Hatutan.com, (11 Marsu 2022), Díli—Conselho de Imprensa Timor Leste (CI) servisu hamutuk ho Sekretariadu Tékniku Administrasaun Eleitorál (STAE), hodi entrega Kartaun Kredensiál Vota Móvel ba Jornalista na’in 251, liu hosi reponsável órgaun no meiu komunikasaun sosiál sira.

Ekipa Jornalista Hatutan.com hamutuk na’in neen mak hetan kartaun kredensiál atu bele vota móvel iha 19 Marsu 2022. Foto/Hatutan.com

Kartaun kredensiál ne’e hodi fasilita di’ak liután atividade jornalizmu durante eleisaun prezidensiál ne’ebé sei realiza iha loron 19 fulan Marsu tinan ne’e.

Notisia iha Relasaun:CI-UNDP Prodús Matadalan Reportájen Sensível ba Jéneru

Tuir dadus ne’ebé Hatutan.com asesu, jornalista nasionál ne’ebé servisu ba órgaun no meiu komunikasaun sosial privadu no estatál 21 ho totál jornalista 240 mak sei ezerse sira nia direitu de votu iha kualkér sentru votasaun tuir karta kredensiál ne’ebé CI atribui.

Alem de órgaun no meiu komunikasaun sosiál sira iha rai-laran, CI entrega mós kartaun kredensiál ba ajénsia no média internasionál tolu hanesan Ajénsia Reuters, Kyodo Agency no Aljazeera ho totál jornalista hamutuk 11.

Diretór ezekutivu CI, Rigoberto Monteiro esplika prosesu tomak atu hetan karta kredensiál ne’e hosi CI ho STAE  ninia kritéria atu iha karta kredensiál mak jornalista tenke iha karteira profisionál hosi CI.

Conselho de Imprensa Timor Leste (CI) servisu hamutuk ho Sekretariadu Tékniku Administrasaun Eleitorál (STAE), hodi entrega Kartaun Kredensiál Vota Móvel ba Jornalista na’in 251, liu hosi reponsável órgaun no meiu komunikasaun sosiál sira, Sesta (11/03/2022). Foto/CI.

Bainhira seidauk iha, maizumenus tenke iha ona kartaun estájiu profisionál, ida seluk maka CI halo identifikasaun ba jornalista sira ne’ebé hatama sira nia rekerimentu ne’e mai hosi média profisionál ka la’e no ida ikus liu mak  CI sei halo verifikasaun bazeia ba rekejitu hosi STAE mak jornalista sira tenke hatama foto, kartaun vasina inklui prienxe formuláriu no deklarasaun de kompromisu.

“Ita agora vota móvel tanba ne’e ita tenke iha deklarasaun de kompromisu atu la vota dala rua hodi kontra deklarasaun ne’ebé ita presta,” Rigoberto Monteiro hateten iha salaun enkontru CI, Quintal-boot, Díli, Sesta (11/03/2022).

CI iha obrigadaun atu fasilita jornalista sira durante prosesu eleisaun liu hosi karta kredensiál ne’ebé ohin atribui, tanba ne’e hein katak Jornalista sira sei hala’o sira nia knaar ho responsabilidade no nafatin la’o tuir kódigu étika ne’ebé iha.

Prezidente Interinu CI, Expedito Dias Ximenes hateten ho kataun kredensiál ne’ebé iha bele tulun jornalista sira hala’o misaun di’ak liu tán hodi bele oferese informasaun ka produtu jornalístiku ida kualidade atu hakonu sosiedade ho informasaun ne’ebé loos no kredível.

“Kartaun kredensiál ne’e jornalista de’it mak hetan atu halo servisu ba públiku. Tanba ne’e, tenke sinseru atu la kontra ka viola lei eleitorál sira katak ema ida vota dala ida,” Expedito Dias Ximenes hateten.

Bainhira jornalista sira hasoru dezintendimentu ka difikuldade ruma iha terrenu liga ho direitu vota livre tuir kredensiál ne’ebé iha, bele halo komunikasaun direta ba CI ka bele mós STAE atu hetan solusaun.

Jornalista: Vito Salvadór