Hatutan.com, (05 Marsu 2022), Dili-Forsa seguransa fronteira terrestre Repúblika Indonézia  ho Repúblika Demokrátika Timor-Leste (Satgas Pamtas RI-RDTL, sigla Indonézia) Yonif 743 PSY halo apreensaun ba kareta antigu ida ho marka Land Rover 3000 cc iha área mota Noelekat, Timor Osidentál,  Sábadu (05/03/2022).

Notísia iha Relasaun: UPF Sempre Garante Seguransa Iha Liña Fronteira

Karreta antigu ho marka marka Land Rover 3000 cc ne’ebé TNI halo apreensaun iha área mota Noelekat, Timor Osidentál, 05 Marsu 2022. Foto/Espesiál

Informasaun ne’ebé Hatutan.com sita husi MNC Portal (iNews.id) katak forsa seguransa TNI (Tentara  Nasional Indonesia) deskunfia forte karreta antigu  ho folin bilaun rupiah ne’e hatama subar ba Indonézia liuhusi feronteira terrestre atu haku’ur liubá merkadu iha Illa Java Sentrál.  Maibé foin hakat liu deit área jurisdisaun Timor-Leste nian, autoridade defeza TNI detein kedas hodi submete  ba prosesu invetigasuan iha Autoridade Aduaneira ho Polísia Repúblika Indonézia nian iha Atambua.

“Prova krime ne’ebé ami detein hela mak karreta marka Land Rover 3000 cc. Karreta ne’e na’in laiha no deskunfia forte na’in halai soe hela karreta ne’e iha mota laran bainhira haree forsa  TNI sira halo operasaun iha área refere,” Komandante Satgas Pamtas RI -RDTL Yonif 743 PSY, Letnan Kolonél Infantéria   (Letkol Inf), Andi Lulianto haktuir ba  MNC Portal ne’ebé  Hatutan.com sita.

Hafoin halo apreensaun ba karreta antigu ne’e, forsa TNI entrega hikas ba Autóridade Aduaneira ka Beacukai Atambua nian atu bele kontinua prosesa tuir lei mak vigora iha Indonézia.

“Ami espera katak prosesu ne’e sei hala’o ho transparente atu bele fó sansaun ba oknum ne’ebé komete krime ne’e no ba oin la bele halo tan,” Andi Lulianto hateten.

Hosi sorin seluk, Xefe Seksaun Autoridade Aduaneira Atambua ne’ebé simu direta prova krime karreta ne’e hato’o agradese boot ba  Satgas Pamtas  RI – RDTL  ne’ebé  kontribui  ativa hapara atividade illegal  iha fronteira terrestre TL-RI.

Halo tiha termu entrega karreta ne’e husi  Satgas Pamtas  RI – RDTL   ba Autoridade Aduaneira, karreta refere lori ba para iha garazen Autoridade Aduaneira Atambua nian hodi submete ba invetigasaun.

Notísia iha Relasaun: Deskobre fukun-sira fó espasu ba pasajen ilegál buras iha fronteira

Jornalista: Vito Salvadór