Hatutan.com, (29 Janeiru 2022), Dili-Asosiasaun Antigu Alunu Dom Bosco, selebra loron falesimentu Dom Bosco nian (31 fulan-Janeiru 1888-31 fulan-Janeiru 2022) ho atividade prinsipál tolu, kompostu husi atividade  kuda ai-oan 500 iha Aldeia Lisbutak, misa solenidade ne’ebé hala’o iha loron Sábadu kalan no atividade kalan ksolok ho Dom Bosco.

Oráriu selebrasaun loron Dom Bosco. Foto/Espesiál

Iha selebrasaun loron falesimentu Dom Bosco nian ba tinan ne’e ho tema “Halo Buat Hotu ho Domin, La’ós Ho Forsa” ne’e, hahú ho atividade atividade primeiru kuda ai-oan hun 500 iha área Lisbutak, Suku Manleuana, Postu Administrativu Dom Aleixu, Munisípiu Dili ne’e  ho objetivu atu prevene risku inundasaun ne’ebé akontese beibeik ona iha área refere.

“Husi ai-oan 500 ne’e maka hanesan, bambuu, kakeu, mahoni, limba no kulu maske kuda iha ema nia-rai, maibé deside kuda iha área ne’e hodi prevene risku inundasaun,” reprezentante Asosiasaun Antigu Alunu Dom Bosco, Dili, Horácio Guimarães ba Hatutan.com hafoin kuda ai-oan iha área Lisbutak, Sábadu (29/01/2022).

 Partisipa iha atividade kuda ai-oan ne’e maka hanesan Eis  Xefe Estadu Major  FALINTIL-Forsa Defeza Timor Leste (F-FDTL) Tenente Jenerál Lere Anan Timor, inklui eis Ministru Transporte no Komunikasaun ne’ebé nu’udar  mós antigu alunu Dom Bosco.

Jornalista: Carmelita Isaac