Hatutan.com, (25 Janeiru 2022), Dili—Faviana Maria Olga nu’udar matebian Júlio Amaral nia kaben husu atu makaer Lei no Justisa hatuur loloos justisa ida justu ba membru Unidade Polísia Marítima (UPM) na’in-neen (6) ne’ebé deskonfia envolve iha kazu agresaun fíziku hodi rezulta matebian Julio Amaral hakotu-iis.  

Notísia iha Relasaun: Deskonfia Membru UPM Na’in-neen “Oho” Júlio, FONGTIL Husu Ezonera Komandante Jerál PNTL

Membru UPM na’in-neen ne’ebé deskinfa envolve iha kazu omesidiu hodi hakotu Júlio Amaral nia vida. Foto/Foti husi Facebook

Iha Domingu, 23 fulan-Janeiru, maizumenus tuku 04:00 madrugada, mosu kazu omisídiu ida, ne’ebé deskonfia envolve hosi membru Polísia Nasionál Timor-Leste (PNTL), Unidade Polísia Marítima (UPM), hamutuk na’in-neen (6), hasoru vítima Júlio Amaral (41) ho nia alin Marcos Amaral to’o nia maun mate fatin.

Kazu ne’e akontese iha Aldeia Loro, Suku Suai Loro, Postu Administrativu Suai-Vila, Munisípiu Covalima, bainhira membru PNTL na’in-neen, inklui vítima na’in-rua nu’udár maun-alin hosi Suku Camanasa, hetan konvite hodi partisipa iha serimónia inaugurasaun Uma-lisan ida iha área Suai Loro.

“Ha’u hakarak husu ba boot sira hanesan ne’e de’it, autór sira ne’ebé oho ha’u nia la’en tenke responsabiliza sira-nia hahalok tuir Lei no Justisa. Justisa ne’ebé merese tanba ha’u nia laen mate ona no halo ha’u sai faluk no ha’u nia oan sira sai ona oan kiak ba aman,” Faviana Maria Olga  nu’udar kaben husi matebian Júlio Amaral hateten ba RCCT iha Ospitál Nasionál Guido Valadares (HNVG), Dili, Segunda 24 fulan-Janeiru 2022.

Iha fatin hanesan Silvério Cardoso da Costa hateten parte família la simu hahalok membru PNTL na’in-neen ne’e tanba la hatudu sira-nia atitude hanesan ajente Estadu ne’ebé mantein Lei ho Orden, maibé hatudu hahalok atu hanesan fali “bandidu” hodi halo lakon ema seluk nia vida.

 “Ami husi parte família la satisfás ba hahalok vandalizmu husi oknum UPM na’in-neen, ne’ebé halo ami nia maun ka ami nia alin Júlio Amaral lakon nia vida,” Silvério Cardoso da Costa hateten ne’ebé Hatutan.com sita hosi RCCT.

Jornalista: Rogério Cárceres