Hatutan.com (07 Abril 2022), Díli— Iha terseira semana kuarezma nian bainhira Bispu no padre sira renova hela sira-nia sakramentu orden (Misa Krizmál), Kinta (07/04/2022), mosu mós akontesimentu omisídiu  iha Suku Fahilebu, Postu Administrativu Bazartete, Munisípiu Liquiça, hodi rezulta na’in-rua mate-fatin.

Vítima Omisídiu iha Fahilebu, Postu Administrativu Bazartete, Munisípiu Liquiça, 07 fulan-Abríl 2022. Foto/Espesiál

Importánsia hosi Misa Krizmál ne’ebé selebra kada tinan iha dioseze sira Igreja Katólika nian, hatuur iha karta sirkulár ne’ebé fó-sai hosi Kongregasaun ba Adorasaun Divina iha tinan 1988 kona-bá selebrasaun Páskua, Paschales Solemnitatis (PS). 

Tradisionalmente Misa Krizmál ne’e selebra iha loron molok tama ba Kinta feira Santa, prezide hosi Bispu no partisipa hosi Padre hotu-hotu ne’ebé hala’o misaun iha dioseze no sarani sira mós bele partisipa.

Misa Krizmál ne’e atu hasantu mina santa no manifesta uniaun Nai Lulik sira nian ho Bispu iha Seserdósiu no servidór Kristu nian.

Ohin mós iha oras dadeer, iha Katedrál Díli,  Padre sira ne’ebé hala’o misaun iha Arkedioseze Metropolitana Dili, hamutuk ho Arsebispu Metropolita, Dom Virgilio do Carmo da Silva, SDB selebra Misa Krizmál atu ronova hikas mina santa no mós prepara aan atu selebra semana Santa.

Selebrasaun ne’e iha hela momentu oportunu ka iha tempu Kuarezma nia laran, ne’ebé sarani Katóliku sira iha obrigasaun atu halo tuir buat tolu importante, maka halo karidade, jejun no orasaun.

Iha oras ne’ebé hanesan maski iha fatin la hanesan, mós akontesimentu omisídiu  iha Suku Fahilebu, Postu Administrativu Bazartete, Munisípiu Liquiça, hodi rezulta na’in-rua mate-fatin.  

Akontesimentu ran-nakfakar ne’e envolve husi  suspeitu ho inisiál AdF ne’ebé taa   vítima na’in-rua; Francisco dos Santos ho Edito Soares, iha kedas ambitu limpeza ba preparasaun atu simu Ilas São João de Brito.

Tuir kronolojia katak suspeitu ho vítima na’in-rua ne’e sei iha relasaun família hanesan umane no mane-foun, maibé iha atividade preparasaun ne’e laiha diskute malu entre suspeitu no vítima sira, tanba sei ko’alia halimar, maibé deperenti deit bainhira vítima sira tur hela, maka suspeitu foti katana hodi taa vítima na’in-rua iha parte kakorok hodi rezulta mate fatin.

“Suspeitu ho vítima kontribui ba  limpeza ba preparasaun hodi simu Ilas São João de Brito, suspeitu ho vítima ba servisu hotu hodi halo limpeza atu dada lona, maibé derrepente de’it suspeitu hamriik taa vítima na’in-rua iha parte kakorok hodi rezulta mate fatin,” Xefe Suku Fahilebu, Marcelino da Cruz, informa ba Hatutan.com via telefónika. 

Hafoin akontesimentu Polísia to’o kedas iha fatin hodi detein  suspeitu no evakua vítima na’in-rua  hakotu ona iis ba Ospitál Nasionál Guido Valadares (HNGV) hodi halo autópsia.

Jornalista: Carmelita Isaac