Hatutan.com, (02 Setembru 2023), Díli—Polítika IX Governu Konstitusionál liuhosi Sekretáriu Estadu Komunikasaun Sosiál  (SEKOMS) fó subsídiu “Transferénsia Públika” bá mídia nasionál sira ne’ebé rejistadu iha Conselho de Imprensa (CI), maibé la’ós atu halo intervensaun bá produtu jornalistiku ne’ebé jornalista hosi mídia sira prodús lorloron.

Lee Mós: SEKOMS Konsidera Média iha Papél Importante bá Kontrolu Sosiál no Kurize Buat Ne’ebé Sala

SEKOMS Expedito Dias Ximenes dada-lia ho Membru Conselho de Imprensa nu’udár mós Xefe Redasaun Hatutan.com, Francisco Belo Simões da Costa iha ámbitu Dili Dialogue Forum (DDF) ne’ebé hala’o iha salaun CNE, Díli, Sesta (01/09/2023). Foto/Elio dos Santos da Costa

Sekretáriu Estadu Komunikasaun Sosiál, Expedito Dias Ximenes, klarifika  assuntu ne’e bainhira halo enseramentu bá Konferénsia Internasionál The Dili Dialogue Forum, ne’ebé organiza hosi Conselho de Imprensa (CI) de Timor-Leste ne’ebé hala’o iha salaun Lalini Larigutu, CNE, Colmera, Díli, Sesta (01/09/2023).

“IX Governu Konstitusionál hahú fó apoiu bá mídia sira, ida-ne’e la signifika Governu atu halo intervensaun bá iha produtu jornalístiku sira ne’ebé jornalista hosi mídia idaidak prodús,” Expedito Dias Ximenes hateten.

Nia fó ezemplu katak, iha mídia privada barak iha mundu hanesan mídia BBC Austrália no mídia privada sira seluk tán iha nasaun barak, sira hetan apoiu 100% hosi Estadu, maibé sira kontinua kritika Governu.

“Krítika ho faktus. Labele tanba la gosta ministru ida, tanba la gosta diretór jerál ida, ita halo notísia ida sem faktus. Ida-ne’e ita viola ona kódigu etika jornalista. Tanba Jornalista labele hatama ninia opiniaun iha notísia. Ida fali tenke iha cover both side. Katak, bainhira halo notísia ida ne’ebé ofende ema seluk, tenke halo konfirmasaun ho parte seluk atu bele halo balansu,” Expedito Dias Ximenes esplika tán.

Buat seluk fali SEKOMS hakarak subliña katak, Jornalista mós la’ós anju. Tanba ne’e bainhira hakerek sala karik, tenke halo retifikasaun bainhira parte balun lamenta duni ho publikasaun ne’ebé sala.

Esplikasaun ne’e SEKOMS hakarak mós atu reafirma pozisaun Governu nian hodi responde bá preokupasaun Jornalista Hatutan.com Cipriano Colo ne’ebé koloka iha sesaun husu no hatan iha The Díli Dialogue Forum iha salaun CNE ne’e.

Preokupasaun  jornalista Cipriano Colo nian katak, diskusaun iha The Díli Dialogue Forum ko’alia foka liubá mobilizasaun mídia ka unidade média atu halo advokasia bá kualkér tipu violasaun direitus umanus liuhosi publikasaun sira. Maibé, realidade iha Timor hatudu katak, mídia nasionál sira ne’ebé rejistadu iha Consellho Imprensa (CI) hamutuk 40-rein, maibé dala barak laiha unidade atu halo kobertura bá asuntu sira sériu hanesan korrupsaun no violasaun direitus umanus sira seluk ne’ebé makaer ukun sira mak komete.

Ezempu balun maka, bainhira mídia balun halo hela kobertura kona-bá kazu korrupsaun, maibé iha parte seluk iha mós mídia balun halo hela publikasaun hodi counter ka halo clearing house hodi defende makaer ukun sira hosi kazu ne’e. Ida ne’e hatudu katak, mídia iha Timor seidauk bele goza ninia indepenénsia editoriál tanba intervensaun hosi na’in bá mídia sira karik tanba mídia privadu sira mós hetan hela subvensaun ka iklan hosi Governu no lakohi atu lakon ida-ne’e.

Asuntu ida-ne’e Cipriano Colo konsidera katak, bainhira mídia iha Timor kontinua ho situasaun hanesan ne’e, maka sei la akonteste atu halo advokasia bá kazu violasaun direitus umanus nian liu hosi publikasaun sira.

SEKOMS Selebra Kontratu ho Mídia Imprime Lima

Iha loron 31 Agostu 2023, Sekretáriu Estadu Komunikasaun Sosiál (SEKOMS), Expedito Dias Ximenes selebra kontratu ho mídia imprime lima mak hanesan Suara Timor Lorosa’e (STL), Diáriu Timor Post (TP), Grupu Mídia Nasionál (GMN), Jornal Independente no Dili Post.

Kontratu ne’e hala’o bazeia ba Programa Governu liuhosi Sekretária Komunikasaun Sosiál ho prinsípiu hakarak fó apoiu bá meiu komunikasaun sosiál iha Timor Leste liuhusi “Programa Fortalesimentu Meiu Komunikasaun Sosiál”.

Objetivu husi programa ne’e maka, liuhosi distribuisaun Jornál bá munisípiu no to’o iha kliente sira nia liman bele asesu informasaun iha rai-laran no rai-li’ur.  Meius ida-ne’e aleinde hariku informasaun, sidadaun sira mós bele kontinua toman lee jornal, nune’e mós ho programa ne’e bele tulun meiu komunikasaun liuliu mídia imprime sira iha rai laran.

Durasaun kontratu ne’e hahú válidu iha loron 01 Setembru to’o loron 31 Dezembru 2023. Durante serimónia asinatura kontratu, Sekretáriu Estadu subliña, kontratu bá fulan-haat sei iha avaliasaun no kontinua nafatin ho hanoin katak governu nafatin defende ezisténsia mídia imprime iha Timor Leste.

Hatutan.com sita komunikadu hosi SEKOMS esplika apoiu hanesan (apoiu indireta) sei fó mós ba televizaun no plataforma dizitál sira ne’ebé prienxe rekizitu.

Expedito Dias Ximenes defende katak, plataforma mídia hotu-hotu tenke prienxe rekizitu legál sira liuliu rejistu iha SERVE no Conselho Imprensa, atu nune’e informasaun hotu ne’ebé fó sai ho responsabilidade tomak no tuir Lei Komunikasaun Sosiál no Kódigu étika jornalista sira nian.

Mídia na’in sira apresia ho programa Sekretária Estadu Komunikasaun Sosiál ne’ebé konsideradu hakbiit tebes mídia hotu iha rai laran.

Na’in ba Mídia STL, Salvadór Soares subliña, mídia iha rai laran liuliu mídia imprime sira iha situasaun difísil tebes ne’ebé presiza duni tulun hosi Governu. Tanba ne’e, nia konkorda tebes Sekretáriu Estadu Komunikasaun Sosiál, Expedito Loro Dias Ximenes nia inisiativa sira fó apoiu ba mídia tanba konsidera duni mídia nu’udár pilar importante tebes iha país demokrátiku.

Tuir planu, iha tempu badak sei realiza akordu ho televizaun no plataforma dizitál sira atu bele asessu mós bá iha apoiu ida-ne’e.

Jornalista: Vito Salvadór