Hatutan.com, (19 Janeiru 2022), Díli—Média Online Hatutan.com ofisialmente asina akordu kooperasaun ho Global Allied Comunication (GAC) Korea du Súl, atu fahe no publika notísia Lian Tetum no mós Lian Korea nian.

General Manajer Hatutan.com, Syeilla Surayya S. Ricardo ho Reprezentante Global Allied Comunication (GAC) Korea du Súl iha Timor Leste, Hyunsung Son ofisialmente asina akordu kooperasaun atu fahe no publika notísia Lian Tetum no mós Lian Korea nian, iha edifísiu Hatutan.com, Kampung Alor, Kuarta (19/01/2022). Foto/Hatutan.com.

Akordu ne’e asina hosi General Manajer Hatutan.com, Syeilla Surayya S. Ricardo ho Reprezentante GAC iha Timor Leste, Hyunsung Son iha edifísiu Hatutan.com, Kampung Alor.

Notisia iha Relasaun:Conselho Imprensa Apresia no Konsidera Prezensa Hatutan.com Importante

“Hatutan.com hanesan média online ne’ebé foun no ki’ikoan tanba ekipa kiik, maibé hetan konfiansa atu servisu hamutuk ho GAC hodi hatutan informasaun relevante hosi Timor ba mundu. Ha’u agradese ba konfiansa ida-ne’e tanba fó espasu ba Hatutan.com go internasionál no hein katak sei la’o di’ak liu tán iha futuru,” intervensaun General Manajer, Syeilla Surayya S. Ricardo.

Nune’e mós Xefe redasaun Hatutan.com, Francisco Belo apresia tanba GAC fihir média hatutan.com hanesan parseiru, maske foun maibé ho espíritu ne’ebé la’ós foun.

“Akordu ohin hanesan istória foun ba Hatutan.com tanba hetan espasu iha mundu liu hosi GAC. Hahú ohin ba oin GAC bele publika notísia hosi Hatutan.com iha lian Tetum no Lian Korea nian atu mundu bele koñese kona-bá realidade Timor,” Francisco Belo, subliña.

Reprezentante GAC iha Timor Leste, Hyunsung Son, espresa sentimentu kontente tanba bele servisu hamutuk ho média Hatutan.com iha situasaun mundu enfrenta hela pandemia Covid-19.

“Timor-oan barak mak servisu iha Korea, espera ho kooperasaun ne’e sira bele haree notísia Hatutan.com nian, tanba GAC kanaliza to’o iha Korea, nune’e ema Korea rasik bele hatene kona-bá saida mak akontese iha Timor,” Hyunsung Son, espresa.

Ekipa Hatutan.com hamutuk ekipa Global Allied Comunication (GAC) Korea du Súl iha Timor Leste, hasai foto hamutuk, hafoin ofisialmente asina akordu kooperasaun atu fahe no publika notísia Lian Tetum no mós Lian Korea nian, iha edifísiu Hatutan.com, Kampung Alor, Kuarta (19/01/2022). Foto/Hatutan.com.

Konteúdu no objetivu hosi kooperasaun ne’e maka promove relasaun kooperasaun órgaun komunikasaun RAYA MEDIA & ENTERTAINMENT, Unipessoal, Lda  (RM&E) ho Global Allied Comunication (GAC), hodi promove publikasaun notísia Hatutan.com nian ho tradusaun Lian Korea.

Alende ne’e, hametin no promove relasaun entre instituisaun rua hodi garante direitu públiku ba informasaun ho loloos no kredível, respeita ba kódigu étika Jornalístika.

Akordu ne’e aplika durante ida hahú hosi 01 Janeiru 2022 to’o 01 Janeiru 2023 no sei estende bainhira parte rua konkorda.

Hatutan.com nu’udár meiu komunikasaun sosiál ho karáter multimédia ho plataforma online ne’ebé mai hosi órgaun komunikasaun sosiál RAYA MEDIA & ENTERTAINMENT, Unipessoal, Lda. Sede: Rua. Av. de Portugal, Nú 74, Díli, Timor-Leste.

Objetivu prinsipál estabelese Hatutan.com  atu sai fonte informasaun ida ba povu Timor-Leste ne’ebé iha kbiit elabora produtu informasaun no notísia-sira hodi fasilita públiku hetan informasaun ho kredivel iha eskalaun nasionál, rejionál no internasionál.

Ekipa Hatutan.com hamutuk ekipa Global Allied Comunication (GAC) Korea du Súl iha Timor Leste, iha ámbitu serimónia asina akordu kooperasaun atu fahe no publika notísia Lian Tetum no mós Lian Korea nian, iha edifísiu Hatutan.com, Kampung Alor, Kuarta (19/01/2022). Foto/Hatutan.com.

Hatutan.com nu’udár mós meiu komunikasaun sosiál fins lukrativu no fornese informasaun kredivel ho loos no momoos atu hakonu direitu públiku ba informasaun no fundamenta tuir artigu 40^o no 41^o Konstituisaun Repúblika Demokrátika Timor-Leste nian, kona-bá liberdade espresaun no liberdade imprensa.

Hatutan.com  nu’udár meiu komunikasaun sosiál ne’ebé eziste iha Timor-Leste ho karáter multimédia ne’ebé bele mós sai sentru opiniaun públiku, forum diskusaun públiku no mós sentru edukasaun-formasaun peskiza no dezenvolvimentu komunikasaun aplikada.

Global Allied Comunication (GAC) nu’udár órgaun komunikasaun sosiál hosi Korea du Súl ne’ebé estabelese tuir Lei aplikável iha Korea du Súl ho kompeténsia prinsipál maka divulga informasaun ba públiku iha territóriu nasionál, rejionál no internasionál.

Jornalista: Carmelita Isaac