne’e hetan alterasaun dahuluk ho númeru  077 /PM/VI/2021, hodi kontinua fó afirmasaun kona-bá reforsa medida serbisu ho ninia área responsabilidade balun maka kona-bá artikula polítika no medidas lejislativas  ne’ebé imposta ba iha prosesu negosiasaun adezaun TL nian ba OMK.

Adezaun TL ba OMK sai mós  metas hosi polítika esterna nasionál  ne’ebé previstu iha Programa  Governu Konstitusionál Daualu nian.

Haktuir hosi despaixu ne’e, membru Komisaun Interministeriál mai hosi instituisaun Estadu relevante no mós ajénsia Autónoma sira ne’ebé durante ne’e fornese ona  hanoin lubuk liuhosi Grupu Traballu sira, hodi elabora no prepara rekezitu sira ne’ebe koloka hosi país membru OMK sira.

To’o ohin loron, Ekipa Grupu Traballu adezaun TL nian ba OMK kontinua halo esforsu hotu hodi hatán  ba pedidu hosi país membru OMK sira kona-bá  komitmentu TL nian hodi sai membru OMK liu hosi resposta hirak ne’ebé fornese hosi membru Grupu Traballu Adezaun Timor-Leste nian ba OMK.

Kompozisaun Membru Komisaun Interministeriál mai hosi Ministru Koordenadór ba Assuntu Ekonómiku, Ministériu Finansa,  Ministériu Saúde, Ministériu Negósiu Estranjeiru no Kooperasaun,  Ministériu  Transporte no Komunikasaun,  Ministériu Turizmu, Komérsiu no Indústria, Ministériu Petróleu no Minerais ho  Ministériu  Justisa.

Advertisement

Despaixu ne’e mós subliña membru sira hosi  Komisaun Interministeriál nu’udár mós membru ba Grupu Traballu nian ne’ebé involve mós  Sekretária  Estadu  Ambiente no Sekretária  Estadu Formasaun Profissionál no Empregu.

Nune’e, mós ajénsia autónoma sira  hanesan TradeInvest,  SERVE, IQTL, AIFAESA,  ANC no  Banku Sentrál  Timor-Leste.

Reuniaun ne’ebé hetan mós partisipasaun hosi  Ministru Ensinu Superiór, Siénsia no Kultura (MESSK), Longuinhos dos Santos no Sekretáriu Estadu Arte no Kultura (SEAK), Teófilo Caldas koloka mós asuntu relevante sira kona-bá akordu ne’ebé Governu TL liuhosi Ministru Koordenadór ba Assuntu Ekonómiku, Joaquim Amaral asina ho Diretór Jerál Organizasaun Mundiál  Propriedade Intelektuál-World Intellectual Property Organization (WIPO), Daren Tang iha Jenebra, Suísa loron 30 Novembru 2021.

Iha abertura reuniaun Komisaun Interministeriál, Xefe Negosiadór adezaun TL ba OMK, Joaquim Amaral espresa sentiment orgullu ba esforsu hotu ne’ebé hala’o hosi komisaun Interministeriál no Grupu Traballu TL nian iha ámbitu adezaun nian.

“Ha’u hakarak solisita nafatin Membru Komisaun Interministeriál tomak hodi kontinua fó ita nia apoiu mai prosesu adezaun iha nível polítika no tékniku, liu-liu hodi bele aselera lejizlasaun pendente no reforma doméstika sira ne’ebé sei fasilita di’ak liu atividade Komérsiu ne’ebé favorável ba setór privadu rai laran, tantu mós ba rai liur hodi adere ba prinsípiu jerál OMK nian,” Hatutan.com sita solisitasaun Joaquim Amaral  iha komunikadu.

Advertisement

MCAE nu’udár Ministru responsável ba adezaun TL nian ba OMK kontinua  koordena intensivamente tantu ho parte interna no esterna hodi bele artikula polítika Governu TL nian  iha prosesu hotu kona-bá adezaun nian.

Durante realizasaun Reuniaun daruak Komisaun Interministerial nian, MCAE ofisialmente  entrega mós Relatóriu Anuál kona-bá “Progresu Adezaun TL ba OMK hahú hosi fulan Jullu 2020 – Jullu 2021” no Relatóriu Traballu hosi vizita ne’ebé hala’o ona hosi Ekipa Grupu Traballu TL nian ba Jenebra, Suísa hosi loron 27 Novembru– 03 Dezembru 2021.

Jornalista: Vito Salvadór

Advertisement