Connect with us
Pakote Ahi

Polítika

Lere: “Ha’u Ba CCF La’ós Atu Kompete Malu”

Published

on

Hatutan.com, (03 Fevereiru 2022), Dili-Eis Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál reformadu, Titó Cristóvão da Costa “Lere Anan Timur”, esklarese katak nia ho nia ekipa ba Comite Central FRETILIN (CCF) atu foti kartaun membru FRETILIN, la’ós atu ba kompete-malu ka hadau-malu podér iha  FRETILIN nia laran.

Notísia iha Relasaun: BREAKING NEWS: CCF “Taka”, Lere ho Ekipa Seidauk Foti Kartaun Membru FRETILIN

Lere Anan Timur halo konferénsia imprensa iha nia rezidensia, Dili, 03 Fevereiru 2022. Foto/Hatutan.com

Tuir ajenda katak Lere Anan Timur ho nia ekipa atu ba CCF foti kartaun membru FRETILIN iha kedas loron, 01 fulan-Fevereiru 2022. Maibé tanba CCF “feriadu” loron Implek ka tinan foun Xinés nian, la konsege ba foti.

Informasaun ne’ebé ekipa susesu kandidatura Prezidente Repúblika 2022-2027, Lere Anan Timur nian fó sai katak posivel boot Lere ho nia ekipa sira ba foti kartaun membru CCF ne’e iha Kinta (03/02/2022). Maibé,  kontinua kansela ka adia tan fali to’o loron ne’ebé seidauk fiksa. 

Advertisement

“Ha’u la ko’alia barak, primeiru, ha’u hakarak ko’alia kona-bá ha’u atu ba sede CCF, atu foti ha’u nia kartaun nu’udár militante FRETILIN nian. Maibé, ha’u altera, ha’u ba mós, ha’u FRETILIN nafatin, ha’u la ba mós, ha’u FRETILIN nafatin,” membru CCF segundu jerasaun ne’e haktuir liuhusi konferénsia imprensa ne’ebé hala’o iha nia rezidénsia iha Pantai Kelapa, Dili, Kinta ne’e.

Lere afirma, dala-ruma ema balu halo interpretasaun oioin katak, nia atu ba CCF hodi foti kartaun militante ne’e, atu kompete ho nia maluk sira ne’ebé mak oras ne’e iha hela CCF ne’ebá.

Lere rekoñese Marí Alkatiri, hanesan fundadór FRETILIN nian. Tuir Lere ida-ne’e ema ida la bele nega no la bele iha ema ida mak atu minimiza kapasidade Marí Alkatiri nian, nu’udár jestór di’ak, no ema polítiku ida.

“Ha’u nunka mehi atu ba CCF hadau ka kompete ho ha’u nia camarada sira ne’ebé mak agora atualmente iha CCF ne’ebá, no liu-liu ha’u nia maun Ramos Horta, ho ha’u nia maun Lú Olo,” Lere hateten.

Maske ne’e, iha instituisaun militár ninia laran ne’ebé mak konstituisaun bandu, militár tenke apartidária. Maibé, Lere deklara beibeik katak, nia partidu mak FRETILIN no nia ruin ho ran FRETILIN.

Advertisement

“Mas ha’u hatete katak, á prática é critéria da verdade. Ha’u FRETILIN, atu defende FRETILIN ka lutu ba nasaun tomak. Ida-ne’e ha’u labele ko’alia, situasaun ka tempu naruk ne’ebé ha’u kaer forsas armadas, maka sei ko’alia, tempu mak sei ko’alia.”

Lere deklara tán, nia la’ós ona FRETILIN bainhira rán FRETILIN nian ne’ebé mak halai hosi nia isin-lolon, mate ona. Maibé, rán ne’e sei moris hela, mak nia FRETILIN nafatin.

“Razaun ida ne’e maka ohin loro-kraik ami la bá, ha’u la bá, mas loron sei bá, tanba ha’u FRETILIN nafatin. Ha’u repete tán, ohin bá simu mós, ha’u FRETILIN, ohin la ba simu mós, ha’u FRETILIN nafatin. Ema ida labele nega, FRETILIN ida ne’ebé mak mai hosi rán no isin,” Lere deklara tán.

Lere Anan Timur mós, rejeita ho informasaun ne’ebé espalla dehan, Sekretáriu Jerál FRETILIN, Marí Bin Amude Alkatiri mak orienta taka odamatan CCF ba nia ho ekipa.

“Ne’e laloos, tanba dala-ruma ema mak hakarak halo de’it espekulasaun. Ha’u nia maun Marí nunka bele taka odamatan ba ha’u, nia hatene. Nia labele taka dalan, ne’e informasaun ida ne’e, buat sokar lia, para ita ho ita problema, mais ba ha’u ema ida lakohi halo problema ho imi,” Lere hateten tan . 

