Hatutan.com (15 Marsu 2022), Díli—Kandidatu Prezidente Repúblika, Antero Benedito da Silva promete ba apoiante sira iha aldeia Poros, Suku Mehara, Postu-Administrativu Tutuala, Munisípiu Lautém katak, bainhira eleitu nu’udár Prezidente Repúblika períudu 2022 to’o 2027 sei populariza demokrasia liu hosi forum permanente ho povu Kamponeza.

Kandidatu Prezidente Repúblika, Antero Benedito da Silva, kuda ai-oan iha aldeia Poros, Suco Mehara, Postu-Administrativu Tutuala, nu’udár símbolu komitmentu ba justisa ekolójika. Foto/Ekipa Susesu Antero Benedito.

Objetivu hosi popularizasaun demokrasia ne’e atu promove partisipasaun direta povu nian iha konsultasaun no desizasaun deliberativu Prezidente nian.

Notisia iha Relasaun:Felizberto Prioritiza Reforma Ekonómika ho Justisa

“Kada tinan molok debate Orsamentu Jerál Estadu no simu proposta lei orsamentu jerál foun, Prezidente Repúblika tenki konvoka forum permanente ho toos-na’in no komunidade, hodi rona sira nia preokupasaun no opiniaun,” Hatutan.com sita deklarasaun Antero bainhira ho ekipa susesu nasionál no munisípiu Lautém, hala’o diálogu populár ho nia simpatizante no transmite direta via média sosiál ekipa susesu iha Segunda (14/03/2022).

Liuhosi konsulta ne’e mak sei sai baze ba Prezidente Repúblika hodi promulga ka veta Orsamentu Jerál Estadu ruma ne’ebé la pró ba povu kamponéz, ai-leba, traballadór no sidadaun sira.

Ne’e nu’udár reforma polítika demokrasia ne’ebé sei hadi’a liu tán povu nia bem-estar no dezenvolvimentu Estadu foun ne’ebé libertadór.

Ho konkretu, Antero Benedito da Silva, kandidatu númeru sorteiu 10 dehan, bainhira eleitu hanesan Prezidente Repúblika sei halo popularizasaun demokrasia liu hosi konsulta no diálogu ativu permanente ho povu nu’udár ajenda prinsipál ba reforma Estadu, atu asegura Estadu besik no la’ós dook hosi povu.

Hafoin diálogu ne’e termina, halo kedas atividade kuda ai-oan iha aldeia Poros, Suco Mehara, Postu-Administrativu Tutuala, nu’udár símbolu komitmentu Antero Benedito da Silva nian ba justisa ekolójika.

Jornalista: Vito Salvadór