Hatutan.com, (12 Abríl 2022), Díli– Governu liu husi Sekretáriu Estadu Komunikasaun Sosiál (SEKOMS)  sei dezenvolve asaun tolu (3)  hodi kombate desinformasaun iha eleisaun jerál iha Timor-Leste.

Workshop kona-bá kombate disinformasaun ne’ebé organiza husi CI ho CNC, 12 Abríl 2022. Foto/Hatutan.com

Asaun tolu ne’e mak hanesan mantein edukasaun sivíka  ba literásia dijitál no plataforma kona-bá Boa Notísia ho plataforma kombate  Id falsu ka Fake News.

Objetivu husi asaun tolu ne’e,  atu prepara sidadaun sira iha kapasidade no koñesimentu hodi utiliza mídia sosiál ho matenek.

Sekretáriu Estadu Komunikasaun Sosiál, Mericio Juvinal dos Reis “Akara”, hateten,sei  prepara plataforma tékniku balun, nune’e tempu badak sei lansa plataforma ida kona-bá boa notísia ka notísia di’ak iha Timor-Leste.

Advertisement

“Ita boot sira sei sente iha notísia balun ne’ebé mak di’ak ita bele orgullu katak notísia ne’e foti ita nia rai no ita nia imajen nasaun nian, nune’e nasaun seluk bele akompaña katak iha Timor la’ós buat at deit, maibé buat di’ak mós iha,” Mericio Akara hateten bainhira halo abertura ba workshop ho tema kombate disinformasaun Eleisaun Jerál iha Timor-Leste ne’ebé realiza  iha salaun Centro Nasionál Chega (CNC), Balide, Díli, Tersa (12/04/2022).

Nia husu mós   ba jornalista sira  ne’ebé hala’o kna’ar iha mídia públiku no privadu sira, atu kontribui ba informasaun ne’ebé loos no kredivel hodi  kombate notísia HOAX tanba kna’ar mídia importante no mídia tenke kritiku.

“Edukasaun sívika la iha sansaun tanba edukasaun sívika ne’e eduka ema to’o tinan-10 nia laran, katak sidadaun Timor ne’e, tenke iha kapasidade utiliza mídia ho di’ak no kona-bá plataforma tékniku sira ne’e lai iha sansaun maibé ema mak iha konsiénsia hodi uza mídia sosiál ho di’ak,” Akara hateten.

Iha fatin hanesan, Prezidente interinu Conselho de Imprensa (CI), Expedito Loro Dias Ximenes, dehan workshop  ne’e servisu hamutuk ho CNC no parseiru  sira husi Indonézia, hodi fahe informasaun kona-ba misinformasaun no disinformsaun.

“Oinsá mak ita kombate disinformsaun iha eleisaun 2023 tanba ne’e KI ho CNC hanoin tópiku ne’e importante atu bele halakon disinformsaun ka fake news mosu dala-barak tan de’it ita sala uza Facebook iha plataforma dijital sira ne’ebé iha,” Expedito hateten.

Advertisement

Nia esplika, objetivu husi workshop ne’e atu fó hanoin ba sidadaun sira, liu-liu jornalista sira iha mídia hotu-hotu no estudante sira ne’ebé iha departamentu Komunikasaun Sosiál, atu sira mós bele hatene oinsá forma hodi kombate disinformsaun iha situasaun polítika atuál.

Mídia sosiál nudár mídia plataforma internet fó impaktu fundamentál ba integridade eleisaun no fiar povu nian tanba forma opiniaun públiku ho informasaun falsa (disinformasaun).

Iha Timor-Leste kuaze utilizadór mídia sosiál hamutuk rihun 429,9  iha inísiu 2022 hanesan ho 31,7% husi total populasaun no Facebook domina rihun 407,4 (kemp, 2022).

Jornalista:  Elio dos Santos da Costa

Advertisement