Hatutan.com, (10 Fevereiru 2022), Díli—Polísia Nasionál Timor-Leste (PNTL), Komandu Munisípiu Díli, liuhosi operasaun iha Kuarta 09 Fevereiru 2022 iha tuku 22:00 kalan, prende motorizada hamutuk 45, tanba laiha dokumentu.

Komandante Munisípiu Díli, Superintendente Xefe Polísia, Hendrique da Costa. Foto/Hatutan.com.

PNTL ninia alvu hosi operasaun ne’e atu kontrola sidadaun sira ne’ebé la’o iha tempu kalan, lori sasan kro’at ka arma branka, halo kedan prevensaun ba matéria droga, nune’e evita konflitu iha kapitál nasaun.

Notisia iha Relasaun:PNTL Díli Sei Intensifika Operasaun La’o Ain iha Kalan

“Horkalan ita pasa revista la hetan evidénsia seluk hanesan droga, sasan kroat, maibé transporte hirak ne’ebé laiha dokumentus, sira ne’ebé mak laiha asesores, ita halo aprensaun, nune’e pasa billete multa. Agora daudaun, mai ona iha parte Tránzitu munisípiu Díli nian, atu  bele pasa multa,” Komandante PNTL Munisípiu Díli, Superintendente Xefe Polísia, Hendrique da Costa, hateten iha kna’ar fatin Komandu Caicoli, Kinta (10/02/2022).

Operasaun PNTL nian ne’e, hala’o iha fatin tolu mak hanesan, Postu Administrativu Cristo Rei, Na’in-Feto, ho Dom Aleixo.

PNTL hala’o seguransa ba ekipa konjunta ne’ebé ezekuta mandadu Tribunál Distritál Díli nian iha Ai-mutin, Díli (10/02/2022). Foto/PNTL.

Maski nune’e, durante operasaun, Polísia la konsege deteta sidadaun ruma mak lori sasan kro’at, ho matéria droga.

Operasaun ne’e sei iha kontinuasaun, tanba PNTL Díli sempre hetan apoiu másimu hosi membru sira iha  Unidade Espesial da Polisia (UEP), Unidade Polisia Maritima (UPM), ho Unidade Patrullamentu Fronteira (UPF), ne’ebé destakadu iha postu Aeroportu Internasionál Nicolau Lobato nian, hodi halo mós pasa revista.

“Bainhira halo movimentu, labele haluha, lori dokumentus, nomós haree asesóres karreta ka motór ninian, nune’e bainhira hasoru-malu ho ita nia parte seguransa ne’ebé mak halo pasa revista bele aprezenta ba polísia,” Komandante Hendrique, fó-hanoin.

Jornalista: Rogério Pereira Cárceres