Hatutan.com.com, (10 Fevereiru 2022), Díli- Sekretáriu Estadu Komunikasaun Sosiál (SEKOMS), Mericio Juvenal dos Reis “Akara” hato’o parabéns ba mídia online Hatutan.com ne’ebé foin eziste fulan-neen (6), maibé hatudu ninia kualidade notísia ho ritmu no karater reportajen kle’an no investigativu.

Notísia iha Relasaun: Conselho Imprensa Apresia no Konsidera Prezensa Hatutan.com Importante

Hatutan.com nu’udár meiu komunikasaun sosiál ho karater multimedia no plataforma online ne’ebé mai hosi órgaun komunikasaun sosiál RAYA MEDIA & ENTERTAINMENT, Unipessoal, Lda, ho nia sede iha Rua. Av. de Portugal, Nú 74, Kampung Alor, Díli, Timor-Leste.

Hatutan.com nu’udár mós meiu komunikasaun sosiál fins lukrativa no fornese informasaun kredivel ho loos no momoos, atu hakonu direitu públiku ba informasaun no fundamenta tuir artigu 40 no 41 Konstituisaun Repúblika Demokrátika Timor-Leste, kona-bá liberdade espresaun no liberdade imprensa.

Hatutan.com ne’ebé estabelese iha loron 20 fulan-Agostu 2021, no rejistadu iha Órgaun Reguladóra Meius Komunikasaun Sosiál Conselho Imprensa (CI) Timor-Leste.

Sekretáriu Estadu Komunikasaun Sosiál (SEKOMS), Mericio Juvenal dos Reis “Akara”. Foto/Hatutan.com

“Ha’u hakarak fó parabens ba Hatutan.com tamba sira mai hariku liután ita-nia servisu mídia iha ita-nia rai-laran, sira halo servisu di’ak loos, agresivu loos, investigativu, la’ós refere ba asuntu a, b, c mais rigór bazeia ba faktu husi baze,” SEKOMS Mericio Akara ba jornalista sira hafoin partisipa iha serimónia lansamentu  livru Planu Estratéjiku Conselho de Imprensa (CI) ba tinan 2022-2027 iha Edifísiu CI, Kintál-Boot, Dili, Kinta (10/02/2022).

Nia afirma, Hatutan.com kontinua hala’o nia knar  hanesan mídia sira seluk hodi kompleta mídia sira seluk ne’ebé eziste antes ona hodi fornese informasaun  ho kualidade depois públiku maka tetu atu asesu ida ne’ebé.

 “Ha’u hanoin Hatutan.com fó ánimu foun, kór foun tan, hariku liután ita nia knar mídia iha ita-nia rai. Parabéns ba ekipa Hatutan.com, lalika ta’uk halo ita-boot sira nia servisu tuir de’it kódigu konduta ita-boot sira nian, lalika ta’uk ho intervensaun oin-oin,” Sekretáriu Estadu Komunikasaun Sosiál ne’e hateten.

Jornalista: Vito Salvadór