Advertisement

Dala-ruma Marí Alkatiri ho orgullu hodi hatete ba Lere katak, maske hanesan ema jenerál ida ne’ebé hatais hela farda, maibé deklara aan nu’udár ema FRETILIN.

“Ha’u hadomi ha’u nia maun sira ne’e hotu-hotu. Bele moras aat, bele buan, ha’u nia maun ne’e, maun, ha’u nia aman ne’e, aman. Ita labele dehan katak, nia moras aat, nia la’ós ha’u nia aman ne’e, laiha. Ita nega, ne’e maka ha’u hanoin katak, informasaun sira ne’e, mesak boatu de’it, sokar lia, para kria problema entre maun-alin,” Lere hateten.

1981 Sai Membru CCF 

Lere Anan Timur. Foto/Hatutan.com

Lere Anan Timur haktuir, iha 03 fulan-Marsu 1981, liuhosi konferénsia iha Maubae, eleje nia nu’udár mós membru ida iha CCF ba segunda jerasaun ninian.

Iha konferénsia ne’e, foti sira na’in-sia (9) ba membru CCF ba segunda jerasaun, no iha ne’ebá maka foti Lere, Abílio Araújo ba Prezidente FRETILIN, no mós Prezidente Repúblika no iha Maubae maka foti mós Marí Alkatiri, ba relasoins internasionál.

“Ida ne’e ami nia istória, imi lahatene, iha ne’ebé maka foti ami na’in-sia ba membru CCF da segunda jerasaun. Sira mate hotu ona, hela ha’u mesak,” dehan Lere.

Advertisement

Tenente Jenerál reformadu, Lere Anan Timur, hatutan, membru CCF ne’ebé mak harii ukun-aan ida ne’e, mak hela sira na’in-tolu. Xanana, nia (Lere), no saudozu Ma’huno Bulerek Karathayano. Maibé, nia maun Xanana nu’udár primeiru jerasaun CCF, no nia (Lere), hanesan segunda jerasaun. Tanba ne’e, Lere dehan, bainhira ema ruma mak konsidera konferénsia nasionál Maubae, la vále, maka Lere husu atu ko’alia loloos, no deklara ba públiku katak, konferénsia Maubae, la vale.

“Sé mak brani, dehan katak, konferénsia Maubae, la vále. Akta da reuniaun Maubae nian, ha’u iha, iha seluk-seluk mós iha, mais seidauk iha momentu ida ke realiza konferénsia iha ai-laran, atu disolve partidu FRETILIN. So kestaun de polítika unidade nasionál, ha’u repete tán, maun Xanana halo apelu ba forsas armadas libertasaun nasionál Timor-Leste, atu sai hosi partidu. Nia mós sai uluk, depois ami sai tuir. Ne’e kestaun estratéjiku funu nian, la’ós atu disolve. Disolve ne’e oin seluk, atu hasees ne’e, oin seluk.

Jornalista: Rogério Cárceres

 

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Polítika

FRETILIN Kestiona Diskursu Prezidente Repúblika iha 20 Maiu La Hato’o Realidade Timor-Leste

Published

on

Hatutan.com, (21 Maiu 2024), Díli— Xefe Bankada FRETILIN, Aniceto Longuinhos Guterres Lopes, kestiona diskursu Prezidente Repúblika, José Ramos-Horta iha ámbitu komemorasaun loron  restaurasaun independénsia bá dala-XXII (20 Maiu 2002-20 Maiu 2024) tanba la refleta situasaun rai-laran.

(more…)

Kontinua Le'e

Polítika

Restaurasaun Independénsia bá Dala-22, PN Husu Timoroan Tomak Halo Reflesaun

Published

on

Hatutan.com, (17 Maiu 2024), Díli—Parlamentu Nasionál (PN) liuhosi deputada bankada FRETILIN, Nurima Ribeiro Alkatiri husu timor oan tomak atu halo reflesaun bá situasaun hotu-hotu ne’ebé Timor-Leste konsege ultrapassa iha nasaun soberanu ida-ne’e.

(more…)

Kontinua Le'e

Polítika

Lider Bankada PN Deside Bolu Ministra Saúde Élia Amaral

Published

on

Hatutan.com, (16 Maiu 2024), Díli– Parlamentu Nasionál (PN) liuhusi Sekretária Meza Parlamentár, Deputada Virgina Ana Belo, informa rezultadu reuniaun bankada, deside sei halo plenária estraordinária iha  Kuarta,  22 fulan-Maiu 2024, hodi bolu Ministra Saúde (MS), Élia A.A dos Reis Amaral, atu buka solusaun bá problema saúde ne’ebé daudaun ne’e akontese iha Timor-Leste.

(more…)

Kontinua Le'e
Advertisement

Trending