Hatutan.com, (21 Fevereiru 2022), Díli-  Liga Futeból Timor Leste (LFTL) hahú loke janela transferénsia ba jogadór nasionál hodi fó oportunidade ba klube sira primeira no segunda divizaun halo kontratu ho jogadór atu bele reforsa sira nia klube ba époka 2022.

Notísia iha Relasaun: LFTL ho Klube Sira Diskute Planu Asaun 2022-2025

LFTL hahú loke janela transferénsia ba jogadór nasionál époka 2022. Foto/Hatutan.com

Janela transferénsia jogadór ne’e loke husi loron 21 fulan-Fevereiru 2022 to’o iha loron 21 fulan-Marsu 2022, ba kategoria jogadór nasionál no jogadór estranjeiru ka internasional janela transferénsia hahú tiha ona iha loron 10 fulan-Fevereiru liubá tuir kalendáriu Asian Football Confederation (AFC) no sei iha alterasaun karik klube sira iha LFTL nesesita atu halo transferénsia ba jogadór estranjeiru liu husi data determinante.

Diretór Verifikasaun no Lisensiamentu Klube, José Calvalho, hateten liu husi biban ida-ne’e órgaun liga hakarak informa ba klube sira hotu katak janela transferénsia hahú loke ona, nune’e LFTL hahú simu rejistrasaun ba jogadór sira husi kada klube ne’ebé sei kompete iha primeira no segunda divizaun époka ne’e.

Ba jornalista sira iha Edifísiu FFTL, Dili, Segunda (21/02/2022),  José Carvalho esplika, LFTL époka ne’e fila hikas ba normalidade nune’e kompetisaun sei hala’o ho modelu uma nain (Home) no bainaka (away) signifika jogu Full Competition tamba ne’e órgaun liga disponibiliza ba klube sira atu kada klube sei rejista jogadór másimu 27 too 30 depende ba jestaun interna klube nian no órgaun liga mós fó oportunidade atu kada klube bele rejista jogadór estranjeiru liu na’in-haat.

Kalendáriu tentativa

“Ita fó oportunidade atu klube sira rejista mos jogadór estranjeiru na’in-lima  to’o neen. LFTL tenta hela mekanizmu balun atu kada klube minimu tenke kontrata jogadórASIA ida tuir regulamentu AFC nian,” nia akresenta.

Diretór Verifikasaun no Lisensiamentu Klube, subliña Timor-Leste sei enfrenta eventu nasionál eleisaun prezidensiál, nune’e tuir kalendáriu tentativa ne’ebé órgaun liga iha jogu hotu iha primeira no segunda divizaun LFTL époka ne’e sei halo loron 21 fulan-Abríl no sei remata iha fulan-Novembru 2022.

Total jogu primeira no segunda divizaun LFTL époka 2022 hamutuk 126 jogu no primeira divizaun sei hala’o jogu iha estádiu Munisipál Díli no estádiu Cafe Gleno, Ermera enkuantu ba jogu segunda divizaun sei hala’o hotu iha Díli.

Jornalista: Vito Salvador