Hatutan.com, (09 Fevereiru 2022), Díli—Konsellu Ministru (KM) liu hosi soru-mutu ordinária, aprova ho alterasaun ho objetivu atu aprova medida reforsu ba distribuisaun Cesta Bázika ba família Timor-oan ne’ebé presiza liu no apoiu operadór ekonómiku lokál sira, kria rejime espesiál ida kona-bá aprovizionamentu ne’e rasik, iha ámbitu planu rekoperasaun ekonómika, ne’ebé aprezenta hosi Ministru Koordenadór Assuntus Ekonómiku, Joaquim Amaral.

Abitante sira simu sasán Cesta Bázika, 2020. Foto/EPA

Iha projetu Dekretu-Lei ne’e, Governu hakarak kontinua fó produtu nesesidade dahuluk nian ba komunidade, hodi garante sustentabilidade família sira nian, no iha tempu hanesan atu kria kondisaun normalidade ba atividade produtór no operadór ekonómiku nasionál nian tanba prokura menus.

Notisia iha Relasaun:Implementasaun Cesta Bázika, CAC salva osan Estadu $66,301,56

“Cesta Bázika ne’e fiksa ho valór másimu $50 ba membru ida-idak iha uma-ka’in benefisiáriu no sei distribui durante tinan 2022,” Hatutan.com sita komunikadu.

Advertisement

Cesta Bázika kompostu hosi produtu ai-hán no sasan ijiéne pessoál, hanesan deskrisaun, kuantidade no folin sei define liuhosi despaixu konjuntu membru Governu sira nian, ne’ebé responsável iha área komérsiu no indústria inklui  kooperativa sira.  

Produtu lubun ida-ne’e bele troka ho “voucher” hodi sosa sasan sira no medida Cesta Bázika ne’e limite ba ema sira ne’ebé presiza liu apoia ai-hán, hanesan hakerek ona iha “Livru Rejistu Uma-Ka’in nian.

Ba sidadaun sira ne’ebé ho titulár órgaun soberania no titulár kargu diresaun ka xefe departamentu sira hosi servisu Administrasaun Públika direta ka indireta Estadu nian, la inklui iha lista benefisiáriu nian.

La inklui mós sidadaun sira ho ninia membru “Uma-Ka’in” ho rendimentu mensál boot liu $500.

Ho diploma ida-ne’e, prosesu akizisaun no distribuisaun Cesta Bázika limite ba kooperativa no operadór ekonómiku sira ne’ebé konstitui formalmente, laiha dívida ba autoridade tributária no ne’ebé maioria hosi kapitál sosiál sosiedade nian ne’ebé detida hosi sidadaun Timoroan ida-idak.

Advertisement

Konsellu Ministru mós aprova ho alterasaun ba Dekretu-Lei, ne’ebé aprezenta hosi Ministru Koordenadór Asuntu Ekonómiku, kona-bá estrutura Orgánika Inspesaun-Jerál Traballu (IJT) nian.

Diploma ida-ne’e ho objetivu atu prosede ba re-estruturasaun no reorganizasaun IJT, liuhosi ampliasaun ba ninia estrutura orgánika, ho kriasaun ba diresaun nasionál no delegasaun territoriál ne’ebé importante hodi hasa’e relasaun serbisu ne’ebé sei fiskaliza.

Espansaun ida-ne’e, tenke kontribui nune’e Estadu bele garante hodi hadi’a kondisaun serbisu ida efetivu ba ema hotu ne’ebé serbisu iha Timor-Leste.

Konsellu Ministru aprova mós projetu Rezolusaun Governu nian, aprezenta hosi Ministra Saúde, Odete Freitas Belo, ne’ebé aprova Polítika Nasionál kona-bá Planeamentu Familiár.

Polítika ida-ne’e ho objetivu atu adapta konseitu planeamentu familiár nian ne’ebé integradu no apropriadu kulturalmente ho kontestu Timor-Leste, ho konsiderasaun ba kompromisu polítiku ne’ebé motiva ona adezaun nasionál ba Planu Asaun Konferénsia Internasionál ba Populasaun no Dezenvolvimentu.

Advertisement

Planeamentu familiár importante tebes atu hamenus mortalidade inan ho empoderamentu inan-feton sira nian, hanesan liuhosi asaun akonsellamentu jenétiku no konjugál, informasaun ba métodu no fornesimentu meius kontrasesaun, tratamentu infertilidade, prevensaun moras hosi tranzmisaun seksuál no rastreiu kankru jenitál.

Métodu planeamentu familiár konstitui mós instrumentu privilejiadu ba defeza saúde inan no oan, prevensaun ba abortu no defeza saúde no kualidade moris família sira nian.

