Hatutan.com, (04 Marsu 2022), Díli—Comissão Nacional das Eleições (CNE), husu ba kandidatu sira Prezidente Repúblika,  durante kampaña labele transporta apoiante hosi munisípiu ida ba munisípiu seluk.

Prezidente CNE, José C. Belo Perreira. Foto/Hatutan.com.

CNE husu ne’e tanba monitorizasaun no supervizaun durante kampaña eleitorál loron rua nian, rejista infrasaun balun liuliu iha kandidatu balun ho transporte hodi transporta fali apoiante hosi munisípiu ida ba fali munisípiu seluk.

Notisia iha Relasaun:Kampaña iha Baucau, Isabel Ferreira Husu Ba Povu Foti Desizaun Ho Loos

“Husu ba ekipa atu mobiliza movimentu hosi Munisípiu, no labele foti fali ema hosi Munisípiu seluk ba fali kampaña iha munisípiu seluk,” Prezidente CNE, José C. Belo Perreira hateten iha salaun CNE, Kaikoli, Sesta (04/03/2022).

Alende ne’e CENE husu mós ba kandidatu sira atu hadi’a, tanba labarik sira involve iha fatin kampaña ho motivu oi-oin.

Fó hanoin ba kandidatu sira tenke kumpri kalendáriu kampaña ne’ebé deside hamutuk ona no evita mini kampaña tanba iha lei laiha mini kampaña hodi asegura kampaña ne’e la’o ho di’ak.

CNE bandu mós apoiante sira ne’ebé mak partisipa iha kampaña, labele lori fali símbolu ka hakilar fali naran hosi arte marsiais, tanba iha munisípiu Ainaro detekta katak iha apoiante sira balun uza mós simbolu Grupu Arte Marsiál (GAM) hodi hakilar, maske la indika kanditura se maibé husu atu respeita ba paktu eleisaun ne’ebé asina ona.

CNE sei kontinua halo supervizaun ba infrasaun ne’ebé akontese iha prosesu kampaña inklui sujestaun ne’ebé CNE hato’o ona, ekipa kada kandidatu atu tau prioridade no hadi’a infrasaun ne’ebé akontes ona iha kampaña loron dahuluk nian.

Jornalista: Carmelita Isaac