Hatutan.com, (06 Marsu 2023), Díli—Xefe Suku na’in-ualu (8) iha postu administrativu Letefoho, munisípiu Ermera sei hato’o karta protestu ba Ministériu Edukasaun Juventude no Desportu (MEJD), Ministériu Obras Públikas (MOP) no Komisaun G Parlamentu Nasionál (PN) trata Asuntu Edukasaun, Juventude, Kultura no Sidadania.

Xefe Suku Haupu, Eusébio Alcino. Foto/Cipriano Colo.

Xefe Suku na’in-ualu ne’e sei eprezenta karta protestu tanba rai ne’ebé oras-ne’e daudaun MEJD utiliza hodi halo konstrusaun bá edifísiu foun Eskola Sekundáriu Jerál (ESJ) Cesar Maulaka ho sala de aula neen iha suku Haupu, Postu administrativu Letefoho-Vila, sai polémika tanba Administradór deside mesak no la konsulta ho parte relevante sira hanesan na’in ba rai inklui autoridade lokál sira.

Lee Mós: Polémika Rai Konstrusaun Eskola Cesar Maulaka, Administradór Letefoho Husu MOP-MEJD Foti Desizaun 

Xefe Suku Haupu, Eusébio Alcino ba Hatutan.com via telefónika hateten, molok halo konstrusaun bá edifísiu ne’e autoridade lokál sira kompostu hosi Xefes uku na’in-ualu hato’o ona karta protestu bá Administradór Letefoho António Manuel Soares no mós Prezidente Autoridade Munisípiu Ermera Eusébio Salsinha maibé la konsidera.

Advertisement

“Karta protestu ne’ebé antes ne’e ita hato’o ba Administradór ho Prezidente Autoridade ne’e, Xefe Suku na’in-ualu mak asina ho pozisaun klaru katak, rai ne’e sei iha disputa hela entre na’in bá rai no mós Administradór halo abuzu podér hodi la konsulta ho autoridade lokál sira no deside mesak. Karta ne’e mós sira simu tiha, maibé la aprezenta preokupasaun ne’e bá MEJD no MOP. Tanba ne’e mak ita sei hato’o karta protesta ne’e ba Ministériu rua ho Komisaun G PN nian atu bele tun direta hodi buka solusaun molok inaugura edifísiu ne’e,” Xefe Suku Haupu, Eusébio Alcino hanesan portavóz ko’alia ba Hatutan.com, Segunda (06/03/2023).

Portavóz ne’e dehan, MEJD tenke buka duni solusaun bá problema ne’e molok halo inaugurasaun tanba rai ne’e iha hela disputa nia laran tanba MEJD rasik la konsulta ho parte Terras no Propriedade bainhira halo konstrusaun ba edifísiu ne’e.

“Iha semana ne’e nia laran ami sei halo audiénsia ho Ministru Edukasaun Joventude no Desportu, Ministru Obras Públika no Komisaun G Parlamentu Nasionál atu aprezenta karta protestu ne’e, nune’e bele hetan solusaun ba disputa ne’e,” nia hateten.

Distansia konstrusaun edifisiu eskola Cesar Maulaka ho estrada publiku kuaze metru ida ho balun. Foto/Cipriano Colo.

Autoridade lokál ne’e dehan, antes ne’e mak Prezidente Autoridade ho Administradór simu tiha karta protestu ne’e mak hato’o kedan ba Ministériu rua ne’e karik, la mosu problema.

“Maibé sira simu tiha karta ne’e sira nonok tiha no hato’o relatóriu ba Ministériu dehan katak, laiha problema maski realidade iha terrenu rai ne’e sei disputa hela,” nia subliña.

Karta protestu ne’e autoridade lokál sira sei hato’o mós bá Ministru Obras Públika atu intervein tanba ministériu ne’e mak halo uluk planu no koordenasaun di’ak ho komunidade no xefe suku sira atu konstrui rotunda iha fatin ne’e, maibé derrepente MEJD halo uluk konstrusaun ba edifísiu eskola no la konsulta ho autoridade lokál inklui na’in ba rai.

Advertisement

Alende ne’e, sei hato’o mós ba Komisaun G Parlamentu Nasionál (PN), atu halo fiskalizasaun ba projetu ne’e tanba rai ne’e sei iha hela disputa nia laran.

Oras-ne’e daudaun Ministériu Edukasaun Juventude no Desportu utiliza rai hodi halo konstrusaun ba edifísiu foun Eskola Sekundáriu Jerál Cesar Maulaka ho sala de aula neen iha suku Haupu, Postu administrativu Letefoho-Vila kuaze konstrusaun fíziku atinje ona 95% no hein de’it atu halo inaugurasaun.

Antes ne’e Prezidente Autoridade Munisípiu Ermera rekoñese katak, nia simu duni reklamasaun hosi na’in ba rai Vicky Chang ho sasin Eis Ministru Justisa Domingos Sarmento, maibé la aprezenta dokumentu kompropativu ruma.

Alende ne’e, Prezidente Autoridade Munisipiu Ermera ne’e mós simu duni karta protestu hosi autoridade lokál sira, tanba iha kestaun laiha koordenasaun entre Administradór ho xefe suku sira durante prosesu levantamentu no konstrusaun edifísiu eskola ne’e.

Xefe Suku ualu (8) ne’ebé pertense ba postu administrativu Letefoho hanesan Xefe Suku Dukurai, Eraulu, Goulolo, Hatugau, Haupu, Katrai Kraik, Katrai Leten no Lauana.

Advertisement

Lee Mós: Polémika Konstrusaun Eskola Cesar Maulaka, MEJD La Koordena ho Diresaun Terras no Propriedade Ermera

Jornalista: Cipriano Colo