Iha biban hanesan Konsellu Ministru aprova mós projetu deliberasaun ida, ne’ebé aprezenta hosi Sekretáriu Estadu Protesaun Sivil, Joaquim José Gusmão dos Reis Martins, kona-bá substituisaun Vise-Ministru Interiór nian, relasiona ho alterasaun kontratu ba konstrusaun foun Kuartél-Jenerál Polísia Nasionál Timor-Leste (PNTL).

Kontratu ba konstrusaun ne’e asina iha loron 26 fulan-Janeiru tinan 2018, entre Estadu Timor-Leste ho Shanghai Construction Group Co., Ltd.

Maibé, hafoin inísiu ezekusaun kontratu, haree katak projetu ne’e falla no bele afeta seguransa ba konstrusaun.

Advertisement

Estudus ne’ebé hala’o ona konklui katak iha nesidade atu halo alterasaun ba projetu atu bele reforsa fundasaun.

Konsellu Ministru aprova projetu ba Proposta Rezolusaun Parlamentu Nasionál nian, aprezenta mós hosi Ministra Negósius Estranjeirus no Kooperasaun, ba ratifikasaun Akordu Mobilidade entre Estadus-Membrus Comunidade Países Língua Portuguesa (CPLP).

Akordu ida-ne’e aprova ona iha Sorumutu Konsellu Ministru CPLP nian ba da-26, ne’ebé hala’o iha Luanda, Angola, iha loron 16 fulan-jullu tinan 2021.

Akordu Mobilidade ne’e hanesan Akordu-kuadru ida ne’ebé estabelese baze legál kona-bá oinsá sei harii mobilidade no sirkulasaun ida boot liu iha espasu CPLP nian, permite atu promove fasilitasaun ba sirkusaun sidadaun sira hosi países-membrus nian iha espasu CPLP.

Aprova mós projetu Rezolusaun Governu nian, ne’ebé aprezenta hosi Ministru Administrasaun Estatál, Miguel Pereira de Carvalho, ba akizisaun boletin votus nian ne’ebé destina ba eleisaun Prezidensiál tinan 2022.

Advertisement

Haree ba urjénsia iha akizisaun boletin votus nian ne’ebé nesesáriu ba realizasaun eleisaun ba Prezidente Repúblika, liuhosi Rezolusaun Governu ida-ne’e, fó autorizasaun ba Sekretariadu Tékniku Administrasaun Eleitorál (STAE) hodi instraura prosedimentu define katak produsaun aprovizionamentu nian liuhosi ajusta diretu no define katak produsaun hosi boletin votus bele realiza hosi Imprensa Nasionál Timor-Leste.

Aprova mós projetu Dekretu-Lei, ne’ebé aprezenta hosi Ministru Assuntus Kombatentes Libertasaun Nasionál, Júlio Sarmento da Costa “Meta Mali”, alterasaun dahituk ba Dekretu-Lei nú. 15/2008, loron 4 fulan-juñu, kona-bá pensaun kombatente no mártir sira libertsaun nasionál nian.

Projetu Dekretu-Lei ne’e ho objetivu atu atribui kompeténsia ba Administrasaun Konsellu Kombatentes Libertasaun Nasionál hodi aprova regra sira kona-ba movimentasaun konta bankária destinada ba depózitu retensaun kona-bá pensaun kombatente no mártir sira libersaun nasionál nian no ba administrasaun no prestasaun kontas ba fundu ne’e rasik.

Projetu Rezolusaun Governu nian kona-bá donativu ba Reprezentasaun Permanente Repúblika Árabe Saaraui Demokrátika, propoin hosi Ministra Negósius Estranjeirus no Kooperasaun, Adaljiza Albertina Xavier Reis Magno, aprova hosi Konsellu Ministru.

Medida ne’e reforsa laxu istóriku ne’ebé tau hamutuk Timor-Leste no Repúblika Árabe Saaraui Demokrátika, bazeia ba dezeju komún iha luta autodeterminasaun nian, iha prinsípiu solidariedade ho povu nia luta ba libertasaun nasionál no direitu ba ninia autodeterminasaun noindependénsia, prezente iha Konstituisaun Repúblika, iha Rezolusaun Parlamentu Nasionál ba solidariedade no apoiu ba povu Saaraui, no iha faktu Timor-Leste kontribui, hosi tinan 2011, ba funsionamentu hosi Reprezentasaun Permanente iha Dili, liuhosi konsesaun subsídiu anuál hodi hala’o ninia atividade sira iha Timor-Leste no iha rejiaun.

Advertisement

Ikus liu, Ministru Justisa, Manuel Cárceres da Costa, aprezenta ba Konsellu Ministru opsaun polítika lejizlativa subjasente ba inisiativa prosedimentu akizisaun hosi sidadaun nasionál ho beins imóveis ne’ebé uluk pertense ba sidadaun estranjeirus sira nian, fó fila ona ba Estadu.

Jornalista: Vito Salvadór