Hatutan.com, (30 Marsu 2022), Díli— Tribunál Rekursu (TR) iha Kuarta 30 fulan ne’e, dada ona sorteiu ba kandidatu Prezidente Repúblika 2022-2027 ba segunda ronde, iha ne’ebé kandidatu José Manuel Ramos Horta okupa númeru 1 no kandidatu Francisco Guterres Lú Olo okupa númeru 2.

Edifísiu Tribunál Rekursu. Foto/Hatutan.com

Serimónia dada sorteiu ne’ebé hala’o iha Tribunál Rekursu (TR) prezide hosi Prezidente Tribunál Rekursu (PTR), Deolindo dos Santos.

Notisia iha Relasaun:TR Valida Eleisaun PR Primeira Volta, Horta ho Lú Olo Hakat ba Segunda Vota

Rezultadu sorteiu ne’e, TR sei haruka ba Sekretariadu Táknika Administrasaun Eleitorál (STAE) no Comissão Nacional das Eleições (CNE), hodi bele halo preparasaun liu-liu prodús buletin de votu.

“Rezultadu ne’e TR sei komunika ho parte STAE hodi bele prodús buletin de votu. Tanba ne’e, dezezu ba STAE no CNE atu servisu di’ak hodi prodús buletin de votus tuir rezultadu númeru sorteiu ne’ebé iha ona,” Deolindo dos Santos liu hosi intervensaun hafoin dada sorteiu ba kandidatu na’in rua.

Parte TR husu ba kandidatura na’in-rua atu halo kampaña tuir kalendáriu eleitorál ne’ebé define ona iha lei eleitorál.

Alende ne’e parte CNE mós husu ba kandidatu sira atu bele introdús programa kampaña ne’ebé edukativu, tanba ne’e sei prepara oráriu kampaña segunda volta nian.

“Daudaun ami estuda hela no sei reuniaun ho sira atu nune’e bele kumpri no la’o tuir oráriu ne’ebé iha ona,” Prezidente CNE, José Agostinho da Costa Belo, hateten.

Notisia iha Relasaun:Apuramentu Nasionál, Horta Votu Barak liu no Ángela Freitas Oitoan liu

Jornalista: Carmelita Isaac